„პურის ფასის გაზრდამ მხოლოდ ფქვილის გაძვირების კომპენსაცია მოახდინა, ხოლო ინფლაცია, საწვავი და დისტრიბუციის ხარჯი ვერ დააკომპენსირა. კომპანია დღესდღეობით 2 წლის წინ არსებულ მარჟაზე ნაკლებს იღებს ახლა, მიუხედავად გაზრდილი ფასებისა.“ - კომპანია „იფქლის“ გენერალური დირექტორის მოადგილე ბაქარ ბაკურაძე საქართველოში პურის ბიზნესს მიმოიხილავს და აღნიშნავს, რომ ფქვილის ფასის არასტაბილურობა ამ სექტორში უმთავრესი პრობლემაა.
gbc-ის ინფორმაცით, პურის მწარმოებელი კომპანიების ხუთეულში „იფქლი“ მოწინავე ადგილს იკავებს. კომპანიის მთლიანი საქმიანობის ფინანსური ანგარიშის მიხედვით გაუნაწილებელმა მოგებამ წლის ბოლოს - 15 031 088 ლარი შეადგინა. კომპანიის დირექტორის მოადგილე კი „კომერსანტთან“ აღნიშნავს, ეს თანხა ბიზნესის გასაფართოვებლად და რეინვესტირებისთვის იხარჯება, თუმცა, თუკი ფქვილის ფასის არასტაბილურობა მოგებას მინიმუმამდე დაიყვანს, შესაძლოა პურის ფასი გაიზარდოს.
„15 მილიონი არის „იფქლის“ მოგება წლების განმავლობაში, რაც კი კომპანია არსებობს. ამ მოგების გატანა არ მოხდა, რადგან კომპანია იზრდებოდა და რეინვესტირება კეთდებოდა, ამიტომაცაა ეს გაუნაწილებელი მოგებაა და ეს არის 15 წლის ნაგროვები თანხა.
იფქლის“ წლიური მოგება დაახლოებით 3 მილიონია, ანუ კომპანიას მაქსიმუმ 10 პროცენტიანი ზრდა აქვს. ჩვენ მაქსიმალურად ვცდილობთ, რომ ჩვენი მოგების შემცირების ხარჯზე შევინარჩუნოთ პროდუქტის ფასი, როცა ფქვილი ძვირდება. თუმცა, ყველაფერს აქვს თავისი ზღვარი, ეს არის წარმოება და წარმოებას შენახვა სჭირდება. როცა მოგებას არ დებს წარმოება, ხდება ფასების კორექტირება, ჩვენ ვცდილობთ ასე არ მოხდეს, სანამ გაუსაძლისი არ გახდება მდგომარეობა. ვცდილობთ, რომ არ გავზარდოთ პურის ფასი, რადგან მომხმარებელზე ვფიქრობთ. თუ ფქვილის ფასი არ გაიზრდებოდა, პურიც არ გაძვირდებოდა და დარჩებოდა იგივე. კომპანია გაიზარდა რეინვესტირების ხარჯზე, ვაბრუნებთ ამ 15 მილიონს და განახლებას ვაკეთებთ, მაგრამ ეს არის 2000 წლის დასაწყისიდან მოყოლებული რიცხვი“ - ამბობს ბაქარ ბაკურაძე.
2018 წლის ფინანსური ანგარიშის მიხედვით პურის მწარმოებელი კომპანიების მოწინავე ხუთეული ასე გამოიყურება.
იფქლი
იფქლი დიღომი
იფქლი პირველი
იფქლი 1
ლიტვური საცხობი+
მარიამ მორგოშია