საერთაშორისო სავალუტო ფონდის (IMF) და მსოფლიო ბანკის (WB) საგაზაფხულო შეხვედრებზე განსაკუთრებული ყურადღება ეთმობა გლობალური სასურსათო კრიზისის თავიდან არიდების გზების ძიებას.
IMF ბლოგს აქვეყნებს აღნიშნულ თემასთან დაკავშირნებით, სადაც აცხადებს: „გთავაზობთ მოქნილ ფისკალურ სტრატეგიებს: უკრაინის ომისა და რუსეთის წინააღმდეგ სანქციების გამო ყველაზე მეტად დაზარალებულ ეკონომიკებში, ფისკალურმა პოლიტიკამ უნდა უპასუხოს ჰუმანიტარულ კრიზისს და ეკონომიკურ შეფერხებებს. მზარდი ინფლაციისა და საპროცენტო განაკვეთების გათვალისწინებით, ფისკალური მხარდაჭერა უნდა იყოს მიმართული ყველაზე მეტად დაზარალებულ და პრიორიტეტულ სფეროებზე. იმ ქვეყნებში, სადაც ზრდა უფრო ძლიერია და ინფლაციური ზეწოლა რჩება მაღალი, ფისკალურმა პოლიტიკამ უნდა უნდა უზრუნველყოს მხარდაჭერიდან ნორმალიზებაზე გადასვლა. ბევრ განვითარებად ბაზარსა და დაბალშემოსავლიან ეკონომიკაში, რომლებიც დაფინანსების მკაცრი პირობების ან ვალის პრობლემების საფრთხის წინაშე დგანან, მთავრობებს დასჭირდებათ დანახარჯების პრიორიტეტების განსაზღვრა და შემოსავლების გაზრდა მოწყვლადობის შესამცირებლად. საქონლის ექსპორტიორებმა, რომლებიც სარგებლობენ მაღალი ფასებით, უნდა გამოიყენონ ბუფერების აღდგენის შესაძლებლობა“.
სააგენტო Reuters აღნიშნულ თემასთან დაკავშირებით IMF–ის მაღალჩინოსანს ციტირებს, რომელიც ამბობს: „საერთაშორისო სავალუტო ფონდი ღიაა გადაუდებელი დაფინანსებისთვის, რათა დაეხმაროს მოწყვლად ქვეყნებს სასურსათო უსაფრთხოების საკითხებში, ან განახორციელოს დამატებითი დაფინანსება არსებული დაკრედიტების პროგრამების ფარგლებში“.
ვიტორ გასპარმა, სავალუტო ფონდის ფისკალური საკითხთა დეპარტამენტის დირექტორმა, პრეს–კონფერენციაზე განაცხადა, რომ სასურსათო უსაფრთხოება იყო კრიტიკული თემა სსფ-ისა და მსოფლიო ბანკის წევრების ამ კვირის შეხვედრებზე.
„თუ ქვეყანას უკვე აქვს პროგრამა ფონდთან, შეიძლება განიხილებოდეს სასურსათო უსაფრთხოების პრიორიტეტებთან დაკავშირებული დამატებითი დაფინანსება და თუ ასეთი პროგრამა არ არსებობს, ან რაიმე მიზეზით ქვეყანას არ სურს ამ არხის გამოყენება, შესაძლებელია საგანგებო დაფინანსება, რომელიც ასევე ღიაა ამ ტიპის სიტუაციებისთვის”.
IMF– WB საგაზაფხულო შეხვედრებზე, რომელიც წლის უმნიშვნელოვანესი ეკონომიკური მოვლენაა, აქტიურად განიხილებოდა უკრაინის საკითხი. დისკუსიებში სავალუტო ფონდის ხელმძღვანელმა დაადასტურა, რომ უკრაინას უახლოესი თვეების განმავლობაში ყოველთვიურად $5 მლრდ–ის დახმარება ესაჭიროება.