„საექსპორტო ბაზრებზე გაყიდვები მცირედით შემცირდა, ხოლო საქართველოს ბაზარზე მნიშვნელამდე“, ამის შესახებ კომერსანტს „თელავის ღვინის მარნის“ დამფუძნებელმა ზურაბ რამაზაშვილმა განუცხდა. მისი თქმით, გაყიდვები ახლა ინერციით მიმდინარეობს. თუმცა, ბიზნესმენი მეორე კვარტალის შედეგების მოლოდინშია. იგი ამბობს, რომ სწორედ მეორე კვარტალი იქნება ინდიკატორი იმის, თუ როგორი გაყიდვებით დასრულდება 2020 წელი.
„საქართველოში სარესტორნო და სასტუმრო ბიზნესი ჩავარდა, შესაბამისად, ტურისტული ნაკადი შემცირდა, რასაკვირველია ღვინის მოხმარებამაც იკლო. ზოგადად, მსოფლიოში გაყიდვის ძალიან დიდი კლება არ არის. რეალურ შედეგებს ჩვენ წლის მეორე ნახევარში დავინახავთ. პირველ კვარტალში გაყიდვები ჯერ კიდევ ინერციით მიდის, შეკვეთები წინასწარ იყო გამზადებული, უმეტეს შეთხვევაში თანხა წინასწარ იყო გადახდილი და ჩვენ ვალდებულები ვიყავით ღვინო გადაგვეტვირთა, შედეგები კი ახლა გამოჩნდება, საინტერესო იქნება როგორ განვითარდება მოვლენები და რას მოგვიტანს მეორე კვარტალი“ - განმარტავს ზურაბ რამაზაშვილი.
ზურაბ რამაზაშვილი ამბობს, რომ ამ დროის განმავლობაში კომპანიას მუშაობა არ გაუჩერებია, მისი თქმით, „თელავის ღვინის მარანი“ ყველა იმ წესს იცავს, რომელიც სახელმწიფომ დაადგინა. „კომერსანტთან“ ბიზნესმენი იმ პრობლემებზე საუბრობს რომელის წინაშეც ღვინის სექტორი შეიძლება დადგეს. „თელავის ღვინის მარნის“ დამფუძნებელი ამბობს, რომ თუ ვერ მოხდა სათანადო რაოდენობის ღვინის რეალიზება, ვერ დაიცლება ის ჭურჭელი, რომელმაც ახალი მოსავალი უნდა მიიღოს, შესაბამისად კომპანიებს შეიძლება ტექნიკური პრობლემაც შეექმნათ.
მისივე განმარტებით, რთველის მოცულობის გადაწყვეტილების მიღება, მეორე კვარტლის შედეგების გათვალისწინებით მოხდება. ზურაბ რამაზაშვილი მიიჩნევს, რომ სექტორს საკმაოდ რთული წელი ელოდება.ბიზნესმენი გვიყვება, რომ არსებულ პრობლემაზე მსჯელობა ღვინის სექტორთან სოფლის მეურნეობის სამინისტროსთან უკვე დაიწყო. ზურაბ რამაზაშვილი გვეუბნება, რომ სახელმწიფო მუშაობს ახალი მარკეტინგული სტრატეგიის შემუშავებაზე. მისივე თქმით, პროცესში ჩართულია როგორც ღვინის კომპანიები ასევე ღვინის ასოციაციები.
„საქართველოს მთავრობა აქამდე ძალიან ადექვატურად მუშაობდა, სწორ გადაწყვეტილებებს იღებს და ამის დასტური არის ის შედეგი, რომელიც დღეს ქვეყანას აქვს. რაც შეეხება ღვინის სექტორთან დამოკიდებულებას, უკვე დაიწყო ონლაინ შეხვედრები სოფლის მეურნეობის სამინისტროსთან და ღვინის ეროვნულ სააგენტოსთან, სადაც ჩვენ ვახმოვანებთ ყველა იმ პრობლემას, რომელიც არსებობს ან რომელიც შესაძლოა დადგეს. სახელმწიფო დაგვპირდა, რომ საკითხებზე იმუშავებს და გადაწყვეტილებებს მოგვაწვდის. შესაბამისად, დიდი იმედი მაქვს, რომ ადექვატური გადაწყვეტილებების მთელი ჯაჭვი იქნება მიღებული, რათა მაქსიმალურად ეფექტურად ჩავატაროთ ყველა ის პროცესი, რაც დაკავშირებულია მოსავლის აღებასთან და გადამუშავებასთან. ამავე დროს მუშავდება ახალი მიდგომები ღვინის მარკეტინგთან დაკავშირებით რადგან, პანდემიამ ხელი შეუშალა საერთაშორისო შეხვედრების, დეგუსტაციების და გამოფენების ჩატარებას. რამდენიმე დღის წინ ჩატარებული შეხვედრა იყო მოთელვითი, მსგავს ფორმატში თანამშრომლობა კიდევ გაგრძელდება ვიმსჯელებთ არსებულ პრობლემებზე და რაღაც პერიოდის შემდეგ სახელმწიფოს მხრიდან გაჟღერდება ის გზები და მეთოდები რომელითაც მთავრობას შეუძლია დაეხმაროს ბიზნეს“, - განაცხადა ზურაბ რამაზაშვილმა.
ბაჩო ადამია