„ისე გამოვიდა, რომ კიდევ ერთი გადასახადი დაგვიმატეს და იმ პირობებში როდესაც გადასახადები გაზრდილია, კომპანიებს ეს ტვირთად დააწვება“, - აზარტული თამაშების ბიზნესისთვის რეგულაციების გამკაცრებასთან დაკავშირებით „სათამაშო ბიზნესის ასოციაციის“ ხელმძღვანელმა გიორგი მამულაიშვილმა „კომერსანტთან“ ისაუბრა.

მამულაიშვილის თქმით, იმის ვალდებულება და პრაქტიკა, რომ ონლაინ კაზინოსთან ერთად, კომპანიას უნდა ჰქონდეს სახმელეთო (ოფლაინ) კაზინო, მსოფლიოში არსად არ არის და ფინანსთა  სამინისტროს არგუმენტი, რომ ეს მსოფლიოში აპრობირებული მეთოდია, არასწორია.

„კი,  ლიცენზიები არის,  ამისთვის  ჩვენ  მზად  ვიყავით,  თუმცა  პირველადი  მოლაპარაკებების  და  კონსულტაციების  შედეგად, სულ სხვა  ფორმით უნდა ყოფილიყო.  დღესდღეობით,  ეს  რეალობა  შეიცვალა, ავალდებულებენ  მიწის ობიექტის  არსებობას,  თუ  გინდა ონლაინ კაზინო, კაზინოც  უნდა გქონდეს,  თუ  გინდა ონლაინ  სლოტ  კლუბი,  სლოტ  კლუბიც  უნდა გქონდეს და  შესაბამისად,  მოსაკრებელიც  დაემატა.  კომპანია  კვარტალში  იხდიდა  ნახევარ მილიონს და  დღეს გადაიხდის  750 000,  შესაბამისად, ეს ხარჯები ყველა კომპანიას  გაეზრდება, რაც  საბოლოო  ჯამში  ნეგატიურად აისახება  ბიზნესზე.

დღესდღეობით, ბევრმა კომპანიამ  გაზრდილი  გადასახადების  პირობებში მიწის  ობიექტები დაკეტა, ძალიან ბევრი  ტოტალიზატორი  დაიკეტა , ბევრი  სლოტ  კლუბი  დაიკეტა. ეს საკმაოდ დიდი პრობლემაა დღევანდელ  ვითარებაში  და  გაზრდილი  გადასახადების  ფონზე“-  აღნიშნა გიორგი მამულაიშვილმა.

როგორც ცნობილია, პარლამენტმა უკვე დაიწყო ახალი საკანონმდებლო ცვლილებების განხილვა, რომლითაც ხდება გემზე კაზინოების აკრძალვა და ონლაინ-აზარტული თამაშების მოწყობისთვის დამატებითი ნებართვის შემოღება.

დღეისათვის მოქმედი კანონით, ონლაინთამაშობის მოწყობის უფლება არ საჭიროებს დამატებით ნებართვას და მისი გამართვა შეუძლია აზარტული ან მომგებიანი თამაშობის ნებართვის მფლობელს. კანონპროექტის განმარტებით ბარათში აღნიშნულია, რომ აღნიშნულ შემთხვევაში ნებართვის მფლობელი იხდის სათამაშო ბიზნესის კვარტალურ მოსაკრებელს, რომელიც 250 000-ლარიდან 300 000 ლარამდეა.

ცვლილებით, პირს ონლაინთამაშობების მოსაწყობად ახალი ნებართვა დასჭირდება. კერძოდ, სანებართვო მოსაკრებელი ონლაინსამორინეს თამაშობების ორგანიზებისთვის წელიწადში 100 000 ლარი იქნება, ასევე 100 000 – 100 000 ლარია საჭირო ონლაინ- სათამაშო აპარატის თამაშობების ორგანიზებისა და ონლაინ- ტოტალიზატორის თამაშობების ორგანიზებისთვის ნებართვებისთვის.

ონლაინ თამაშობებზე ნებართვა გაიცემა ფიზიკურად არსებული ნებართვის მფლობელებზე, როგორც დღეის მდგომარეობითაა, გარკვეული ცვლილებების გათვალისწინებით. კერძოდ კი, სამორინეს ნებართვის მფლობელზე მხოლოდ ონლაინ სამორინე, სათამაშო აპარატების სალონის ნებართვის მფლობელზე მხოლოდ ონლაინ სათამაშო აპარატების, ტოტალიზატორი - ონლაინ ტოტალიზატორის ნებართვა.

თაკო კვაჭანტირაძე