საქსტატის კვლევის მიხედვით საქართველოს მოსახლეობის 3.6% ანუ 133 000 ადამიანი დღიურად 2 ლარზე ნაკლებს მოიხმარდა, ანუ თვეში 60 ლარს.
საქსტატის ცნობით სქართველოში 2019 წელს ყოველი მეხუთე ადამიანი სიღარიბის ზღვარს ქვემოთ იმყოფებოდა. 10 წლის წინ ასეთი ყოველი მესამე იყო. ამ ადამიანებს საარსებო მინიმუმზეც, თვეში 187 ლარზეც კი არ მიუწვდებათ ხელი.
ექსპერტი სოციალური პოლიტიკის საკითხებში კოტე ერისთავი განმარტავს, რომ ნებისმიერი ქმედება, რაც სოციალური მდომარეობის გაუმჯობესებას ემსახურება სახელმწიფოს მხრიდან დროებითია და ეკონომიკური მოდელი რაც ქვეყანაში არსებობს სიღარიბის წარმოებას უწყობს ხელს. კრიზისის პერიოდში კი სიღარიბის მაჩვენებელი კიდევ უფრო დრამატული გახდება.
„ზოგადად სოციალური დაცვის სისტემა ჩვენს ქვეყანაში ძალიან სუსტია. ამ სისტემის ძალიან ბევრი რგოლი, რომელიც უნდა არსებობდეს, არ გვაქვს - იქნება ეს უმუშევრობის დაზღვევა, უმუშევრების შემწეობა, ადეკვატური მინიმალური ხელფასი, მოქნილი სოციალური დაცვის სისტემა განსაკუთრებით პანდემიის დროს, როდესაც ამდენი ადამიანი შემოსავლის გარეშე დარჩა. მათი ჩართვა სოციალური დაცვის სისტემებში ვერ ხდება მყისიერად იმიტომ, რომ ამისთვის არ არის გათვალისწინებული ეს სოციალური პროგრამები. ძალიან მძიმე მდგომარეობაა, სუსტი სოციალური პოლიტიკაა, სიღარიბის დაძლევაზე არაა ორიენტირებული სოციალური დაცვის სისტემა, არამედ ტკივილის გაყუჩებაზე, დახმარებებზე, რომელიც სიღარიბის დაძლევას არ ემსახურება და ღარიბები რჩებიან ღარიბებად. ეს განსაკუთრებით პანდემიის დროს დავინახეთ, სახელმწიფოს არ აღმოაჩნდა ინსტრუმენტები, რომ გაზრდილ სიღარიბესთან, უმუშევრად დარჩენლი ადამიანებისთვის შესაბამისი დახმარებები აღმოეჩინა და იძულებული გახდა ფრაგმენტული მექანიზმები გამოეყენებინა - ეს სისტემური ჩავარდნაა. ეკონომიკური მოდელი გვაქვს, რომელიც აწარმოებს სიღარიბეს, ეს არის რეალობა და მეორეს მხრივ სოციალური დაცვის სისტემა, რომელიც ვერ აზღვევს ამ წარმოებულ სიღარიბეს. ეკონომიკური მოდელი ფუნდამენტურად ხარვეზულია. ვნახეთ, რომ 2004-2007 წლებში სიღარიბე იზრდება მშპს ზრდასთან ერთად, მშპს გაზრდა თავისთავად არ გულისხმობს სიღარიბის შემცირებას, აქ მნიშვნელოვანია ეკონომიკის ტრანსფორმაცია. კატასტროფული მდგომარეობა და კრიზისის შედეგად კიდევ დამძმდება ეს მდგომარეობა,“- განმარტავს კოტე ერისთავი.
2018 წელს Unicef-მა გამოაქვეყნა წინა წლის ანგარიში, რომლის თანახმადაც საქართველოში ბავშვთა სიღარიბე გაზრდილი იყო. 77 000 ბავშვი შიმშილობდა და ყოველწლიურად შიმშილითა ან არასრულფასოვანი კვებით 300 ბავშვი იღუპებოდა.