ჟურნალ Time-ის შემდეგ, ილონ მასკი „წლის ადამიანად“ გაზეთ Financial Times-მაც (FT) დაასახელა. Tesla-ს ხელმძღვანელი გაზეთმა ელექტრომობილების ინდუსტრიის ტრანსფორმირებაში შესრულებული სამუშაოსთვის დააფასა. ინფორმაციას Reuters ავრცელებს.
FT-ის შეფასებით, Tesla, როგორც გლობალური ელექტრომობილების ლიდერი, ბევრ ახალგაზრდა მომხმარებელსა და ძველ ავტომწარმოებელს უბიძგებს, ყურადღება ელექტრო მანქანებზე გადაიტანონ.
თავის სვეტში FT-ის რედაქტორმა, რულა ხალაფმა ილონ მასკს „ინდუსტრიის რევოლუციონერი“ უწოდა, რადგან მან მოახერხა იმის დემონსტრირება, რომ ელექტრომობილებს ბენზინზე მომუშავე მანქანების ჩანაცვლება შეუძლიათ.
იმის საჩვენებლად, თუ როგორ დაიწყო ყველაფერი, გაზეთი ერთ-ერთი ინტერვიუდან ილონ მასკის ციტირებასაც ახდენს, სადაც ის ამბობს, რომ თავიდან ავტოინდუსტრიაში მას „სულელს“ უწოდებდნენ.
„დიდი ხნის განმავლობაში, ავტოინდუსტრიის დანარჩენი წარმომადგენლები მე და Tesla-ს სულელებსა და თაღლითებს გვიწოდებდნენ. გვეუბნებოდნენ, რომ ელექტრომობილების იდეა არ იმუშავებს, რომ ვერ მივაღწევდით დიაპაზონსა და შესრულებას და ეს რომც გავაკეთოთ, ელექტრომობილებს არავინ იყიდის," - იხსენებს მასკი.
ილონ მასკი მსოფლიოს უმდიდრესი ადამიანია, Tesla კი, დაახლოებით, 1 ტრლნ დოლარი ღირს, რაც ავტომწარმოებლების, Ford Motor-ისა და General Motors-ის ერთიან კაპიტალიზაციაზე მეტია. ბოლო რამდენიმე კვირის განმავლობაში მასკმა Tesla-ს 13 მლრდ დოლარის აქციები გაყიდა.
NBC-ის კომედი შოუ „Saturday Night Live"-ის მასპინძლობიდან დაწყებული, კრიპტოვალუტებსა და მემების აქციებზე თავისი ტვიტებით დამთავრებული, ილონ მასკი მედიის სათაურებში დომინირებდა და Twitter-ზე 66 მილიონზე მეტი გამომწერი დააგროვა.
bpn.ge