2021 წლის იანვარ-აპრილში საქართველოში ფულადი გზავნილების მოცულობამ $693 მილონს მიაღწია, რაც გასული წლის ანალოგიურ მაჩვენებელთან შედარებით 48%-ით მეტია. განსაკუთრებული 145%-იანი ზრდა აპრილში დაფიქსირდა. პირველ 4 თვეში საზღვარგარეთიდან გადმორიცხულმა თანხებმა 2020 წლის ჯამურ პირდაპირ უცხოურ ინვესტიციებს 12.3%-ით გადააჭარბა.  

გასულ წელს ეკონმიკაში ერთადერთი რაც გაიზარდა ფულადი გზავნილები იყო და მისმა მოცულობამ 2019 წელთან შედარებით 8.8%-ით მეტს - $1.886 მლრდ-ს მიაღწია. გარდა იმის, რომ ემიგრანტებმა უფრო მეტი თანხა გადმორიცხეს, საზღვრების ჩაკეტვის გამო გზავნილები მთლიანად გაოფიციალურდა და საკომისიოს დაზოგვის მიზნით ახლობლისთვის ნაღდი ფულის ხელზე გატანება შეუძლებელი გახდა.

აპრილში ყველაზე მეტი - $33.3 მლნ რუსეთიდან გადმოირიცხა. მეორე ადგილზე $31.7 მლნ-ით იტალია გავიდა. ხოლო მესამეზე $24.9 მლნ-ით აშშ. $21.7 მლნ-ით საბერძნეთმა მეოთხე ადგილზე გადაინაცვლა, $15.5 მლნ-ით კი ისრაელმა მეხუთე ადგილი დაიკავა. პირველი 5 ქვეყნიდან ფულადი გზავნილების მოცულობის ზრდამ აპრილში 100%-ს გადააჭარბა. მათ გარდა კიდევ 13 სახელმწიფოდან, ანუ სულ 18-დან გადმორიცხული თანხის მოცულობამ თითოეულიდან $1 მლნ-ს გადააჭარბა.

2020 წლის ვარდნასთან შედარებით 19.6%-ით გაზრდილია ექსპორტიც, რაც 2019 წლის მაჩვენებელს მხოლოდ 5.3%-ით აღემატება. მარტსა და აპრილში გაიზარდა ტურიზმიც, მაგრამ ოთხთვიანი ჯამური მაჩვენებელი გასული წლის ანალოგიურ პერიოდთან შედარებით 83%-ით, 2019 წლის იანვარ-აპრილთან შედარებით კი 89%-ით ნაკლებია.

პირდაპირი უცხოური ინვესტიციების პირველი კვარტალის შედეგები ჯერ გამოქვეყნებული არ არის, თუმცა არსებული სიტუაციიდან გამომდინარე, იანვარში სრული ლოკდაუნი იყო, რაც ნაწილობრივ თებერვალ-მარტშიც გაგრძელდა და ეკონომიკა დამატებით 4.2%-ით შემცირდა, შეიძლება იმის თქმა, რომ ზრდის, მით უფრო მნიშვნელოვანი ზრდის მოლოდინი არარეალურია.

მშპ-ის დათვლისას ფულად გზავნილებს არ ითვალისწინებენ, თუმცა რადგადნ ის მის ერთ-ერთ კომპონენტზე - მოხმარებაზე პირდაპირ აისახება, საბოლოოდ მაინც ეკონომიკის მნიშვნელოვანი ნაწილი ხდება.

განვითარებად ქვეყნებში როგორც წესი ფულადი გზავნილების წილი მშპ-ში მაღალია. 2019 წელს ყოფილი საბჭოთა ქვეყნებიდან ტაჯიკეთსა და ყირგიზეთში ემიგრანტების მიერ გადარიცხული თანხის წილი მთელს ეკონომიკაში 28%-ს აჭარბებდა, ლიეტუვასა და ესტონეთში კი 3%-ზე ნაკლები იყო. საქართველოში 2017-2019 წლებში ფულადი გზავნილების წილი ეკონომიკაში 3 პროცენტული პუნქტით 12.7%-მდე გაიზარდა. 2020 წელს მშპ 6.2%-ით შემცირდა, გზავნილები კი 8.8%-ით გაიზარდა. ტენდენცია ჯერჯერობით 2021 წელსაც გრძელდება, შესაბამისად გზავნილებზე დამოკიდებულება მკვეთრად გაიზარდა 2020 წელს და გაიზრდება 2021 წელსაც.

გიორგი ელიზბარაშვილი