ხორცპროდუქტების მწარმოებელ კომპანია „იბერმითს“ ახალი მფლობელი ჰყავს. საუბარია, „ქართული ხორცის კომპანიაზე“. როგორც ცნობილია, კომპანიას ფინანსური პრობლემები 2016 წელს შეექმნა, რის გამოც აღსრულების ეროვნულმა ბიურომ „იბერმით ჰოლდინგის“ ქონება აუქციონზეც გაიტანა. თუმცა, შემდეგ აუქციონი იმ პირობით გაუქმდა, რომ კომპანია დაგროვილი ვალების ეტაპობრივად გადახდას შეძლებდა. საბოლოოდ, ნატახტრის ქარხანა ბანკების ხელში აღმოჩნდა. გასული წლის ნოემბერში კი ობიექტი „ქართული ხორცის კომპანიამ“ შეიძინა.
როგორც კომპანიის ტექნიკურმა დირექტორმა ირაკლი ადეიშვილმა „კომერსანტთან“ განაცხადა, ამჟამად კომპანია ახალ მფლობელთან ერთად ბაზარზე დასაბრუნებლად ემზადება. „ჩვენ მალე სხვა პროექტს დავიწყებთ, რომელსაც უახლოეს მომავალში გავაჟღერებთ. ახლა არსებული საწარმოების გადაკეთების პროცესში ვართ და დაახლოებით 2 კვირაში სრული სურათი გვექნება,“ - აღნიშნა ირაკლი ადეიშვილმა.
„ქართული ხორცის კომპანიამ“ მიტოვებული ქარხნის შეძენის შემდგომ რეორგანიზაციაში, ახალი ფერმების აშენებასა და საკომუნიკაციო არხების მოწესრიგებაში მილიონი ლარის ინვესტიცია განახორციელა. როგორც კომპანიის დირექტორი ალექსანდრე ქურდაძე განმარტავს, ხორცის მწარმოებელი კომპანიის შემდეგი მიზანი 100 პროცენტით ნატურალური პროდუქტის მიწოდებაა.შესაბამისად, ახალი მენჯმენტი არა მხოლოდ წარმოებაში, არამედ საქონლის გაზრდასა და გაჯანსაღებაში ჩაერთვება.
„ქარხანა, რომელიც ახლა ჩვენს მფლობელობაშია, წინა წლის ნოემბრის თვეში ბანკებისგან შევისყიდეთ. წარმოების პროცესი პანდემიის დროსაც კი არ შეჩერებულა, რადგან მოთხოვნა დიდი იყო. სამი თუ ოთხი წელი საწარმო მიტოვებული იყო, მის აღსადგენად მილიონი ლარის ინვესტიცია განხორციელდა - დავამატეთ ფერმა, რეორგანიზაცია დასჭირდა თითქმის ყველაფერს. სამომავლოდ კი ფერმერული მეურნეობის გაძლიერებას ვაპირებთ. მსხვილფეხა საქონელი, რომელსაც შევიძენთ, ნატურალური ქართული პროდუქტით გაიზრდება და ხორციც ნატურალური მიეწოდება მომხმარებელს.მთლიან ციკლზე პასუხისმგებელი ჩვენ ვიქნებით. ქარხნის შეძენისთანავე მოვიპოვეთ ყველა სახის სერთიფიკატი, შეგვიძლია ექსპორტზე გასვლაც, მაგრამ ამ ეტაპზე არ ვჩქარობთ.ხაზგასასმელია ისიც, რომ ჩვენს გეგმებზე პანდემიამაც იმოქმედა. ამჟამად „აგროჰაბთან“ ვთანამშრომლობთ, თუმცა, მოლაპარაკებები „კარფურთანაც“ თითქმის დასრულებულია,“-განმარტავს ალექსანდრე ქურდაძე.
ხორცის კომპანია „იბერმითი ბაზარზე 2010 წლიდან გააქტიურდა, მაშინ საქონლის დაკვლაზე სპეციალური რეგულაციები ამოქმედდა, რომლის მიხედვით, საქონლის დაკვლა მხოლოდ სასაკლაოზე იყო ნებადართული.კომპანიამ ხორცის მაღაზიათა ქსელი „იბერულაც გახსნა. ბაზრის სხვა მოთამაშეების მხრიდან მაშინ „იბერმითი ხორცის ბიზნესის მონოპოლისტად იყო მიჩნეული, რადგანაც კომპანიის მიერ ოპერირების დაწყებას მალევე მოყვა სხვა სასაკლაოების დახურვა.2013 წლიდან დაკვლაზე შესუსტებული კონტროლის გამო კი, კავკასიაში უმსხვილესი სასაკლაოს და სავაჭრო ქსელ იბერმითს პრობლემები შეექმნა და დაიხურა.
მარიამ მორგოშია