ჯო ბაიდენის განცხადებამ, რომ პუტინი მკვლელია, შესაძლოა დასავლეთის ურთიერთობებს რუსეთთან დიდი ზიანი მიაყენოს. მოსკოვი აღშფოთებულია, ევროკავშირი კი მის მიმართ პოზიციის შეცვლას არ გამორიცხავს.

რუსეთის ხელისუფლებამ ბაიდენის გამონათქვამი აღმაშფოთებლად ჩათვალა და კრემლმა ამერიკასთან ურთიერთობების გადახედვის შესახებ განაცხადა. ამან და პარალელურად ამერიკის მხრიდან ახალი სანქციების შემოღების მაღალმა ალბათობამ რუსული რუბლის კურსის ვარდნა გამოიწვია, გამოცემა "Коммерсантъ"-ის ინფორმაციით კი, მოსკოვში ყველა ახალი ცივი ომის მოლოდინშია.

ყველაზე დიდ საფრთხედ აშშ-ს მიერ რუსეთისთვის დოლარის და საერთაშორისო საბანკო სისტემა Swift-თან წვდომის შესაძლო დახურვა მიიჩნევა. სახელმწიფო Внешэкономбанк-ის დირექტორმა ანდრეი კოსტინმა ეს საკითხი „ეკონომიკურ წყალბადის ბომბს“ შეადარა.

ასევე აშშ-ს შეუძლია ამერიკელ ინვესტორებს რუსულ სახელმწიფო ობლიგაციებში ინვესტიციების ჩადება აუკრძალოს. და ეს მაშინ, როდესაც ბოლო პერიოდში რუსულ ფასიან ქაღალდებს ყველაზე აქტიურად სწორედ ამერიკელი ინვესტორები ყიდულობენ, ამის მიზეზი კი მოგების მაღალი პროცენტებია.

ახალი კონფლიქტი მოსკოვს და ვაშინგტონს შორის მძიმე ტვირთად ევროკავშირსაც აწვება - გაერთიანების საგარეო საქმეთა მინისტრები რუსეთთან ურთიერთობების ახალი სტრატეგიის განხილვას აპირებენ, ხოლო ბერლინი გაზსადენ „ჩრდილოეთ ნაკადი-2“-ის წინაამღდეგ სანქციების შემოღების თავიდან არიდებას ცდილობს. როგორც ცნობილია, პროექტი თითქმის დასრულებულია, მაგრამ შესაძლოა ამერიკამ მისი დასრულება ახალი სანქციების წყალობით შეუძლებელი გახადოს.

იმ დროს, როდესაც ევროკავშირის რამდენიმე წევრი, მაგალითად პოლონეთი და ბალტიის ქვეყნები, რუსეთის მიმართ ევროკავშირის მხრიდან ბევრად უფრო ხისტი მიდგომის მომხრეა, ბერლინი კვლავაც მოსკოვთან დიალოგზე საუბრობს.

„ჩვენ გვსურს ვაწარმოოთ და ვაწარმოებთ კიდეც დიალოგს რუსეთთან. ეს  საჭიროა ისეთის საკითხების გადასაწყვეტად,  როგორიც არის უკრაინის პრობლემა, მშვიდობიანი დარეგულირება სირიაში, ირანის ბირთვული პროგრამა, და ა.შ.“ - განაცხადა გერმანიის საგარეო საქმეთა მინისტრმა ჰაიკო მაასმა.

მაგრამ ბოლო კვირების გამოცდილება, მათ შორის მოსკოვის მუქარა ევროკავშირთან ურთიერთობების გაწყვეტის მზადყოფნაზე გვიჩვენებს, რომ მოლაპარაკებას მინიმუმ 2 მხარე სჭირდება. მოსკოვი კი დიალოგის სურვილს არ ავლენს.

„დღეს მოსკოვს ბოლო შანსი ეძლევა და მან უნდა დაადასტუროს, რომ დიალოგის წარმოება და ერთობლივი პოლიტიკის გატარება მართლაც სურს“ - განაცხადა ლიტვის საგარეო საქმეთა მინისტრმა გაბრიელუს ლანდსბერგისმა.

რუსეთის საკითხებში გერმანელმა ექსპერტმა რენატა ალტმა განაცხადა, რომ ხელისუფლებამ პუტინის პოლიტიკას მეტი წინაამღდეგობა უნდა გაუწიოს და დემოკრატია საგარეო ჩარევისგან უკეთესად უნდ დაიცვას.

„შესაძლოა, ბაიდენის განცხადება გადაჭარბებული იყო, თუმცა ის დაუსაბუთებლად ვერანაირად ვერ ჩაითვლება. რაც შეეხება გერმანიას შესაბამისად,  უწყებებმა უნდა შეამოწმონ ორგანიზაციები, რომლებიც რუსეთის მხრიდან ფინანსურ დახმარებას იღებენ. გარდა ამისა, რუსული ფინანსური ნაკადები, განსაკუთრებით უძრავი ქონების შეძენის მხრივ, უფრო მკაცრად უნდა გაკონტროლდეს. ჩვენ მკაცრად უნდა დავიცვათ ჩვენი დემოკრატია და რუსეთს საკადრისი პასუხი გავცეთ“ - მიიჩნევს ექსპერტი.

წყარო: www.handelsblatt.com