Tesla-ს აღმასრულებელი დირექტორი, ილონ მასკი ჟურნალ Time-ის მიერ „2021 წლის ადამიანად“ დასახელდა. Reuters-ის შეფასებით, მიმდინარე წელს მასკის „ელექტრო მანქანების კომპანია მსოფლიოში ყველაზე ძვირად ღირებული ავტომობილების მწარმოებელი გახდა, ხოლო მისმა სარაკეტო კომპანიამ, მთლიანად სამოქალაქო ეკიპაჟით, კოსმოსის კიდეს მიაღწია.“

„ეგზისტენციალური კრიზისის დაძლევის საშალებათა შექმნის, ტექნიკური ტიტანების ეპოქაში შესაძლებლობების განსახიერებისა და საზოგადოების ყველაზე გაბედული ტრანსფორმაციის განხორციელებისთვის ილონ მასკი არის TIME-ის 2021 წლის ადამიანი,“ - აცხადებს ჟურნალის მთავარი რედაქტორი, ედვარდ ფელსენტალი.

მისი თქმით, ილონ მასკის კოსმოსური თავგადასავლებიც კი „წლის პირველი ადამიანის“, ჩარლზ ლინდბერგის ხაზის პირდაპირი გაგრძელებაა, რომელიც რედაქციამ 1927 წელს დაასახელა. ლინდბერგი TIME-მა პირველ „წლის ადამიანად“ ატლანტიკის ოკეანის თავზე პირველი, ისტორიული ტრანსატლანტიკური სოლო გადაფრენის გამო დაასახელა.

ჟურნალი „წლის ადამიანად“ ირჩევს პირს, „ვინც, უკეთესად თუ უარესად, ყველაზე მეტად იმოქმედა ახალ ამბებზე ან ჩვენს ცხოვრებაზე.“

ჟურნალმა Time-მა თინეიჯერი პოპ მომღერალი, ოლივია როდრიგო „წლის გამრთობად,“ ამერიკელი ტანმოვარჯიშე, სიმონ ბაილზი „წლის სპორტსმენად,“ ხოლო ვაქცინის მეცნიერები „წლის გმირებად“ დაასახელა.

შარშან „წლის ადამიანის“ წოდება აშშ-ის ახლადარჩეულმა პრეზიდენტმა, ჯო ბაიდენმა და ვიცე-პრეზიდენტ კამალა ჰარისმა ერთობლივად მიიღეს.

Time-მა ეს ტრადიცია 1927 წლიდან შემოიღო. „წლის ადამიანის“ ტიტული Facebook-ის აღმასრულებელ დირექტორ მარკ ცუკერბერგსა და Amazon-ის დამფუძნებელ ჯეფ ბეზოსსაც აქვთ მინიჭებული.

BPN.GE