რუსული ოპოზიციის ლიდერის მკვლელობის მცდელობამ მიზანდასახული პასუხი უნდა მიიღოს, როგორც მინიმუმ „ჩრდილოეთ ნაკადი-2“ არ უნდა ამუშავდეს.
ეს რა სახელმწიფოს მეთაურია, რომელმაც საკუთარი ცოლი ავარიის შემდეგ გერმანიაში სამკურნალოდ გერმანული ბანკის ხარჯზე აგზავნის და ამავე დროს საკუთარ ქვეშევრდომებს უფლებას აძლევს ოპოზიციის მოწამლული ლიდერი ქვეყნიდან რაც შეიძლება დიდხანს არ გამოუშვან? — აქ საუბარია ერთის მხრივ პუტინის მეუღლე ლიუდმილაზე, მეორეს მხრივ კი - ოპოზიციონერ-პოლიტიკოსზე ალექსეი ნავალნიზე.
ბოლო წლებში პოლიტიკური მკვლელობები, რომელთა კვალი მოსკოვში მიდის, სულ უფრო ხშირი გახდა. მოსკოვი, ლონდონი, ბერლინი, სოლსბერი, თუ რუსეთის ქალაქი ტომსკი, საერთაშორისო ნორმებით აკრძალული შხამები არა მხოლოდ პოლიტიკური მოწინაამღდეგეების მკვლელობისთვის გამოიყენება, არამედ იმისთვის, რომ ისინი რაც შეიძლება მძიმე ტანჯვაში მომკვდარიყვნენ. ამ მკვლელობების შემკვეთები არასდროს არ გამოვლენილან, მეტიც სავარაუდო მკვლელები ჯილდოებს იღებდნენ და ზოგჯერ დეპუტატებიც კი ხდებოდნენ.
პუტინი ურცხვად უჩვენებს დასავლეთს, რომ მოწინაამღდეგეების ლიკვიდაცია ყველგან შეუძლია, სადაც მოისურვეს და ამის უპასუხოდ დატოვება არ შეიძლება.
დიდი და რესურსებით მდიდარი ქვეყნის იზოლირება და სანქციების ქვეშ ჩაყენება მარტივი ამოცანა მართლაც არ არის, მაგრამ აღშფოთების გამოთქვა და შემდეგ ისევ რუსეთის ტყუილების მოსმენა უკვე საკმარისი არაა.
არის სანქციები, რომლებიც ტკივილს სწორ მიმართულებებზე აყენებენ. რუსეთის ძალოვანი სტრუქტურების ხელმძღვანელებს, სპეცსამსახურების გავლენიან უფროსებს და კრემლთან დაახლოებულ სხვა ადამიანებს ევროკავშირში შესვლა, მათ შვილების კი დასავლეთში სწავლება და ცხოვრება უნდა აეკრძალოს, ხოლო მათი ქონება - დაყადაღდეს. ეს ზომები არა რიგით ადამიანებს, არამედ კრემლის ლაქიებს შეეხება, იმათ, ვინც ანტიდასავლურ პროპაგანდას აწარმეობს, მაგრამ ამავე დროს ლაჟვარდოვან სანაპიროზე, რივიერაზე და ლონდონში სასახლეებს ფლობენ. მათ ასევე მალტის, კვიპროსის, და რუმინეთის პასპორტები აქვთ.
თუ მათ აეკრძალებათ დასავლეთში ჩასვლა, თუ ისინი ლუქს-კლასის ავტომობილების და იახტების გარეშე დარჩებიან, ეს მათთვის სერიოზული დარტყმა იქნება. ისინი, ვინც რუსეთში დაუღალავად შრომობენ, დაინახავენ, რომ დასავლეთი არა მოსახლეობას, არამედ კორუმპირებული მაღალჩინოსნებს ებრძვის. ისინი დაინახავენ, რომ დასავლეთი არა მხოლოდ უკბილოდ ყეფს, არამედ კრემლთან ურთიერთობაში ლოალობაზე და სიფრთხილეზე უარს ამბობს.
გერმანიას რუსეთისთვის თავისი, საშიში შხამი აქვს - გაზსადენის „ჩრდილოეთ ნაკადი-2“-ს მშენებლობა დასრულებამდე რამდენიმე მეტრში უნდა შეწყდეს. სწორედ ასეთი პროექტებით კრემლის ჩაგვრის აპარატისთვის საჭირო ფინანსებს შოულობს. რუსეთზე ენერგოდამოკიდებულების შემცირება კი დასავლეთს სანქციების გამო შურისძიებისგან უკეთესად დაიცავს.
Handelsblatt.com
თენგიზ აბლოთია
ნავალნი
