ილონ მასკს მსოფლიოს ყველაზე ძვირად ღირებული ავტომობილების მწარმოებლის, Tesla-ს 5,044,000 აქცია საქველმოქმედო ორგანიზაციისთვის გასული წლის 19 ნოემბრიდან 29 ნოემბრამდე შეუწირავს. მასკის ფარული ქველმოქმედების შესახებ აშშ-ს ფასიანი ქაღალდებისა და ბირჟების კომისიის (Securities and Exchange Commission-SEC) გუშინდელი განცხადებით გახდა ცნობილი, რასაც Reuters ავრცელებს.

Chronicle of Philanthropy-ის მონაცემებით, აღნიშნული დონაცია ილონ მასკს, ბილ გეითსისა და მელინდა ფრენჩ გეითსის შემდეგ, ამერიკის 2021 წლის მეორე უმსხვილეს დონორად აქცევს.

შემოწირულობამ 5,74 მლრდ დოლარი შეადგინა, რაც Tesla-ს აქციების დახურვის იმ ფასებს ეფუძნება, როცა მასკმა აქციები გასცა. საქველმოქმედო ორგანიზაციის სახელი გამჟღავნებული არ არის. შემოწირულობა მას შემდეგ განხორციელდა, რაც ილონ მასკმა 16,4 მლრდ დოლარის აქციები გაყიდა. მილარდერმა ნოემბრის დასაწყისში Twitter-ის მომხმარებლებში გამოკითხვაც ჩაატარა, ელექტრომანქანების მწარმოებელ კომპანიაში თავისი წილის 10%-ის გაყიდვის შესახებ. მაშინ ის Twitter-ზე წერდა, რომ აქციების ოფციებიდან 2021 წელს 11 მლრდ დოლარზე მეტ გადასახადს გადაიხდის, რითიც პოლიტიკოსების, ბერნი სანდერსისა და ელიზაბეტ უორენის კრიტიკას უპასუხა, რომ მდიდრებმა მეტი გადასახადები უნდა გადაიხადონ.

აქამდე ილონ მასკის საჯარო ქველმოქმედება სხვა მილიარდერების დონორობას ჩამორჩებოდა. Forbes-ის მონაცემებით, მასკმა და Amazon-ის დამფუძნებელმა, ჯეფ ბეზოსმა თავისი ქონების მხოლოდ 1%-ზე ნაკლები შემოწირულობა გაიღეს მაშინ, როცა უორენ ბაფეტმა და ჯორჯ სოროსმა სექტემბრის დასაწყისში 20%-ზე მეტი გასცეს.

ამასთან, მასკი Musk Foundation-ის პრეზიდენტი, რომელიც, სხვა პროექტებთან ერთად, გრანტებს „კაცობრიობის კეთილდღეობისთვის უსაფრთხო ხელოვნური ინტელექტის განვითარებისთვის“ გასცემს. ამის შესახებ ფონდის ვებგვერდზე არის ნათქვამი. მაგალითად, მასკის ფონდმა გასულ წელს 100 მლნ დოლარის პრიზი დააანონსა მისთვის, ვინც ატმოსფეროდან ნახშირბადის ამოღების ტექნოლოგიას შეიმუშავებდა.

გარდა ამისა, მასკმა შარშან დაწერა, რომ 20 მლნ დოლარს ტეხასის შტატის კემერონის ოლქის სკოლებს სწირავდა. ამ ოლქში რაკეტა Space X-ის გამშვები პუნქტი მდებარეობს. იმავე წელს ილონ მასკმა გაასაჯაროვა, რომ 10 მლნ დოლარს ქალაქ ბრაუნსვილს სწირავდა.

ამასთან, შარშან მილიარდერმა Twitter-ზე დაწერა, რომ თუ გაეროს მსოფლიო სასურსათო პროგრამა ზუსტად აღწერს, როგორ გადაჭრის 6 მლრდ დოლარით მსოფლიო შიმშილის პრობლემას, ის Tesla-ს აქციებს ახლავე გაყიდდა და ამ თანხას გაიღებდა.

bpn.ge