კორონავირუსის პანდემიით გამოწვეული კრიზისი მთელს მსოფლიოში მოსახლეობის ცხოვრების დონეს გამოუსწორებელ ზიანს მიაყენებს. ქვეყნებს კი ეკონომიკური ზარალის ასანაზღაურებლად შესაძლოა მდიდარი მოქალაქეებისთვის და კორპორაციებისთვის გადასახადების მომატება მოუწიოთ - ნათქვამია საერთაშორისო სავალუტო ფონდის ანგარიშში.
„წარმოების მუდმივი შემცირება ცხოვრების დონეს იმაზე ძლიერ დარტყმას მიაყენებს, ვიდრე პანდემიის დასაწყისში მოსალოდნელი იყო. ბოლო 20 წლის მანძილზე სიღარიბის ყველაზე მასშტაბურ ზრდასთან ერთად, უთანასწორობაც მკვეთრად გაიზრდება“ - მიიჩნევენ ფონდის ექსპერტები.
კრიზისიდან გამოსვლის პროცესი ხანგძლივი, არამდგრადი და გაურკვეველი იქნება. კორონავირუსის შედეგად, მსოფლიო ეკონომიკა მილიონობით სამუშაო ადგილს დაკარგავს, დარგები კი არაკონკურენტუნარიანი გახდება.
გაკოტრების დიდი რაოდენობის გავლენა იმდენად ძლიერი იქნება, რომ წარმოება პანდემიის დასრულების შემდეგაც კი შემცირებას განაგრძობს. ყველაზე მძიმე მდგომარეობაში ტურიზმზე დამოკიდებული და ნედლეულის ექსპორტიორი ქვეყნები აღმოჩნდებიან.
2020 წელს გლობალური ეკონომიკა 4,4%-ით შემცირდება, და ეს ყველაზე ცუდი მაჩვენებელია 30-ანი წლების დიდი დეპრესიის შემდეგ. ფონდის პროგნოზით, 2020 წელს მსოფლიო მშპ 5,6%-ით შემცირდება.
2020 წლის ვარდნის შემდეგ, 2021 წელს ეკონომიკა აღდგენას დაიწყებს, და 4%-ით გაიზრდება, თუმცა წარმოების ზრდა მოსალოდნელზე ნელი იქნება.
მთლიანობაში მდიდარი ქვეყნების მშპ საშუალოდ 3,5%-ით, განვითარებადების კი - 5,5%-ით შემცირდება.
„კრიზისის შედეგების აღმოფხვრისთვის ქვეყნებს შესაძლოა მდიდარ ფენებზე და ელიტურ უძრავ ქონებაზე გადასახადების ზრდა მოუწიოთ. ასევე არაა გამორიცხული ცვლილებები კორპორაციების დაბეგრვაში იმ კუთხით, რომ მათ გადასახადები თავიანთი მომგებიანობის პროპორციულად გადაიხადონ“ - ნათქვამია განცხადებაში.
Forbes
მოამზადა თენგიზ აბლოთიამ