„ღვინის იმპორტი ყველაზე მსხვილი მასშტაბით აშშ-ში ხორციელდება, ხოლო თუ ქართული ღვინო ამ ბაზარზე შესაბამისი ნიშის დაკავებას მაღალ საფასო სეგმენტში შეძლებს, ეს დიდი წინგადადგმული ნაბიჯი იქნება. თუმცა, სამწუხაროდ ამ საქმეში აქცენტი და რესურსები არ არის საკმარისად ჩადებული. რუსეთის ბაზარზე, რომელიც მოწყვლადია, არ უნდა იხარჯებოდეს ამდენი რესრუსი. მთელი მარკეტინგული ღონისძიებები აშშ-ს ბაზრისკენ უნდა მივმართოთ, რადგან მყარი ბაზარია,“- ამის შესახებ „კომერსანტთან“ საერთაშორისო ურთიერთობების ექსპერტი გიორგი მუჩაიძე აცხადებს.
აშშ-ს პრეზიდენტის მიერ საქართველოს დამოუკიდებლობის დღისადმი მიძღვნილ წერილში საუბარია ორ ქვეყანას შორის ეკონომიკურ დივერსიფიკაციაზე, სასამართლო სისტემის მნიშვნელობასა და დამოუკიდებლობის გაძლიერებაზე.
„ველი თქვენთან თანამშრომლობას, რათა დავეხმაროთ საქართველოს დემოკრატიული ინსტიტუტების კონსოლიდაციასა და პოლიტიკური პლურალიზმის განმტკიცებაში, კანონის უზენაესობის გაძლიერებაში, რომლის საყრდენს წარმოადგენს დამოუკიდებელი სასამართლო, ასევე - ეკონომიკის დივერსიფიკაციაში,“ - ნათქვამია დონალდ ტრამპის მიერ საქართველოს პრემიერ-მინისტრისთვის გამოგზავნილ წერილში.
ექსპერტი გიორგი მუჩაიძე მიიჩნევს, რომ საქართველომ ჯეროვნად უნდა გამოიყენოს საქართველოს ლოგისტიკური ჰაბის პოტენციალი და შექმნას ქვეყნისთვის მიმზიდველი საინვესტიციო გარემო, რათა აშშ-დან ეკონომიკური დივერსიფიცირება რეალობაში განხორციელდეს.
„აუცილებელია მიმზიდველი საინვესტიციო გარემოს შექმნა ადგილობრივი ინვესტორებისთვისაც, რათა მათ არ გაუჩნდეთ სურვილი ინვესტიციის გატანის და სხვა ქვეყანაში ფულის დაბანდების. უცხოელი ინვესტორი კი ასეთ გარემოში დადებით გამოცდილებას და მესიჯებს გაიტანს. ამით საქართველოს, როგორც მწარმოებლის რეპუტაცია გაიზრდება.
ამ დივერსიფიკაციისთვის მნიშვნელოვანია ღრმაწყლოვანი პორტის განვითარებაც. ლოგისტიკური ჰაბის კონცეფცია გვაქვს, მაგრამ მისი რეალური იმპლემენტაცია ვერ ხორციელდება. ეს თუ გამოსწორდება, ექსპორტის პოტენციალიც გაიზრდება და უცხოური ინვესტიციებიც.
სასამართლოსა და კანონის უზენაესობას ჩვენის სტრატეგიული პარტნიორები ხშირად აღნიშნავენ საქართველოსთან მიმართებაში. იმედი აქვთ, რომ რაღაცას გავაკეთებთ.კრიტიკის მიზანი არის ის, რომ გამოსწორდეს მდგომარეობა. ამასთან აღნიშნავენ იმ მიღწევებსაც, რაც ამ დრომდე გვქონდა. როდესაც 10-ჯერ მიგანიშნებენ ხარვეზებზე და არ გესმის, მერე პირდაპირ გეტყვიან, რომ პრობლემები გაქვს .
ამასთან დემოკრატიის მნიშვნელობა თანამედროვე სამყაროში ძალიან დიდია. ბინზნესი და დემოკრატია ერთად, მნიშვნელოვნად ზრდის ქვეყნის ეფექტურობას. საბოლოოდ კი ეს შემდეგი ნაბიჯია „ნატოსა“ და „ევროკავშირში“ გაწევრიანების გზაზე,“ - აღნიშნავს გიორგი მუჩაიძე
მარიამ მორგოშია