Google-მა და Apple-მა დაბლოკეს რუსი ოპოზიციონერის აპლიკაცია „ნავალნი“, სადაც განთავსებულია პროგრამა „ჭკვიანი არჩევნები“. ეს რესურსი მოქალაქეებს საარჩევნო პროცესის გაკონტროლების შესაძლებლობას აძლევს.

ნავალნის მიერ შექმნილი და რუსეთის მთავრობის მიერ აკრძალული კორუფციასთან ბრძოლის ფონდის ყოფილი დირექტორის ივან ჟდანოვის თქმით, ინტერნეტ-გიგანტებმა ეს ნაბიჯი ახსნეს იმით, რომ რუსეთის გენერალურმა პროკურატურამ ფონდი ექსტრემისტულ ორგანიზაციად სცნო, შესაბამისად ისინი ქვეყნის კანონმდებლობას ემორჩილებიან.

აპლიკაციის დაბლოკვა 20 აგვისტოს რუსეთის კომუნიკაციების ზედამხედველობის კომისიამ მოითხოვა, უწყებამ, თავის მხრივ, მითითება გენერალური პროკურატურისგან მიიღო, რომელიც მიიჩნევს, რომ ორგანიზაცია რუსეთის კანონმდებლობას არღვევს და არჩევნებში ჩარევის შესაძლებლობას ქმნის.

თუმცა, ამის შემდეგ თვეზე მეტი აპლიკაცია Google-ის და Apple-ის ინტერნეტ-მაღაზიებში და საძიებო სისტემაში ხელმისაწვდომი იყო. Bloomberg-ის ინფორმაციით, გადამწყვეტი აღმოჩნდა კრემლის მუქარა, რომ რუსეთში IT-გიგანტების რუს თანამშრომლებს ციხეში ჩასვამდა.

ეს მუქარა შენიღბულად, მაგრამ საკაოდ ღიად, საჯაროდაც გამოითქვა - რუსეთის ფედერაციის საბჭოს საერთაშორისო ურთიერთობათა კომიტეტის თავმჯდომარემ ვლადიმერ ჯაბაროვმა განაცხადა, რომ Google-ის და Apple-ის უმოქმედობას შესაძლოა სერიოზული შედეგები მოჰყვეს, მათ შორის სისხლის სამართლის საქმეების აღძვრის ჩათვლით.

ამის თაობაზე ასევე განაცხადა რუსეთის ფედერაციის საბჭოს სახელმწიფო სუვერენიტეტის დაცვის კომისიის თავმჯდომარემ ანდრეი კლიმოვმა.

„არის საკითხები, რომლებიც დაკავშირებულია ეროვნულ უსაფრთხოებასთან. ჩვენ არ ვხუმრობთ. კანონის დარღვევამ შესაძლოა ადმინისტრაციული ან სისხლის სამართლის პასუხისმგებლობა გამოიწვიოს. კომპანიებს ეს უნდა გავაგებინოთ. ჩვენ ვისაც ვესაუბრეთ, იმათ ყველაფერი სწორად გაიგეს“, - განაცხად მან.

პარალელურად, როსკომნადზორი ინტერნეტ-გიგანტებს ბრძანებულების შეუსრულებლობის შემთხვევაში ჯარიმებით დაემუქრა.

LiveInternet-ის დამაარსებლის გერმან კლიმენკოს აზრით, Google-მა და Apple-მა აპლიკაცია დაბლოკეს ორი მიზეზის გამო - ეს მათთვის პრინციპული საკითხია, და ამავე დროს ორივე კომპანია ყველა ქვეყანაში ადგილობრივ კანონმდებლობას ემორჩილება და არა სვამს კითხვას, რამდენად სამართლიანია ესა თუ ის კანონი.

„ამავე დროს Apple ყოველთვის ცდილობს გადაწყვეტილებების მიღება მაქსიმალურად გადაწიოს მანამ, სანამ აშკარა არ გახდება რომ მეტი გადაწევა არ გამოვა. ინტერნეტ-გიგანტები სხვადასხვა ქვეყნების მთავრობებთან ათწლეულების მანძილზე თანამშრომლობენ, და ასეთი ფაქტები მათთვის რუტინაა. დარწმუნებული ვარ, რომ ეს პრეცედენტი არ აიძულებს კომპანიებს რუსეთიდან წასვლას“, - მიიჩნევს ექსპერტი.

კლიმენკოს თქმით, ერთხელ Google-ს სიჯიუტე საკმაოდ ძვირი დაუჯდა - 2010 წელს კომპანიამ თავისი ნებით დატოვა ჩინური ბაზარი, რადგანაც არ დაეთანხმა ოფიციალური პეკინის მოთხოვნას კონტენტის გაფილტვრის თაობაზე.

როგორც ჩანს, მაღალტექნოლოგიურ გიგანტებს ამ პრეცედენტის განმეორება და კიდევ ერთი მსხვილი ბაზრის, ამჯერად რუსულის დაკარგვა, არ სურთ.

rbc