„ჩრდილოეთის ნაკადი-2“-ის ამუშავების სანაცვლოდ, გერმანიამ და ამერიკამ უკრაინას წყალბადის განვითარების პროგრამა შესთავაზეს, თუმცა, რეალურად ამ კომპრომისის წარმატებისთვის საჭირო ფული არც ერთ მხარეს არ გააჩნია.
როდესაც 30 აგვისტოს ჯო ბაიდენი უკრაინელ კოლეგას ვოლოდიმირ ზელენსკის შეხვდება, სავარაუდოდ, იმ დროს რუსული გაზსადენის მშენებლობა დასრულებული იქნება. უკრაინის პრეზიდენტი შეხვედრას უფრო ადრე მოითხოვდა და აცხადებდა, რომ რუსეთი ბალტიკურ გაზსადენს პოლიტიკურ იარაღად აუცილებლად გამოიყენებდა.
კიევისთვის კი ეს წელიწადში $2 მლრდ–ის დაკარგვას ნიშნავს. მაგრამ ვაშინგტონმა და ბერლინმა ამ მოცემულობას ყურადღება არ მაქციეს და უკრაინის გაჩუმება სხვადასხვა ლამაზი დაპირებებით სცადეს.
კიევი ამ კომპრომისის საჯარო კომენტარისგან თავს იკავებს, თუმცა, სამთავრობო კულუარებში საუბრობენ ტყუილზე, რადგანაც არ სჯერათ, რომ რუსეთის თავის ვალდებულებებს შეასრულებს, დასავლეთი კი დაანონსებული ენერგეტიკული პროგრამების რეალიზებისთვის ფულს გამოძებნის.
გერმანიის კანცლერმა ანგელა მერკელმა განაცხადა, რომ „ჩრდილოეთ ნაკადი-2“ არის არა უკრაინული ტრანზიტის ჩანაცვლება, არამედ დამატებითი პროექტი. თუმცა პუტინი სულ სხვანაირად ფიქრობს - 2024 წლის შემდეგ უკრაინული ტრანზიტის გაგრძელება დიდი ეჭვის ქვეშ დგას.
კიდევ უფრო მეტ კითხვებს ბადებს აშშ-ის და გერმანიის ერთობლივი ინიციატივა, რომელიც უკრაინის წყალბადის მსხვილ მწარმოებლად ჩამოყალიბებას გულისხმობს. ამისთვის მხარეები ქმნიან მილიარდიან მწვანე ფონდს უკრაინაში მწვანე ენერგეტიკის განვითარების მიზნით, მაგრამ ამ იდეის პერსპექტივა გაურკვეველი რჩება.
გერმანული ეკონომიკის აღმოსავლეთი კომიტეტის რეგიონული დირექტორის შტეფან კეგებაინის თქმით, მილიარდიან ფონდზე საუბარი ჯერ ნაადრევია, რადგანაც ამ დროისთვის გერმანიის მთავრობამ ამ პროექტისთვის მხოლოდ 175 მლნ ევრო გამოყო. საიდან მოვა დანარჩენი ასობით მილიონი - გაუგებარია.
„სახსრების მოძიების პროცესს მინიმუმ რამდენიმე თვე დასჭირდება, თანაც არის იმის რისკიც, რომ საქმის გამარტივების მიზნით, მოხდება უკვე არსებული ფონდებისთვის სახელის შეცვლა - მაგალითად, ნახშირის სექტორის ტრანსფორმაციის ფონდის. თანაც წინ საპარლამენტო არჩევნებია და არავინ იცის, ამ საკითხზე ახალი მთავრობის მიდგომა როგორი იქნება“, - ამბობს ის.
კაგებაინის თქმით, დღეს უკვე არსებობს წყალბადის ენერგეტიკის განვითარების რამდენიმე პროექტი, თუმცა, ყველა გაჩერებულია ინვესტორების და ბრიუსელისა და ბერლინის მხრიდან გარანტიების მოლოდინში.
კეგებაინის თქმით, წყალბადის ენერგეტიკა ჯერ სუსტადაა განვითარებული, მათ შორის ტრანსპორტირების სირთულის გამო - დღევანდელი ტექნოლოგიების პირობებში მისი გადაზიდვა მხოლოდ სარკინიგზო ცისტერნებით შეიძლება, ეს კი საკმაოდ მოუხერხებელი და ძვირია.
ასევე განიხილება უკრაინული გაზსადენის მოდერნიზება წყალბადის გადაქაჩვის მიზნით, თუმცა, ამისთვის მხოლოდ საწყის ეტაპზე 1,5 მლრდ ევროა საჭირო, ხოლო სრულფასოვანი წყალბადსადენის აშენებისთვის გაცილებით უფრო დიდი თანხებია მოსაძიებელი.
უკრაინას ასეთი მოდერნიზაციისთვის ფული არა აქვს, ევროპის და ამერიკის მხრიდან დაპირებული თანხა რომელიც ჯერ არ არსებობს. ამიტომაც უკრაინა მიიჩნევს, რომ ის მოატყუეს და მისი ინტერესები რუსულ გაზზე გაცვალეს.
handelsblatt.com