„ ციფრული ფული უზარმაზარი ზეგავლენის გამომწვევია საერთაშორისო სავალუტო სისტემისთვის. ამიტომ მოვუწოდებ, საერთაშორისო გადახდის სისტემის მოდერნიზება, ფრაგმენტაციის საფრხის შესამცირებლად, საჯარო ციფრული პლატფორმების გამოყენებით მოხდეს. უკრაინის ომმა მკვეთრად გაზარდა ეკონომიკური ფრაგმენტაციის რისკი. არსებობს გამოსავალი? შექმენით საჯარო ციფრული პლატფორმა ტრანსსასაზღვრო გადახდების მოდერნიზებისთვის, რაც უფრო ეფექტიანი, უსაფრთხო და ინკლუზიური გახდება“, - ამის შესახებ საერთაშორისო სავალუტო ფონდის (IMF) მმართველი დირექტორი კრისტალინა გეორგიევა Twitter-ზე წერს.
IMF აქამდეც საუბრობდა, რომ ციფრული ფულის ტრანსსასაზღვრო გამოყენება ახალი პოლიტიკის შემუშავებას მოითხოვს და დროა პოლიტიკოსებმა გადამწყვეტად იმოქმედონ.
„კომერსანტი“ დაინტერესდა, რა ვითარებაა ამ მიმართულებით საქართველოში და IMF-ის ამ მოწოდების შესასრულებლად თუ არსებობს ქვეყანაში შესაბამისი ბაზა.
საქართველოს პარლამენტის ევროპასთან ინტეგრაციის კომიტეტში აღნიშნავენ, რომ ამ მიმართულებით „ერთიანი ევრო გადახდის სივრცეში საქართველოს წევრობის“ პროექტის ფარგლებში მცირე, მაგრამ ნაბიჯები უკვე იდგმება.
„ერთიანი ევრო გადახდის სივრცე (SEPA), როგორც ევროკავშირის შემდგომი ინტეგრაციის ინიციატივა, მიზნად ისახავს ევროში ელექტრონული გადახდების ჰარმონიზებული ერთიანი ბაზრის მუდმივ განვითარებას, სადაც ტრანსსასაზღვრო გადახდები შეიძლება განხორციელდეს იმავე პირობებით, როგორც ეროვნული გადახდები.
ერთიანი ევრო გადახდის სივრცეში (SEPA) გაწევრებას უკავშირდება გადახდის საერთო ევროპული სტანდარტების, წესების და პრაქტიკის დანერგვა, რაც უზრუნველყოფს მოქალაქეებს და ბიზნესს უსაფრთხო, კონკურენტული ღირებულების მქონე, მომხმარებლისთვის მოსახერხებელი და სანდო საცალო გადახდის სერვისებით ევროში“, - აღნიშნავენ კომიტეტში.
თავის მხრივ, ფინანსთა მინისტრმა ლაშა ხუციშვილმა რამდენიმე თვის წინ აღნიშნა, რომ არსებობს ციფრული პლატფორმის პროექტი, რომელიც დაკავშირებული იქნება საქართველო-აზერბაიჯანის ინფორმაციულ სისტემებთან და ეს მნიშვნელოვნად გააადვილებს ტრანსსასაზღვრო გადაადგილებას.
ექსპერტთა წრეებში კი საუბრობენ, რომ ამ მიმართულებით საქართველოში მნიშვნელოვანი არაფერი კეთდება და მიუხედავად IMF-ის დაჟინებული განცხადებების, ამის მიღწევა განვითარებული ქვეყნებისთვის უფრო მარტივი იქნება. ჩვენნაირი ქვეყნისთვის კი აქამდე მისასვლელად სხვა მრავალი ნაბიჯია გადასადგმელი, მათ შორის ტრანსსასაზღვრო ვაჭრობის და გადაადგილების გამარტივება, ციფრული ფულის ირგვლივ არსებული პრობლემების გადაჭრა და სხვა.
აღსანიშნავია, რომ მონაცემთა პლატფორმა Pymnts-ის 2021 წელს ჩატარებული კვლევის თანახმად, მსოფლიოში მრავალეროვნული კომპანიების უმეტესობა, ტრანსსასაზღვრო ტრანზაქციებზე კრიპტოვალუტებს იყენებს. ამ კომპანიების 57.6% იყენებს კრიპტოვალუტის მინიმუმ ერთ ფორმას. გლობალური კომპანიები ძირითადად სმარტ კონტრაქტებს და ტრანსსასაზღვრო გადახდებს განიხილავენ, როგორც კრიპტოვალუტისა და ბლოკჩეინის ტექნოლოგიის ძირითად გამოყენებას. კრიპტოვალუტების მოხმარების მიზეზად აღმასრულებლებმა ტრანზაქციის დაბალი ხარჯები და გადარიცხვის უფრო მარტივი პროცედურები დაასახელეს.