ხის სათამაშოებზე მომუშავე მეწარმე, წალენჯიხელი დავით მოსიძე პროდუქციის გაყიდვას უკვე სპეციალური ინტერნეტ-მაღაზიის საშუალებით შეძლებს. წარმოება სულ რამდენიმე წელიწადს ითვლის, თუმცა მან მომხმარებელთა წრის გაფართოება და პოპულარობაც შეძლო, რითაც მთავრობის და წამყვანი საერთაშორისო ორგანიზაციის ყურადღებაც მიიქცია. 2015 წელს პროექტში „აწარმოე საქართველოში“ გამარჯვების შემდეგ, პრიზად 5000-ლარიანი დაფინანსება მიიღო. ამ თანხით საკუთარი საქმისთვის საჭირო ხელსაწყო-დანადგარები შეიძინა. 2020 წელს კი USAID-ის 10 000 -ლარიანი დახმარებით დურგალმა ახალი თანამედროვე კომპიუტერული დანადგარი შეიძინა, რომლის საშუალებითაც უფრო ხარისხიან სათამაშოებს ამზადებს.
სათამაშოები 100%-ით ნატურალური, ეკოლოგიურად სუფთაა, რომელიც სხვადასხვა ჯიშის ხის მერქნისგან მზადდება, რის გამოც ისინი ერთმანეთისგან განსხვავებული და ფერადოვანია. თუთის, კაკლის, ცაცხვის, წიფლის და სხვა ჯიშის მერქნისგან დამზადებული სათამაშოების წარმოებისას დავით მოსიძე არც ლაქ-საღებავებს იყენებს, ამით ხაზს უსვამს, რომ ხის მასალის მოპოვების და შემდეგ უკვე მზა პროდუქცია დამაზიანებელი არც ბუნებისთვისაა და მით უმეტეს - არც პატარებისთვის.
ნედლეულის მომარაგებისა და სათამაშოების დამზადების შემდეგ, მათ რეალიზაციას ინტერნეტის მეშვეობით ახდენს. Grandpa Dato’s toys / დათო ბაბუას სათამაშოები“, − ასე ჰქვია მის Facebook-გვერდს, რომელიც სულ ახალია და რომლის საშუალებითაც სათამაშოს შეკვეთა-შეძენა ნებისმიერ მსურველს 20-30 ლარიდან 120-140 ლარის ფარგლებში შეუძლია. სექტემბრის ბოლოს კი გაიხსნება ინტერნეტ-მაღაზია, სადაც ქართული ბრენდის შეძენას უკვე უცხოელი მომხმარებლებიც შეძლებენ.
,,წლების განმავლობაში ავეჯზე ვმუშაობდი, სოფელში რომ მომიწია დაბრუნებამ, სახელოსნო გავხსენი და მცირე შეკვეთას ვიღებდი, მერე სათამაშოებზე გადავერთე. ოსტატობის სასწავლო კურსის გაკეთებას ვგეგმავ, რათა საკუთარი ოსტატობა რაც შეიძლება მეტ ადამიანს გავუზიარო და ვასწავლო. ცოდნის ამაღლებასა და თანამედროვე ტექნოლოგიების ათვისებაში ძალიან მეხმარება. ინტერნეტ-მაღაზიაში დაახლოებით 4 ადამიანს დავასაქმებ, ახლაც გვაქვს ვაკანსია, მაგრამ სპეციალისტს ვერ ვშოულობ, კერძოდ, კომპიუტერულ ჩარხზე მომუშავე სპეციალისტი არ გვყავს, ვაპირებ საქმე 3 ახალგაზრდას შევასწავლო, რისთვისაც ტრენერს მოიწვევს, შერჩეული შეგირდებიდან ერთს ჩემთან დავასაქმებ, დანარჩენებს კი ცოდნა ექნება და დასაქმების შანსი გაუჩნდება“, - ამბობს დავით მოსიძე.
ქართველი მეწარმის შემოქმედებაში ერთ-ერთ საპატიო ადგილს იკავებს სამხედრო თემატიკაზე შექმნილი სათამაშოები - ხის მანქანა, სამხედრო ვერტმფრენი და სხვა, რასაც ტრადიციულად 26 მაისის, ასევე აფხაზეთის და სამაჩაბლოს დაცემის აღმნიშვნელ დღეებში საკუთარ Facebook-ის გვერდზე გამოფენს ხოლმე, რითაც ქართველ გმირებს მიაგებს პატივს.
Grandpa Dato’s toys / დათო ბაბუას სათამაშოები“, − ასე ჰქვია მის Facebook-გვერდს, რომლის საშუალებითაც სათამაშოს შეკვეთა-შეძენა ნებისმიერ მსურველს შეუძლია. დათო პაპა შემკვეთების ნაკლებობას არ უჩივის, რომელთა შორისაა რამდენიმე სათამაშოების მაღაზია თბილისში, ქუთაისსა და ბათუმში.
გაყიდულ სათამაშოებს ხის ყუთებში ათავსებს და ადრესატებამდე „საქართველოს ფოსტის“ მეშვეობით აგზავნის.
მარი ჩიტაია