საქართველოს ბანკის კორპორატიული სოციალური პასუხისმგებლობის ერთ-ერთი მთავარი მიმართულება განათლებაა. ბანკი უკვე მეორე წელია ანხორციელებს იდეათეკების პროექტს, რომელიც რეგიონის სკოლებში თანამედროვე და მულტიფუნქციური ბიბლიოთეკების მოწყობას და მათ მდგრადობას ისახავს მიზნად.

არაფორმალური განათლებისთვის ბანკის ფინანსური მხარდაჭერით შექმნილი სივრცეები დისტანციურ რეჟიმში ფუნქციურად მნიშვნელოვნად დაიტვირთა. რეგულაციების დაცვით, გახსნის დღიდან, სივრცეები აქტიურ ფუნქციონირებს. როგორც მოსწავლეები, ასევე პედაგოგები, კვლავ აგრძელებენ იდეათეკებში არსებული რესურსების (ინტერნეტის, კომპიუტერების, წიგნების და სხვა შემეცნებითი ხელსაწყოების) გამოყენებას. სკოლის მოსწავლეები იდეათეკებს ხშირად სტუმრობენ და სკოლის შემდეგ თავისუფალ დროსაც იქ ატარებენ. როგორც თამარ ჩხიტაური გვიყვება, რომელიც ხურვალეთის საჯარო სკოლის მერვე კლასის მოსწავლეა, კლასელები იდეათეკაში დროს სასიამოვნოდ ატარებენ.

„იდეათეკაში მე და ჩემი კლასელები ფაზლებს ვაწყობთ და საგაკვეთილო ფილმებს ვუყურებთ ხოლმე. ბოლოს მოქალაქეობის გაკვეთილზე ექვთიმე თაყაიშვილზე გვაჩვენეს ფილმი. ძალიან საინტერესო იყო და უფრო სახალისოც, ვიდრე წაკითხვით ნასწავლი. ამ სივრცეში გარემოს დაცვას და ადგილობრივ თვითმმართველობას გვასწავლიან. აქ გვიტარდება გაკვეთილები. როცა ონლაინ სწავლებაზე ვიყავით გადასული ზოგიერთი მასწავლებელი იდეათეკებიდან გვერთვებოდა და ასეთი გაკვეთილი კიდევ უფრო საინტერესო იყო“,- გვიყვება თამარი.

არაფორმალური განათლების ხელშეწყობის მიზნით საქართველოს ბანკი რეგიონში კიდევ 5 ახალი იდეათეკის გახსნას გეგმავს. ესენია: ზემო ნიქოზის საჯარო სკოლა; ამბროლაურის 1 საჯარო სკოლა; ოზურგეთის მე-4 საჯარო სკოლა; დუისის საჯარო სკოლა და ახალქალაქის მე-3 საჯარო სკოლა. ჩვენ ვკითხეთ პროექტის ერთ ერთი მონაწილე სკოლის, ზემო ნიქოზის სკოლის მოსწავლეს, თუ რაში გამოიყენებს ის იდეათეკას, რომელიც მის სკოლაში წელს გაიხსნება. საბა ლომიძე გვიყვება, რომ კლასელებთან ერთობლივი პროექტების კეთება მოენატრა და ამ სივრცეს აუცილებლად გამოიყენებს ამისთვის.

„მე-4-ე კლასში ბევრი ჯგუფური დავალებები გვქონდა, მაგრამ პანდემიის დროს ინდივიდუალურად დავიწყეთ მუშაობა. მიხარია, რომ იდეათეკებში ისევ შევძლებთ ჯგუფური დავალებების გაკეთებას. ალბათ აქ ძალიან დიდ დროს გავატარებ, რადგან გვექნება ბევრი წიგნები და კომპიუტერები, ფაზლები, გასართობები. ეკრანიც გვექნება და აქ ვუყურებთ ხოლმე ფილმებს. მიხარია, რომ შევძლებ წიგნების გამოტანასაც. ბოლოს ასტრიდ ლინდგრენის „ბულერბიელი ბავშვები“ წავიკითხეთ და ძალიან მომეწონა. ულე ჩემი საყვარელი პერსონაჟია. მინდა, მინდა ასტრიდ ლინდგრენის ბევრი წიგნი წავიკითხო“, - ამბობს საბა, რომელიც მე- 5 კლასის მოსწავლეა.

შესაძლებლობებით სავსე სივრცეებად ქცეული იდეათეკები საქართველოს მასშტაბით მოწყობა გრძელდება, რათა კიდევ უფრო მეტ მოსწავლეს ჰქონდეს შესაძლებლობა, ისარგებლოს თანამედროვე სტანდარტების მატერიალურ-ტექნიკური ბაზით, განახლებული ბიბლიოთეკითა და არაფორმალური განათლებისთვის საჭირო ყველა რესურსით.

ინფორმაციისთვის, საერთაშორისო სტანდარტების მულტიფუნქციური სასწავლო სივრცეების, იდეათეკების პროექტის განხორციელება ერთი წლის წინ საქართველოს ბანკისა და „ქართული წიგნის ინსტიტუტის“ ერთობლივი პროექტის ფარგლებში დაიწყო. პროექტის მთავარ მიზანს რეგიონების საჯარო სკოლებში განათლების ხელშეწყობა და თანამედროვე რესურსებზე წვდომის გაზრდა წარმოადგენს. პროექტის განხორციელებისას ერთერთი მთავარი აქცენტი გაკეთდა საზღვრისპირა სოფლებზე. იდეათეკები საქართველოს მასშტაბით 4 საჯარო სკოლაში, გორის მუნიციპალიტეტის სასაზღვრო სოფლების დიცის და ხურვალეთის, ქალაქ ფოთის #1 და თბილისის 146-ესაჯარო სკოლებში 2020 წელს გაიხსნა. პროექტის ფარგლებში, 2 500-მდე მოსწავლეს უკვე აქვს წვდომა და აქტიურად იყენებს საერთაშორისო სტანდარტების მულტიფუნქციურ სივრცეებს. საქართველოს ბანკი აგრძელებს იდეათეკების შექმნას, რათა მალე უფრო მეტმა ახალგაზრდამ შეძლოს განათლებისთვის საჭირო რესურსებზე წვდომა და შესაბამისად, საკუთარი პოტენციალის უკეთ ათვისება.

(R)