აშშ-ს მთავრობის მიერ შედგენილი შიდა პროგნოზის თანახმად, აგვისტოსთვის ქვეყნაში კორონავირუსით გარდაცვლილთა რაოდენობა 135 000-ს მიაღწევს.თუმცა, ამის ფონზე ცალკეული შტატები შეზღუდვებს დასაშვებზე სწრაფად ხსნიან. მაგალითად, ჯორჯიაში და ტეხასში კინოთეატრები, რესტორნები, მაღაზიები და სილამაზის სალონები იხსნება. თეთრი სახლის რეკომენდაციების მიხედვით, შეზღუდვების მოხსნამდე ინფიცირებულთა რაოდენობა 2 კვირის მანძილზე უნდა მცირდებოდეს. თუმცა, ამ და კიდევ რამდენიმე სხვა შტატში, ეს რეკომენდაციები არ სრულდება.

ასეთი საქციელის სავარაუდო შედეგებს მთავრობის მიერ ჩატარებული შიდა კვლევა აჩვენებს. დოკუმენტი რამდენიმე გავლენიან ამერიკულ გაზეთში გამოქვეყნდა. პროგნოზის თანახმად, მაისის შუა რიცხვებიდან მოსალოდნელია ინფიცირების მკვეთრი ზრდა. 1 ივნისიდან დღიური სიკვდილიანობა რეკორდულ 3000-ს, ხოლო დაინფიცირების მაჩვენებელი - 200 000-ს მიაღწევს.

ეს მაშინ, როდესაც აპრილის ბოლო დღეებში აშშ-ში დღე-ღამეში დახლოებით 30 000 ინფიცირება და 1750 გარდაცვალება ფიქსირდებოდა.როგორც მინიმუმ აშშ-ს მთავარი ეპიდემიოლოგი ენტონი ფაუჩის დაავადების ზრდის პროგნოზი არ უკვირს. „ამ ვირუსს ადამიანიდან ადამიანზე გადადების ფენომენალური უნარი აქვს“ - მიიჩნევს ის.

ვაშინგტონის უნივერსიტეტის საპროგნოზო მოდელის თანახმად, სიკვდილიანობის ზრდა შეზღუდვების ნაადრევი მოხსნის შედეგი იქნება. ჯერ კიდევ 17აპირლს უნივერსიტეტი 1 აგვისტოსთვის 60 000 გარდაცვალებას ელოდა, თუმცა, უკვე დღეს შტატებში კორონავირუსით თითქმის 70 000 ადამიანი დაიღუპა. ამიტომაც, ახალი პროგნოზი - 135 000 დაღუპული 1 აგვისტოსთვის - სავსებით რეალური ჩანს.

რამდენიმე შტატში ეკონომიკის სასწრაფო გახსნის მოთხოვნით მიტინგები ტარდება, თუმცა, კვლევების თანახმად, ასეთ აჩქარებას მხოლოდ მცირე ნაწილი ეთანხმება.კინოთეატრების გახსნას მხარს ამერიკელთა მხოლოდ 18%, რესტორნების 26%, სილამაზის სალონების და მაღაზიების - 30% უჭერს.

წყარო:Handelsblatt:com

მოამზადა თენგიზ აბლოთიამ