ბოლო რამდენიმე კვირის განმავლობაში, თბილისსა და ბათუმში გასაქირავებელი ბინების ფასი რეკორდულად არის გაზრდილი. ბინებზე ფასების  განსაკუთრებით მას შემდეგ გაიზარდა, რაც რუსეთში მობილიზაცია გამოცხადდა და რუსეთის უამრავი  მოქალაქე საქართველოში გადმოვიდა. მათი მხრიდან ბინების ქირაობაზე დიდი მოთხოვნის მიუხედავად, მესაკუთრეების და რეალტორების დიდი ნაწილი რუსეთის მოქალაქეებზე ბინის მიქირავებისაგან თავს იკავებს.

კომპანია „ჯეორეალთის“ დირექტორი, რეალტორთა ასოციაციის ერთ-ერთი დამფუძნებელი, მაია გამზარდია „კომერსანტთან“ ამბობს, რომ  რუსეთის მოქალაქეებთან არ თანამშრომლობს და უძრავი ქონების მესაკუთრეებსაც ამავეს ურჩევს. მისი თქმით, გარკვეული კატეგორია საერთოდ არ აქირავებს უძრავ ქონებას რუსეთის მოქალაქეებზე, რადგან პოლიტიკური შეხედულებების გარდა, მესაკუთრეებმა იციან, რომ გაქირავების შემთხვევაში არიან სრულიად დაუცველები, თუ გადააწყდნენ არაკეთილსინდისიერ გადამხდელებს.

„ჩემი კომპანია, რუსეთის მოქალაქეებთან არ თანამშრომლობს, ვინაიდან თვითონ მაქვს პირადი პრინციპული შეხედულება ამ თვალსაზრისით და შეზღუდვა დაწესებული. გარდა ჩემნაირად მოაზროვნე რეალტორებისა და აგენტებისა, ბინების გაქირავების მიმართულებით, რუსეთის მოქალაქეებთან თანამშრომლობის დიდი სურვილით უძრავი ქონების მესაკუთრეებიც არ გამოირჩევიან, ხოლო გარკვეული კატეგორია საერთოდ არ აქირავებს უძრავ ქონებას მათზე, რადგან პოლიტიკური შეხედულებები რომ გადავდოთ, მესაკუთრეებმა იციან, რომ გაქირავების შემთხვევაში არიან სრულიად დაუცველები, თუ გადააწყდნენ არაკეთილსინდისიერ გადამხდელებს. ასეთი კი შეიძლება იყოს ნებისმიერი ქვეყნის, მათ შორის რუსეთის მოქალაქეც.

ბოლო პერიოდში თითქოს უფრო მეტად არის შეზღუდვა მესაკუთრეების მხრიდან გააქირაონ ბინები, ან კომერციული ფართები რუსეთის მოქალაქეებზე, მაგრამ ზოგიერთ ადამიანს აქვს გამოუვალი სიტუაცია, მაგალითად ბინის მესაკუთრეს აქვს სესხი, ან სხვა ვალდებულება და აუცილებლად სჭირდება ბინის გაქირავება, სამწუხაროდ, ამ ეტაპზე იჯარის ყველაზე მაღალი თანხის გადამხდელები რუსეთის მოქალაქეები არიან, თუმცა მიუხედავად იმისა, რომ მათთან თანამშრომლობის დროს რისკი დიდია, ზოგიერთი ჩემი არაექსკლუზიური კლიენტი, რომელიც ამ დილემის წინაშე დგას და კონსულტაციისთვის მირეკავს, თუ ვხვდები, რომ მას მაინც აქვს გადაწყვეტილი გაქირავება, გარდა იმისა, რომ ვთავაზობ იურისტებთან ერთად ხელშეკრულების სწორად გაფორმებას, ასევე ვთავაზობ, თავის დაცვის მიზნით მოითხოვონ დამქირავებლისგან ერთი წლის ქირის ერთდროული გადახდა წინასწარ, ან მინიმუმ ექვსი თვის მაინც“, — აღნიშნავს მაია გამზარდია.

რეალტორთა ასოციაციის წარმომადგენელი განმარტავს, რომ პირველი ტალღის დროს, როდესაც უკრაინაში ომი დაიწყო, ფინანსურად უფრო მეტად გამართული რუსეთის მოქალაქეები შემოვიდნენ, ახლა კი ყველა სოციალური ფენის წარმომადგენელი ხვდება საქართველოში, გაურკვეველი გეგმებით და გაურკვეველი ფინანსებით.

„საქართველოს კანონმდებლობა არ არის სრულყოფილი და მესაკუთრის ინტერესები არ არის დაცული. აქედან გამომდინარე, ძალიან ბევრი შემთხვევა მსმენია, რომ რუსეთის მოქალაქეები, რომლებიც აფორმებდნენ გრძელვადიან ხელშეკრულებებს, არ ასრულებდნენ ხელშეკრულებით ნაკისრ ვალდებულებებს და მესაკუთრეები სამწუხაროდ საკუთარი უძრავი ქონებიდანაც კი ვეღარ უშვებდნენ მათ.

ჩვენთან თანამშრომლობაზე დაურეკავთ სხვა კომპანიის აგენტებს, ვისაც რუსეთის მოქალაქეები ჰყოლიათ, მაგრამ არ მაქვს მექანიზმი და ბერკეტი, რომ ჩემი მესაკუთრე იქნება დაცული გაქირავების შემთხვევაში, ამიტომ კატეგორიულიად არ ვმუშაობ ისეთ ადამიანებთან, რომელთა წარმომავლობა არ ვიცი, ანუ არ ვიცი რომელ ორგანიზაციაშია ჩამოსული.

იმის გამო, რომ რუსეთის მოქალაქეების უმისამართო შემოსვლა ხდება საქართველოში, ჩემი კომპანიის ყველა განცხადება მქონდა მოხსნილი სარეკლამო სივრციდან, ბუნებრივია, ამან შემოსავლებზე ძალიან ცუდად იმოქმედა, მაგრამ ვთვლი, რომ ამ ეტაპზე ეს ყველაზე სწორი გადაწყვეტილებაა, ერთდროულად დავიცვა ჩემი პირადი სახელმწიფოებრივი ინტერესები და ამასთან ერთად არ დავარღვიო რეალტორთა ეთიკის კოდექსი. ერთი რამ ფაქტია, რომ პირველი ტალღის დროს, როდესაც უკრაინაში ომი დაიწყო, ფინანსურად უფრო მეტად გამართული რუსეთის მოქალაქეები შემოვიდნენ, ახლა კი ყველა სოციალური ფენის წარმომადგენელი ხვდება საქართველოში, სრულიად მოულოდნელად მათთვისაც, გაურკვეველი გეგმებით და გაურკვეველი ფინანსებით. მათთან თანამშრომლობამ იმის გამო, რომ კანონი არ არის დახვეწილი, შესაძლოა დიდი პრობლემა შეუქმნას უძრავი ქონების მესაკუთრეებს და ვერ აარიდონ საკუთარი თავები და ოჯახები მოსალოდნელ გართულებებს. საჭიროა და აუცილებელი სადეპოზიტო გადასახადების სამართლებრივი ფორმებით დაწესება და პოლიციური გამოსახლების კანონში ცვლილებების განხორციელება, თორემ აღმოჩნდა, რომ დღეს ყველა ადამიანის საკუთრების უფლება ძალიან შეზღუდულია“, — ამბობს მაია გამზარდია.