„გუდვილი“ ყაზახეთის ბაზარზე შედის. როგორც „კომერსანტთან“ საუბრისას „გუდვილის“ ქსელის მართვის დირექტორმა ირინე ქოსაშვილმა განაცხადა, შემოდგომაზე, ყაზახეთში “გუდვილის“ ფრანჩაიზით „გუდვილი გურმე“ გაიხსნება. ყაზახურ პარტნიორ კომპანიასთან შესაბამისი ხელშეკრულება უკვე გაფორმებულია და ამ დროისათვის ობიექტის რემონტი მიმდინარეობს, რათა სავარაუდოდ ოქტომბერში „გუდვილი“ ალმატაში გაიხსნას.
„გუდვილი გურმეს“ ორი ობიექტი წარმატებულად მუშაობს თბილისში და მალე დაემატება მესამე „გუდვილი გურმე“ ბათუმში. აქ არის 60%-ი ფრეშ პროდუქტი წარმოდგენილი, ყოველდღიური მოხმარების საკვები, ჩვენივე წარმოების პროდუქცია. ყაზახეთის „გუდვილი“ იქნება 2 სართული, სადაც პირველ სართულზე საკვები პროდუქტები, ხოლო მეორე სართულზე კაფეტერია, საბავშვო ზონა, და ყველაფერი სახლისთვის განთავსდება“, - განაცხადა ირინე ქოსაშვილმა.
მისი თქმით, ალმატაში „გუდვილი გურმე“ ქალაქის ცენტრში, ცალკე დამოუკიდებელ ობიექტად იქნება წარმოდგენილი და ის მთლიანობაში 700 კვ/მ-ზე გადაიშლება.
„კომერსანტის“ კითხვაზე, რატომ გაკეთდა არჩევანი ყაზახმა პარტნიორმა „გუდვილზე“, კომპანიის ქსელის მართვის დირექტორი პასუხობს, რომ „გუდვილი“ სტაბილური ბრენდია.
„გუდვილი“ არის მართლაც უნიკალური ჰიპერმარკეტების ქსელი. „გუდვილი“ იქაც პოპულარულია, რადგანაც ყაზახეთშიც ბევრი ქართველი ცხოვრობს და საქართველოშიც ბევრი ყაზახი ტურისტი ჩამოდის, რომელიც ადგილზე ხედავს ხედავენ რომ წარმატებული ბრენდია. და როდესაც ფრანჩაიზს ირჩევს ფრანჩაიზერი მას უფრო გამოცდილი ბრენდი უნდა. „გუდვილი“ ამ ბაზარზე უკვე 20 წელია რაც ოპერირებს და ცხადია, რომ მათ ურთიერთობა სტაბილურ ბრენდთან ურჩევნიათ, ვიდრე თავად გახსნან მარკეტი და თავიდან დაიწყონ მუშაობა“, - აცხადებს ქოსაშვილი.
მისი თქმით, ბოლო პერიოდში „გუდვილის“ ფრანჩაიზზე მოთხოვნა გაჩნდა, კომპანიაში წინადადებები შემოდის.
„სტაბილური ბრენდია 20 წლიანი გამოცდილებით, ფრენჩაიზერს ვთავაზობთ დოკუმენტალურად გაწერილ და აღწერილ ყველა ინსტრუქციას ფრენჩაიზბუქის სახით“, - აცხადებს „გუდვილის“ ქსელის მართვის დირექტორი.
კომპანია „გუდვილი“ 2004 წლიდან ქართული საცალო ბაზრის ლიდერი ბრენდია. „გუდვილი“ პროდუქტის ასორტიმენტისა და რეალიზაციის ზრდასთან ერთად საკუთარ წარმოებებსაც აფართოებს. კომპანიის მენეჯერთა მთავარი ამოცანა ინოვაციების, ახალი პროდუქტების, მომხმარებელზე ორიენტირებული პროექტების, ახალი ბიზნეს იდეების შეთავაზებაა. მაღალკვალიფიციური და მოტივირებული პერსონალი მუდამ ზრუნავს მომხმარებლის კმაყოფილებაზე.
"გუდვილი" პირველი ჰიპერმარკეტების ქსელია საქართველოში, რომელიც საკუთარ მომხმარებლებს სთავაზობს კომფორტულ გარემოს, პროდუქციის ფართო არჩევანსა და ხარისხის მუდმივ კონტროლს.
"გუდვილი" გამოირჩევა საკუთარი წარმოების უგემრიელესი მზა კერძებით, ხორც-პროდუქტითა და საკონდიტრო ნაწარმით.
,,გუდვილი’’ საკვები და არასაკვები პროდუქტის ერთ-ერთი უმსხვილესი იმპორტიორია გერმანიიდან, ჰოლანდიიდან, იტალიიდან, საფრანგეთიდან, ბულგარეთიდან და უკრაინიდან. ჰყავს 300-ზე მეტი კორპორატიული კლიენტი. ასევე, მსურველებს სთავაზობს უმაღლესი ხარისხის ქეითერინგისა და სადღესასწაულო მომსახურებას.
დღეისათვის „გუდვილი“ საქართველოში 7 ფილიალითაა წარმოდგენილი და მალე მერვე ფილიალი, ბათუმში, დაემატება.