GWP-ის შემოსავალმა 2019 წელს 145 მლნ ლარი შეადგინა საიდანაც წმინდა მოგება 35.2 მლნ ლარი იყო. ამის შესახებ დამოუკიდებელ აუდიტის დასკვნაშია ნათქვამი, რომელიც კომპანიის ფინანსური ანგარიშგების საფუძველზე მომზადდა.
2019 წლის 31 დეკემბრის მდგომარეობით GWP-ის ჯამური აქტივების მოცულობა 543 მლნ ლარს შეადგენდა, რაც 2018 წლის 31 დეკემბრის მაჩვენებელს 17.8%-ით - 82 მლნ ლარით აღემატება. აქტივების თითქმის 90% გრძელვადიანია, 10%-ზე ოდნავ მეტი მოკლევადიანი. გრძელვადიანი აქტივების უდიდესი ნაწილი მიწისქვეშა კომუნიკაციებს განეკუთვნება. წლის განმავლობაში ყველაზე მეტად - 62 მლნ-ით 432 მლნ-მდე ძირითადი საშუალებებისა და 13 მლნ-ით 22 მლნ-მდე ნაღდის ფულის მოცულობა გაიზარდა. ყველაზე მეტად 2.8 მლნ-ით 5.8 მლნ-მდე კი საინვესტიციო ქონება შემცირდა.
2019 წელს კომპანიის შემოსავალმა წყალმომარაგებიდან 124 მლნ ლარი შეადგინა, რაც 2018 წლის მაჩვენებელს 2 მლნ-ით აღემატება. შემოსავლები ბევრად უფრო სწრაფად 6 მლნ-დან 19 მლნ-მდე ელექტროენერგიის რეალიზაციიდან გაიზარდა. 0.5 მლნ-ით 1.7 მლნ-მდეა გაზრდილი სხვა შემოსავლებიც. გადასახადების, ცვეთის, სახელფასო და სხვა ხარჯების გასტუმრების შემდეგ GWP-ის წმინდა მოგებამ 2019 წელს 21%-ით 35.2 მლნ-მდე გაიზარდა.
„ჯორჯიან უოთერ ენდ ფაუერი“ („კომპანია“) 1997 წლის 25 ივნის შპს-დ დარეგისტრირდა. 2008 წელს კომპანიის 100%-იანი წილი შპს „ჯორჯიან გლობალ იუთილითიმ“ შეისყიდა, რომელიც დღეის მდგომარეობით „ბიჯეო ჯგუფის“ საკუთრებაში არსებული „ჯორჯია კაპიტალის“ მფლობელობაში იმყოფება.
GWP-ის ძირითად საქმიანობას თბილისისა და მისი შემოგარენის წყალმომარაგებაა. კომპანიის აბონენტთა რაოდენობა 0.5 მლნ-ს აღემატება, საიდანაც 480 000 ფიზიკური პირია, 30 000 - იურიდიული. 2021 წლის 1-ლი იანვრიდან გამრიცხველიანებული ფიზიკური პირებისთვის 1 კუბური მეტრი წყლის საფასური 33-დან 50 თეთრამდე გაიზარდა, ისინი ვინც სულადობრივად იხდიდნენ ტარიფი 3.89 ლარიდან 4.52 ლარამდე გაიზარდა. კოემრციული მომხმარებლებისთვის კი 1 ტონა წყლის საფასური 4.4 ლარდიდან 6.5 ლარამდე გაიზარდა.
თბილისის წყალსადენის ქსელის სიგრძე, დიამეტრით 13 მმ-დან და 1400 მმ-მდე 3000 კმ-ზე მეტია. მაგისტრალური წყასადენები თუჯის და ფოლადის მილებით არის მოწყობილი, განშტოებები კი უმეტესად ფოლადის მილებით. წყალმომარაგებისთვის ქალაქის სხვადასხვა რაიონში და სხვადასხვა ნიშნულზე, 35 ადგილზე, 86 სამარაგო რეზერვუარია განთავსებული (საერთო მოცულობით 317 000 მ3). მოსახლეობის მთავარი უკმაყოფილების საგანს გეგმიური და არაგეგმიური გათიშვები წარმოადგენს. კომპანია გათიშვებს მოძველებული ქსელითა და სარეაბილიტაციო სამუშაოების აუცილებლობით ხსნის.
წყალმომარაგებასა და საკანალიზაციო ქსელის ოპერირებასთან ერთად GWP ელექტროენერგიის გენერაციასაც ახდენს. 2019 წელს ჟინვალჰესიდან, თეთრხევიჰესიდან და ბოდორნაჰესიდან კომპანიამ 326 მლნ კვტ/სთ ელექტროენერგია აწარმოა, ქვეყნის ჯამური გენერაციის - 2.7%.