ელექტრომობილების მწარმოებელმა Lucid Motors-მა შტატებში ქარხნის მშენებლობა დაასრულა.კომპანია, რომელსაც ილონ მასკის ყოფილი თანამშრომლები პიტერ როულინსონი და პიტერ ხოხოლდინგერი ხელმძღვანელობენ, Tesla-ს კონკურენტია.
Lucid Motors-ის საწარმო შტატ არიზონას უდაბნოში, 6,7 ჰექტარზე განლაგდა. პროექტს საუდის არაბეთის საინვესტიციო ფონდი აფინანსებს. ამჟამად ქარხანაში აღჭურვილობის მონტაჟი მიმდინარეობს, პირველ ელექტრომობილს კი კომპანია 2020 წლის ბოლომდე გამოუშვებს. მისი საბაზრო ღირებულება 100 000 დოლარი იქნება.
მომავალში კომპანია წელიწადში 380 000 ელექტროკარის გამოშვებას გეგმავს - ეს მეტია, ვიდრე დღეს Tesla აწარმოებს.2020 წელს Lucid Motors კალიფორნიაში შოუ-რუმებს გახსნის, ხოლო 2021 წელს ევროპაში შევა.
კორონავირუსმა კომპანიის გეგმებს ხელი ვერ შეუშალა.შტატ არიზონას ხელისუფლებამ მას კარანტინის დროს სამუშაოების გაგრძელების უფლება მისცა.ამ დრომდე Lucid Motors-ში 120 ადამიანი მუშაობდა, ახალ ქარხანაში კიდევ 250 დასაქმდება.
ამავე დროს Tesla-ს სხვა კონკურენტები პანდემიისგან ძალიან დაზარალდნენ. მაგალითად, ჩინურმა სტარტაპმა Byton-მა კალიფორნიაში თანამშრომელთა ნახევარი დაითხოვა და ჩინეთში უკვე არსებულ ქარხანაში ელექტრომობილების წარმოების დაწყება გაურკვეველი დროით გადადო.
ასევე ამერიკულმა Rivian-მა ელექტროპიკაპების წარმოების დაწყება გადადო - იმის მიუხედავად, რომ მას მხარს ისეთი ინვესტორები, როგორც Amazon და Ford უჭერენ.
წყარო: secretmag.ru
მოამზადა თენგიზ აბლოთიამ