ყავის მწარმოებელმა ქართულმა კომპანიამ „ჩერი“ ფასიანი ქაღალდები გამოუშვა. „ჩერის“ თამასუქი არის საინვესტიციო პროდუქტი, წარმოადგენს ფასიან ქაღალდს, მოკლევადიან სასესხო ვალდებულებას, რომელიც შექმნილია სპეციალურად მათთვის ვისაც სურს ფულის მოკლევადიანი დაბანდება საბანკო ანაბარზე უფრო მაღალი საპროცენტო სარგებლით.
როგორც კომპანიაში „კომერსანტს“ განუცხადეს, „ჩერის“ თამასუქი არის 6-დან 10 თვემდე ვადის, არანაკლებ 5000 ლარიანი ნომინალური ღირებულების სესხი რომელსაც ღებულობს კომპანია ჩერი და იღებს ვალდებულებას დააბრუნოს. თამასუქის თანხას დაერიცხება წლიური 12%, სარგებლის ყოველთვიური გადახდით (თვეში - 1%).
„ჩერი ყიდის თამასუქს იმიტომ, რომ გადაიხადოს საბანკო ოვერდრაფტზე ნაკლები პროცენტი ანუ საშუალოდ ბანკის 6-10 თვიანი სესხი ლარში ღირს წლიური - 14%, ამ შემთხევაში კი უფრო ნაკლები გამოდის. თამასუქის მყიდველი კი მიიღებს საბანკო ანაბარზე მეტ საპროცენტო სარგებელს ანუ საშუალოდ ბანკები 6-10 თვიან ანაბარზე ლარში იხდიან მხოლოდ წლიურ 7%-ს. შესაბამისად იდეა იყო ის, რომ შედარებით ნაკლებ პროცენტში მიგვეღო თანხა, მომხმარებელს კი შედარებით მეტი სარგებელი მიეღო. მსგავსი პრაქტიკა უცხოეთშიც არსებობს.
დაინტერესება საკმაოდ დიდია, გავაფორმეთ არაერთი თამასუქი, თუმცა რაოდენობასა და ღირებულებაზე ინფორმაციის გაცემის უფლება არ მაქვს. შეიძლება ითქვს, რომ წარმატებული პროექტი აღმოჩნდა და ვაპირებთ, რომ მომავალშიც გავაგრძელოთ. აღნიშნულ თანხას ისევ წარმოების პროცესში გამოვიყენებთ, ამ ეტაპზე სხვა განსაკუთრებული გეგმები არ გვაქვს“, - განაცხადა კომპანიის წარმომადგენელმა თინათინ ლომთაძემ.
კომპანიის ინფორმაციით, თამასუქის შემთხვევაში ხდება სავალუტო რისკის დაზღვევაც ანუ იმ შემთხვევაში თუ თამასუქის თანხის დაბრუნების დღეს, გაცემის დღესთან შედარებით, ლარი აშშ დოლართან მიმართებაში 3%-ზე მეტად იქნება გაუფასურებული თამასუქის მფლობელს ასევე აუნაზღაურდება კურსთაშორის სხვაობა.
კომპანიის წარმომადგენელმა პანდემიის დროს არსებულ სიტუაციაზე და სამომავლო გეგმებზეც ისაუბრა. მისი თქმით, ყავაზე მოთხოვნა პანდემიის დროს გაზრდილი იყო, რაც შეეხება გეგმებს, საექსპორტო ქვეყნების მიმართულებით მუშაობის გაგრძელება წელს უფრო გააქტიურდება.
„პანდემიის დროს არცერთი წუთით არ შეგვიწყვიტავთ მუშაობა, პირიქით მოთხოვნა გაიზარდა და აქტიურად ვაგრძელებდით მუშაობას. მომხმარებელთა მხრიდან დაინტერესება გაიზარდა და მიტანის სერვისითაც აქტიურად სარგებლობდნენ.
გარდა ამისა, აქტიურად ვაგრძელებთ ექსპორტზე მუშაობას, გვყავს პარტნიორები აზერბაიჯანში და რუსეთში. ამ მიმართულებით აქტიურობას წელსაც გავაგრძელებთ და შესაძლოა დამატებით სხვა ქვეყნებთან პარტნიორობის შესაძლებლობაც განვიხილოთ“, -განაცხადა თინითან ლომთაძემ.
„ჩერი“ 2012 წელს დაარსდა და კომპანიის ქარხანა, რომელიც ლილოს დასახლებაში მდებარეობს, ამ ეტაპზე ყველაზე დიდი ყავის საწარმოა საქართველოში. მასში 4,5 მილიონი ლარის ინვესტიციაა განხორციელებული.
ნინო თამაზაშვილი