2022 წლის იანვრის სტატისტიკით, საქართველოში გზავნილების მოცულობის მიხედვით, რუსეთის ფედერაცია $22.4 მილიონით მეორე ადგილზე, კლება წინა წელთან -3%-ია, უკრაინა კი $5.5 მილიონით მეცხრე ადგილზე, კლებამ წინა წელთან -15% შეადგინა. 

როგორ აისახა ფულად გზავნილებზე რუსეთ–უკრაინის კონფლიქტი და ბოლო 2 კვირის მონაცემებით, აღნიშნული ქვეყნებიდან რამდენით შემცირდა გადმორიცხვები, ამ თემაზე „კომერსანტს“ ფულადი გზავნილების ქართული კომპანია „ინტელიექსპრესის” ბიზნესის განვითარების დეპარტამენტის ხელმძღვანელი ლევან თავართქილაძე ესაუბრა.

„რუსეთ-უკრაინის ომმა ფულად გზავნილებზეც იქონია გავლენა. გზავნილები ორივე ქვეყნიდან და ქვეყნის მიმართულებით საგრძნობლადაა შემცირებული. უკრაინის ეროვნულმა ბანკმა, ქვეყნაში შექმნილი ვითარების გამო, 23 თებერვლიდან აკრძალა უკრაინიდან ფულადი გზავნილების განხორციელება. უკრაინისთვის დღეს მნიშვნელოვანია ხელი შეუშალოს თანხების გადინებას და მაქსიმალურად მოახდინოს ფულადი სახსრების მოზიდვა. ფულადი დახმარება ასეთ კონფლიქტურ პერიოდში ერთ-ერთ გადამწყვეტ როლს ასრულებს. ამიტომ ინტელიექსპრესში, კონფლიქტის დაწყების პირველივე დღეებში, მივიღეთ გადაწყვეტილება 6 ქვეყნიდან გაგვეუქმებინა საკომისიო ფულად გზავნილებსა და საბანკო გადარიცხვებზე უკრაინის მიმართულებით. ჩვენი სისტემით საქართველოდან, დიდი ბრიტანეთიდან, საბერძნეთიდან, თურქეთიდან, იტალიიდან და კვიპროსიდან თანხა უპროცენტოდ იგზავნება.

თანხას უგზავნიან ფიზიკურ პირებსაც, თუმცა გადარიცხების დიდი წილი ასევე ხორციელდება საქველმოქმედო მიზნებით უკრაინის ეროვნული ბანკისა და უკრაინის სოციალური პოლიტიკის სამინისტროს ანგარიშებზე. რაც შეეხება რუსეთს აქაც გავლენა იქონია დაწესებულმა შეზღუდვებმა. რუსული საბანკო სისტემა გაითიშა SWIft-დან და შესაბამისად რუსულ სისტემებსა და ბანკებს შეექმნათ ანგარიშსწორების პრობლემა. აქიდან გამომდინარე მოგვიწია რუსული სისტემების სერვისის არაერთხელ შეჩერება. ამიტომ გზავნილები თითქმის განახევრდა“, — ამბობს თავართქილაძე.

ნინო თამაზაშვილი