„ყველაზე მნიშვნელოვანი ღვინის პოპულარიზაციაში არის უშუალო დეგუსტაცია, შეთავაზება და გამოფენები, მაგრამ უნდა შევეგუოთ არსებულ რეალობას. ონლაინ მარკეტინგი ამ მხრივ ყველაზე მნიშვნელოვანია და იმედია გაამართლებს, რადგან ქართული ღვინო ახლა გამოწვევების წინაშე დგას“ - ამის შესახებ „კომერსანტს“ „თელავის ღვინის მარნის“ დამფუძნებელმა ზურაბ რამაზაშვილმა განუცხადა.

ქართული ღვინის ექსპორტის სტაბილური მატების დინამიკა 2020 წლის პირველ კვარტალში კლებით შეიცვალა, პანდემიამ ღვინის სექტორი მნიშვნელოვანი გამოწვევების წინაშე დააყენა და ექსპორტი 10 პროცენტით შემცირდა, სრულად გაჩერდა შიდა გაყიდვები. ღვინის ეროვნული სააგენტოს ინიციატივით,აქცენტი კეთდება სოციალურ ქსელებზე, ძირითადად ონლაინ მარკეტინგზე. ამერიკის შეერთებულ შტატებში მიმდინარეობს მოლაპარაკებები Wine.com- თან, კომპანიასთან რომელიც ღვინის ონლაინ გამყიდველია. გერმანიაში კი vivino-თან მიმდინარეობს კომუნიკაცია,რათა ონლაინ სივრცეში მოხდეს ქართული ღვინის კატეგორიის შექმნა.

მეღვინეები ერთხმად აცხადებენ, რომ ღვინო კომუნიკაციაზე დაფუძნებული სექტორია, თუმცა, არსებული მოცემულობის დროს მარკეტინგი და ონლაინ აქტივობები მინიმალურია რაც შეიძლება ამ ეტაპზე გაკეთდეს.

„სასურველი იქნება, რომ ყველაზე კარგი  მარკეტინგული მესიჯი შევიმუშავოთ, რითაც ქართული ღვინო ამ ახალ პლატფორმებზე ღირსეულად წარსდგება. ქვეყნის  პოტენციალი როგორ გამოჩნდება, ამას კარგი დახვეწა სჭირდება, უნდა შეიქმნას იმიჯური პროდუქტი,  რომელსაც ექნება მომხმარებლის თვალში გარკვეული  ღირებულება. ღვინო უფრო კომუნიკაციაა და ასე ონლაინ აქტივობებით რთულია შედეგის მიღება, მაგრამ უნდა შევეგუოთ ახალ რეალობას,“ - განმარტავს ზურაბ რამაზაშვილი.

წინანდლის „შუმის“ ღვინის ქარხნის დირექტორმა აკაკი ცოფურიშვილმა „კომერსანტთან“ ასევე ხაზი გაუსვა უშუალო კომუნიკაციის მნიშვნელობას ღვინის ბაზრისთვის, თუმცა მისი აზრით, ონლაინ-ცნობადობის გაზრდა ღვინის რეალიზაციის პროცესს სამომავლოდ წაადგება.

„მივესალმები მსგავს ღონისძიებებს და იმედია ქართულ ღვინოს ახლა მეტი გაიცნობს. პანდემიის გამო გართულებულია სიტუაცია, თუმცა, მომავალში, როცა პრობლემები მოიხსნება, კარგი იქნება თუ ჩამოვიყვანთ უცხოელებს, აქტიურად გავმართავთ გამოფნებსა და დეგუსტაციებს, თმცა ახლა ამას ვერავის ვერ მოვთხოვთ, რადგან მსოფლიოში სიტუაცია შეიცვალა,“-აღნიშნა აკაკი ცოფურიშვილმა.  

ღვინის ეროვნული სააგენტოს თავმჯდომარე აცხადებს, რომ ქართული ღვინო,ისევე როგორც სხვა ქვეყნების ღვინო მსოფლიო მასშტაბით დიდი გამოწვევის წინაშე დგას. ამის ერთ-ერთი მიზეზი  არის ის, რომ სასტუმროების და რესტორნების დიდი ნაწილი დაიკეტა, ხოლო ნაწილი უამრავი შეზღუდვით აგრძელებს ოპერირებას. ლევან მეხუზლა აცხადებს, რომ 2020 წელს დაგეგმილი ყველა საერთაშორისო გამოფენა გაუქმებულია, თუმცა გაუქმებული გამოფენების ხარჯზე, სააგენტო ცდილობს არსებული რესურსი სწორედ ონლაინ-კამპანიებისკენ მიმართოს.

 მარიამ მორგოშია