Tesla-ს ზრდადი ფინანსური მაჩვენებლების და კომპანია Hertz-ის მიერ 100 000 ელექტრომობილის შეკვეთის წყალობით, კომპანიის კაპიტალიზაციამ 1 ტრლნ. დოლარს გადააჭარბა, ხოლო მისი მფლობელი ილონ მასკი მილიარდერების ქონების დათვლის ისტორიაში ყველაზე მდიდარი ადამიანი გახდა.
ამ კვირის მანძილზე მისი ქონება 271,3 მლრდ. დოლარად შეფასდა, რაც წინა კვირასთან შედარებით 41,7 მლრდ-ით მეტია. ამის მიზეზი Tesla-ს აქციების 13%-ანი ზრდა გახდა. მასკის ქონება 300 მლრდ-ს პირველად მიუახლოვდა. თვის დასაწყისში მსოფლიოს უმდიდრეს ადამიანად Amazon-ის დამაარსებელი ჯეფ ბეზოსი დასახელდა - მისი ქონება 212 მლრდ დოლარს შეადგენდა, რაც მასკის დღევანდელ კაპიტალთან შედარებით 59, 3 მლრდ-ით ნაკლებია.
1982 წელს, როდესაც Forbes-მა მილიარდერების ქონების დათვლა დაიწყო, ამერიკაში უმდიდრესი ადამიანი სანაოსნო მაგნატი დენიელ ლიუდვიგი იყო - მისი ქონება 2 მლრდ დოლარს შეადგენდა, რაც დღევანდელ პირობებში 5,5 მლრდ დოლარს ნიშნავს.
მასკის სიმდიდრის ძირითადი წყაროა Tesla-ში 21%-ანი წილი, ის ასევე ფლობს აქციებს მის მიერ შექმნილ აეროკოსმოსურ კომპანია SpaceX-ში, რომლის კაპიტალიზაციაც 74 მლრდ დოლარად შეფასდა.
მასკის საინვესტიციო პორტფელში ვერ ნახავთ უძრავი ქონების და ფასიანი აქტივების დიდ რაოდენობას. თავისი სიმდიდრის მიუხედავად, სამხრეთ აფრიკაში დაბადებული მილიარდერი შედარებით მოკრძალებულად ცხოვრობს.
ამ დროისთვის მასკის ძირითადი საცხოვრებელი ადგილია ერთოთახიანი ბინის ზომის ასაწყობი სახლი ქალაქ ჩიკა-ბოკაში, ტექსასის შტატში, იქ, სადაც SpaceX თავის კოსმოსურ ხომალდებს აწარმოებს.
მასკის ქონებაზე შესაძლოა პოლიტიკამ იმოქმედოს - 25 ოქტომბერს მან გააკრიტიკა დემოკრატების საგადასახადო შეთავაზებები, რომლებიც მთავრობას ბიუჯეტის შევსებაში უნდა დაეხმარონ.
ახალი კანონპროექტი 100 000 მლნ. დოლარზე მეტი ქონების მფლობელების აქციებზე და ობლიგაციებზე გადასახადის გაზრდას გულისხმობს. მასკისთვის ეს განსაკუთრებით მძიმე ტვირთი იქნება, რადგანაც მისი უზარმაზარი ქონების ძირითადი ნაწილი აქციებშია დაბანდებული.
„ეს დამახასიათებელია მთავრობისთვის - ბოლოს და ბოლოს მათ ფული უთავდებათ და ისინი თქვენ დაგადგებიან“, - დაწერა მან Twitter-ში იმის შემდეგ, რაც მისი საკუთარი კაპიტალი ერთ დღეში 41 მლრდ. დოლარით გაიზარდა.
forbes
მასკი
