ღვინის ბანკები საზღვარგარეთ დიდი პოპულარობით სარგებლობს, საქართელოში კი ეს სფერო ნელ-ნელა ვითარდება. ღვინის მოყვარულებს, რომლებისთვისაც დაძველებულ სასმელს განსაკუთრებული მნიშვნელობა აქვს, შეუძლიათ,  ღვინის ბანკით ისარგებლონ, რომელიც თბილისში ერეკლე II ქუჩაზე მდებარეობს. საუბარია, საცავზე, რომელიც პროექტის განმახორციელებელმა კომპანია „ჯივინომ“  (ღვინის ბარი) განახორციელა.

როგორც კომპანიის  მენეჯერმა  გურამ მაისურაძემ „კომერსანტს“ განუცხადა, ღვინის ბანკის სარგებლობის მიზანია, არსებობდეს სათანადო პირობებით აღჭურვილი საცავი, სადაც  დაინტერესების შემთხვევაში ყველა ფიზიკურ პირს  ექნება შესაძლებლობა ღვინო დააძველოს. კერძოდ, მომხმარებელს, რომელსაც სურს  ღვინის ბანკში საკუთარი ღვინო დააძველოს, „ჯივინოს“ ბარში არსებული 200 სახეობიდან ერთი ან რამდენიმე ბოთლი შეუძლია შეიძინოს. 

მისივე ინფორმაციით, ღვინის ბანკი რამდენიმე კვირის წინ გაიხსნა,  ერთდროულად   600-მდე მარნის მიერ წარმოებული ღვინის  შენახვის რესურსი აქვს. ამ დროისთვის  ღვინის ბანკში 40-მდე კომპანიის პროდუქტია წარმოდგენილი, საუბარია 150 ბოთლ ღვინოზე.როგორც წესი, მცირე მარნების ღვინოები უმეტესწილად, დაძველებული არ არის. „ბევრი მიზეზის გამო მეღვინეებს დაძველებამდე ეწურებათ მარაგები. ღვინის ბანკში კი შეგიძლიათ შეიძინოთ ახალგაზრდა ღვინო და დატოვოთ დასაძვეებლად ერთ წლამდე ვადით“-აღნიშნავს მაისურაძე. 

როგორც ღვინის ბარის „ჯივინოს“ მენეჯერი  აცხადებს,  ის ღვინოები,რომლებთანაც „ჯივინოს“ საცავში ინახება   ლიმიტირებულია.

„ჩვენთან მოსულ ნებისმიერ სტუმარს აქვს შესაძლებლობა ბარში შეძენილი ღვინო ჩვენივე ბანკში დატოვოს  დასაძველებლად, ერთი წელის ვადით და  ეს მომსახურება იქნება უფასო.   სატესტო რეჟიმში ვიმუშავებთ  ერთი წელი დავაკვირდებით რამდენად მოეწონებათ ჩვენი ინიციატივა და იმის შესაბამისად გავაგრძელებთ  მუშაობას.“-ამბობს გურამ მაისურაძე.

„ჯივინოს“ მენეჯერი განმარტავს, რომ  ღვინის ბანკი ორიენტირებულია მომსახურებაზე და არა ბიზნესზე. მათი ღვინის საცავი იმ მეღვინეებისა და მომხმარებლების მიმართ გამოხატავს პატივისცემას, რომლებიც ერთგულად სტუმრობენ. მან ასევე აღნიშნა  ღვინის ბანკის მნიშვნელობა და მომხმარებლის მხრიდან დაძველებული ღვინის მოთხოვნა, რომელიც ბოლო წლებში გაიზარდა.

„ევროპაში   ღვინის ბანკები ჩვეულებრივი მოვლენაა, ჩვენთან კი არ არის განვითარებული. მიუხედავად იმისა, რომ ტურიზმზე ვართ აქცენტირებული და ღვინის ქვეყნად ვთვლით თავს, ამ მიმართულებით ძალიან ბევრი რამ გვაქვს სასწავლი. აქამდე თუ ღვინის ბანკებზე მოთხოვნა არ ყოფილა, დღეს საკმაოდ გაზრდილია.  ჩვენც ყოველდღიურად ვითარდებით და სერვისის დახვეწაზე ვმუშაობთ.“-ამბობს მაისურაძე.

როგორც „ჯივინიში“ აცხადებენ, თუ  პროექტმა გაამართლა და ღვინის ბანკზე მოთხოვნა მკვეთრად გაიზარდა, შესაძლოა საქართველოში მეორე ღვინის ბანკიც გაიხსნას. 

ნათია ლომიძე