ევროპაში ათასობით ადამიანი ახალ კოვიდ-შეზღუდვებს აპროტესტებს.
ბერლინში დღესაც ახსოვთ რაიხსტაგის შტურმი, როდესაც მთავრობის მიერ შემოღებული ზომების მოწინააღმდეგე 400-მა ადამიანმა პარლამენტის შენობაში შესასვლელი დაიკავეს და ნაცისტურ დროშებს აფრიალებდნენ. დღეს შესაძლოა მოვლენები უფრო მძიმედ განვითარდეს.
ამჟამად ევროპას კორონავირუსის ახალი ტალღის გარდა, როტერდამიდან ბრიუსელამდე, ვენიდან ზაგრებამდე, დაუმთავრებელი ლოკდაუნების და შეზღუდვების წინააღმდეგ პროტესტის ტალღამაც გადაუარა.
ბუნტის ქარიშხალში ერთმანეთს შეერია რელიგიური ფუნდამენტალიზმი, თავისუფლების ლიბერტარიანული აღქმა, მემარჯვენე შეთქმულებების თეორიები და ასევე უნდობლობა ექიმების და მეცნიერებისადმი.
აქამდე პროტესტების ძირითადი სცენა ნიდერლანდები იყო, სადავ არეულობა რამდენიმე დღე-ღამის მანძილზე სხვადასხვა ქალაქებში და რეგიონებში ხდებოდა. ქუჩაში დიდი აგრესიით ძირითადად ახალგაზრდები გამოდიოდნენ - ისინი მაღაზიების ვიტრინებს ამსხვრევდნენ, ამტვრევდნენ ველოსიპედებს, საჯარო დაწესებულებს ცეცხლს უკიდებდნენ, და პოლიციელებს თავს ესხმოდნენ.
როტერდამში საქმე ქუჩის ბრძოლებამდე და ავტომობილების მასობრივ დაწვამდე მივიდა. პოლიციას გამაფრთხილებელი სროლა და წყლის ჭავლის გამოყენება მოუწია.
„ვერასდროს ვერ დაუშვებ, რომ იდიოტებმა უკმაყოფილების საბაბით პოლიციის და მედიკოსების წინააღმდეგ აშკარა ძალადობა გამოიყენონ“, - განაცხადა ქვეყნის პრემიერ-მინისტრმა მარკ რიუტემ.
ბრიუსელში საპროტესტო მიტინგზე 35 000 ადამიანი გამოვიდა. თავიდან აქცია მშვიდობიანი იყო, თუმცა მოგვიანებით ის არეულობაში გადაიზარდა - დემონსტრანტები ბრიუსელის ცენტრში და ევროკავშირის კვარტალში მაღაზიების ვიტრინებს ამსხვრევდნენ, მანქანებს აზიანებდნენ, პოლიციელებს უტევდნენ.
მთავრობების მიერ მიღებული კოვიდ-შეზღუდვების წინააღმდეგობას ძირითადად მემარჯვენე პარტიები აღვივებენ.
„ეს დანაშაულებრივი საქციელია და ის სრულიად ამაზრზენია. ამას თავისუფლებასთან უკვე საერთო არაფერი აქვს“, - განაცხადა ბრიუსელში დატრიალებული არეულობის კომენტირებისას ბელგიის პრემიერ-მინისტრმა ალექსდანრ დე კრომ.
საფრანგეთში კორონავირუსული პოლიტიკით უკმაყოფილება ძალადობაში ძირითადად კოლონიებში გადადის. განსაკუთრებით მძიმე მდგომარეობაა კარიბის ზღვის კუნძულ გვადელუპაზე, სადაც 400 000 ადამიანი ცხოვრობს.
იქ საპროტესტო აქციის მონაწილეებმა ქუჩებში ბარიკადები ააშენეს და მაღაზიების ძარცვა დაიწყეს. ადგილობრივმა ხელისუფლებამ 24 საათით კომენდანტის საათი შემოიღო, მაგრამ საკუთარი ძალებით წესრიგის აღდგენა ვერ მოახერხა და რამდენიმე დღეში პარიზმა გვადელუპაზე დამატებითი ძალები გააგზავნა.
დემონსტრაციების უკან არა მხოლოდ ისეთი საკითხებია, როგორც მედიკოსების აუცილებელი აცრა ან არავაქცინირებულებისთვის რესტორნებში შესვლის აკრძალვა, არამედ სოციალური და ეკონომიკური პრობლემები.
„გვადელუპაზე დღეს ახალგაზრდობა იტანჯება, უმუშევრობა 50%-ზე მეტია და კოვიდ-შეზღუდვების წინააღმდეგ პროტესტს ესეც აღვივებს“, - განაცხადა მმართველი პარტიის დეპუტატმა ამ კუნძულიდან ოლივიე სერვამ.
ბოლო პერიოდში არც ერთ ქვეყანას ევროპაში არ მიუღია ისეთი მკაცრი ანტიკოვიდური ზომები, როგორც ავსტრიას. ამის საპასუხოდ ვენის ქუჩებში 40 000 ადამიანი გამოვიდა. დემონსტრაციის ინიციატორებს შორის იყვნენ უკიდურესი მემარჯვენეები, მასში ნეონაცისტები და საფეხბურთო ხულიგნები მონაწილეობდნენ.
თუმცა, აქციაზე ჩვეულებრივი, რიგითი ავსტრიელებიც გამოვიდნენ, რომლებმაც ნაწილობრივი ლოკდაუნი და სავალდებულო ვაქცინაცია გააპროტესტეს.
„მწვანე პასპორტების“ სისტემას იტალიელებიც აპროტესტებენ, შვეიცარიაში კი მომავალ კვირას ანტოკოვიდური ზომების გამკაცრების საკითხი რეფერენდუმით გადაწყდება.