რამდენიმეთვიანი დაკეტვის შემდეგ GT Group საქმიანობას ჩვეულ რეჟიმში აგრძელებს, თუმცა ბიზნესის ბრუნვის მასშტაბი შეუმცირდა. პანდემიამდელ 2019 წელთან შედარებით, ბიზნესის ბრუნვამ 20%-ით იკლო. კომპანიის გენერალური დირექტორი ლევან გოგსაძე ფიქრობს, რომ სანამ ვაქცინაციის ტემპი არ დაჩქარდება, ეკონომიკასა და შესაბამისად ბიზნესში არსებული პრობლემების გაუმჯობესება გართულდება. ამ თვალსაზრისით, გოგსაძე მმართველ პარტიას პანდემიის პრევენციის მიზნით აქტიური საინფორმაციო კამპანიის წარმართვისკენ მოუწოდებს.

,,პანდემიური გამოწვევები არის ყველა სფეროში, ეს არ არის მარტივად დასაძლევი პრობლემა. ჩვენც შეგვეხო, ვინაიდან 2020 წელს, რამდენიმე თვის განმავლობაში დავიკეტეთ, მაგრამ ნელ-ნელა ვიკრებთ ძალებს. 2019 წელთან შედარებით, ბრუნვა 20%-ით შეგვიმცირდა. რაიმე სიახლე კომპანიის საქმიანობაში არ არის,  ინფრასტრუქტურულ პროექტებს ვახორციელებთ. ვთანამშრომლობთ როგორც ბიზნესთან, ასევე საჯარო სექტორთან. ძირითადად ისეთ პროექტებზე ვმუშაობთ, როგორიცაა გზების მშენებლობა, წყალმომარაგება, წყალარინება,  და სხვა, ფაქტობრივად ყველა ტიპის ინფრასტრუქტურულ სამუშაოებში ვართ ჩართული. ცხადია, მეტნაკლებად ყველას გვიჭირს, მაგრამ  არიან კომპანიები, რომლებიც უფრო მძიმე მდგომარეობაში ჩავარდნენ“, - ამბობს გოგსაძე ,,კომერსანტთან“ და დასძენს, რომ შექმნილ სიტუაციაში ერთადერთი გამოსავალი ვაქცინაცია და ამ მიმართულებით საინფორმაციო კამპანიის გააქტიურებაა.

,,მართალია, გარკვეული ღონისძიებები მიმდინარეობს, მაგრამ  შეიძლება საკმარისი არ იყოს, უფრო  აქტიურად უნდა ჩაერთოს ხელისუფლება, ვინაიდან გაცილებით ძვირი უჯდება სახელმწიფოს  ინფიცირებულთა მკურნალობა, ვიდრე ის სუბსიდირება, რასაც ახლა მიმართავენ. უკეთესი იქნება, აქტიური საინფორმაციო კამპანია წარიმართოს, რასაც მივესალმები.  აცრას დღეს ალტერნატივა არ აქვს“, - აცხადებს გოგსაძე.

რაც შეეხება კოვიდ ტესტირებაზე გადასახადის დაწესებას, ბიზნესმენი ფიქრობს, რომ ამ მიმართულებით სწორი ნაბიჯია გადადგმული, რამაც შეიძლება ვაქცინაციის მიმართ მოთხოვნა გაზარდოს.

კითხვაზე, გადაიხდის თუ არა  GT Group დასაქმებულთა ტესტირების საფასურს, ლევან გოგსაძე პასუხობს, რომ  არ დასჭირდებათ ხარჯის გაწევა, ვინაიდან თანამშრომლების 100% ვაქცინირებულია.

კომპანიაში 30-მდე ადამიანია დასაქმებული.

ცნობისთვის, კომპანია GT Group 17 წელია საქმიანობს საქართველოში. საქმიანობა მან 1999 წელს დაიწყო, ხოლო 2005 წელს GT Group-ის სახელით ჩამოყალიბდა. ის უკვე ჰოლდინგური ტიპის მრავალპროფილიანი კერძო კომპანიაა, სხვადასხვა სახის სავაჭრო და მომსახურების ოპერაციებით.

მარი ჩიტაია