ამერიკული გამოცემა Washington Post-ის ინფორმაციით საქართველოში ბიზნესმენ იციკ მოშეს მკვლელობა ირანის მოქალაქე შაჰრამ პურსაფიმ დაუკვეთა. მასვე უკავშირდება 2020 წელს ეროვნული უსაფრთხოების საკითხებში შეერთებული შტატების პრეზიდენტის, დონალდ ტრამპის ყოფილი მრჩევლის ჯონ ბოლტონის მკვლელობის დაკვეთაც. ინფორმაციას ამერიკული გამოცემა კონფიდენციალურ წყაროებზე დაყრდნობით აქვეყნებს.

„დასავლელი ოფიციალური პირები ამტკიცებენ, რომ პურსაფიმ საქართველოში მცხოვრები ბიზნესმენის,  საქართველო-ისრაელის ბიზნეს-პალატის პრეზიდენტისა და „ისრაელის სახლის“ დამაარსებლის იციკ მოშეს მკვლელობა დაუკვეთა“, - წერს გამოცემა.

„ირანს აქვს საზღვარგარეთ მცხოვრებ იმ პირთა სია, რომლებიც მათი რეჟიმისთვის საშიშად მიიჩნევა. თეირანის სამიზნეები არიან: ამერიკელი, კანადელი, ბრიტანელი, თურქი და ევროპელი თანამდებობის პირები, ჟურნალისტები, რომლებიც ირანის რეჟიმს აკრიტიკებენ. ასევე, ებრაელი და ისრაელთან კავშირის მქონე მოქალაქეები.

დასავლელი თანამდებობის პირები ვარაუდობენ, რომ პურსაფიმ გასულ წელს საქართველოში მცხოვრები ბიზნესმენის, იციკ მოშეს მკვლელობა სცადა. ის წლებია სამხრეთ კავკასიის ქვეყნებსა და ისრაელს შორის ურთიერთობის გასაღრმავებლად მუშაობს,“ - ნათქვამია სტატიაში.

შაჰრამ პურსაფი ისლამური რევოლუციის გვარდიის კორპუსის (IRGC) წევრი და 2 წლის წინ ბოლტონის მკვლელობის სავარაუდო ორგანიზატორია. მან სოციალური ქსელის საშუალებით „დაავერბოვკა“ ადამიანი, რომელიც მკვლელობის მოწყობაში ეხმარებოდა. მასვე ევალებოდა ბოლტონის თვალთვალი. პურსაფის არ ჰქონდა ინფორმაცია იმის შესახებ, რომ მისი ე.წ. „თანაშემწე“ FBI-ის წევრი იყო. ინფორმატორი თვეების განმავლობაში აგროვებდა ინფორმაციას პურსაფისგან ბოლტონის მკვლელობის შესახებ. შაჰრამ პურსაფი ბოლტონის მკვლელობისთვის 300 000 დოლარს იხდიდა.

აშშ-ს მთავრობის განცხადებით ბოლტონის მკვლელობით პურსაფის ირანელი გენერლის, ყასემ სოლეიმანის მკვლელობაზე შურისძიება სურდა.

მოამზადა მაკა ბიბილაშვილმა