კორონავირუსისგან შექმნილი ვითარების გამო საქართველოს მოსახლეობის დიდი ნაწილი უშემოსავლოდ დარჩა. ფინანსური მდგომარეობის გაუარესების გამო მოსახლეობას პირველადი ნივთების შეძენა უჭირს. ამის გამო კი სპეციალისტთა დიდ ნაწილს მიაჩნია, რომ სახელმწიფომ მათთვის კონკრეტული თანხა უნდა გამოყოს და მხოლოდ კომუნალური გადასახადების დაფარვით არ უნდა შემოიფარგლებოს, თუმცა  ჯერჯერობით პროგნოზს ვერავინ აკეთებს, როგორ დაეხმარებიან სამსახურის გარეშე დარჩენილ ადამიანებს. 

 ეკონომიკის სამინისტრო საკითხზე მუშაობს და ყოველდღიურად მიმდინარეობს კონსულტაციები იმის შესახებ თუ როგორ უნდა დაეხმარონ ამ ადამიანებს, თუმცა ზუსტი მონაცემების დადგენა ძალიან გაჭირდება. მნიშვნელოვანია აღინიშნოს ისიც, რომ გუშინ ცნობილი გახდა სავალუტო ფონდის ინფორმაცია,რომლის შედეგადაც, მთავრობა უმუშევრად დარჩენილ ადამიანებს 6 თვის განმავლობაში  თვეში 150 ლარს გადაუხდის. ასევე აღსანიშნავია ისიც, რომ მთავრობის მიერ ამის შესახებ ინფორმაცია არ გაჟღერებულა. 

„ეიჩარ პროფესიონალთა გილდიის“  დამფუძნებელი ლილი ბიბილაშვილი აცხადებს,რომ  სახელმწიფომ აუცილებლად უნდა  გამონახოს გზა და შემოსავლის გარეშე დარჩენილი მოსახლეობას ფინანსურად დაეხმაროს, რადგან მოსახლეობის დიდი ნაწილი უკვე სიღარიბის ზღვარს ქვემოთაა.

“რამდენიმე კომპანიის კონსულტანტი ვარ, აქედან რამდენიმე მაღალშემოსავლიანია თუმცა, მათაც უჭირთ თანამშრომლების შენახვა.  ბევრი ცდილობს თანამშრომლის შენარჩუნებას,  ნაწილმა კი დასაქმებულთა უმეტესობა უხეფასო შვებულებაში გაუშვა.განსაკუთრებით  რთული მდგომარეობაა ტურიზმის სექტორში და კარგახანს გასტანს მსგავსი სიტუაცია. ამიტომ  სახელმწიფოს მხრიდან დახმარებას აუცილებლად მივიჩნევ. ის ადამიანები, რომლებიც უმუშევრები დარჩნენ არამგონია დანაზოგის სახით რაიმე თანხა ჰქონდეთ, რადგან ისინი ყოველდღიური ხელფასებზე არიან დამოკიდებული.“-ამბობს ლილი ბიბილაშვილი და აღნიშნავს, რომ დახმარება ოჯახებზე ან უმუშევრად დარჩენილ ცალკეულ პირებზე  აუცილებლად უნდა გაიცეს.

 „არ ვიცი რამდენია სახელმწიფოს ბიუჯეტი და რამდენის გამოყოფა შეიძლება კონკრეტული საქმისთვის, მაგრამ მნიშვნელოვანია ამ საკითხის მოგვარება. თუმცა კარგი იქნება თუ  ამ პირობებში  თუ იქნება რაღაც თანხა გაცემული ან ოჯახზე ან პიროვნებებზე“-აცხადებს ბიბილაშვილი. 

„ეიჩარ გილდიის დამფუძნებელის“ თქმით, არ არის რთული  საქართველოში დასაქმებული ადამაინების სიის შედგენა, რადგან თითოეული მათგანი მიუხედავად იმისა,  სად არის დასაქმებული იხდის გადასახადს, შესაბამისად, სახელმწიფო მის წინაშე ვალდებულია.

„თავის დროზე პრობლემა იყო განმარტების გაკეთება ვინ ითვლებოდა უმუშევრად, ადამიანი რომელიც თვითდასაქმებული იყო არ ითვლებოდნენ უმუშევრად, რადგან ეს ადამიანები იხდიდნენ გადასახადებს და ბუნებრივია მათი აღრიცხვა ადვილია. რთულია იმ კატეგორიის აღრიცხვა, რომლებიც მუშაობდნენ და გადასახადს არ იხდიდნენ, მაგალითად, ძიძები, დიასახლისები, ადამიანები რომლებიც წვრილმან ნივთებს ყიდდნენ ბაზრობებზე, ისინი გადასახადებს არ იხდიდნენ და მათი დადგენა რთულია.თუმცა, ისინი ვინც ნამდვილად ითვლებოდნენ დასაქმებულებად მათი აღრიცხვის შემდეგ უნდა გაიცეს დახმარების სახით თანხა.

მიუხედავად იმისა, რომ კორონავირუსის წინააღმდეგ ბრძოლისთვის შექმნილ ფონდში ბიზნესმაც დიდი თანხები გადარიცხა მაინც არამგონია საკმარისი იყოს ყველა პრობლემის გადასაჭრელად.“-აღნიშნა ბიბილაშვილმა.

საქართველოს გაერთიანებული პროფკავშირების წარმომადგენელი რაისა ლიპარტელიანიც თვლის, რომ უშემოსავლოდ დარჩენილი მოსახლეობის დახმარება სახელმწიფოს ვალდებულებაა.

„გარდა იმისა, რომ მოსახლეობა რომელიც დარჩა შემოსავლის გარეშე უნდა მიიღოს სახელმწიფოსგან შემწეობა, რადგან არიან ოჯახები, რომლებიც ყოველგვარი შემოსავლის გარეშე დარჩნენ და პირველადი მოხმარების ნივთების შეძენასაც ვერ ახერხებენ.ასევე უნდა გაუორმაგდეთ ხელფასები, როგორც სახელმწიფო, ასევე კერძო სექტორში დასაქმებულებს. ეს ადამიანები ყოველდღიურად საკუთარი სიცოცხლის ფასად გამოდიან გარეთ და მუშაობენ. ყოველდღიურად უამრავ ადამიანთან აქვთ შეხება და ეს ყველაფერი მათზე გადადის პირველ რიგში. ესენი არიან, მარკეტში მომუშავეები, სააფთიქო ქსელში,  მედპერსონალი და პატრული, ასევე ის ადამიანები, რომლებიც მათ მსგავსად არც ერთი დღე არ გაჩერებულან და მუშაობენ.გაორმაგებული სამუშაო გრაფიკისა და სიცოცხლისთვის მაღალი რისკის ქვეშ მუშაობა, პრემია დანამატების წინაპირობაა, რომელიც ამ ადამიანებზე უნდა გაიცეს,“-ამბობს რაისა ლიპარტელიანი.

ეკონომიკის მინისტრის ნათია თურნავა ადასტურებს, რომ ეკონომიკური გუნდი მუშაობს საკითხზე, თუმცა რეალობას ყველამ თვალი უნდა გაუსწოროს და ეს რეალობა არის ის, რომ ადამიანების ნაწილი სამუშაო ადგილებს დაკარგავს.

„ჩვენი ანტიკრიზისული ეკონომიკური პაკეტი და ღონისძიებები მიმართულია ორი მიმართულებით: პირველი - ეს არის დაზარალებული ბიზნეს-სექტორები და მათთვის საკმაოდ ტევადი ღონისძიებები იქნა შეთავაზებული, სესხების რესტრუქტურიზაციით დაწყებული, პროცენტის თანადაფინანსებით დამთავრებული; მეორე და მთავარი ობიექტი არის მოსახლეობა და ის ადამიანები, ვინც მიუხედავად ყველა ჩვენი მცდელობისა, დაკარგავენ სამსახურს. ეს ასეა, თვალი უნდა გავუსწოროთ რეალობას. ჩვენ შევდივართ კრიზისში და ვიდრე ეკონომიკა არ ამოიქოება კრიზისამდელ პერიოდამდე, სირთულეები იქნება და ეს პრობლემებს შეუქმნის დასაქმებულებსაც“, - განაცხადა თურნავამ.

მინისტრის თქმით,, ბევრი კომპანია იჩენს პასუხისმგებლობას და ცდილობს, დასაქმებულები შეინარჩუნოს, თუმცა ამას ყველა ვერ მოახერხებს.

ნათია ლომიძე