„სამწუხაროდ, მოქალაქეები არ  დაგველოდნენ და  თვითნებურად ააშენეს სახლები იქ სადაც  განაშენიანების  გეგმის  მიხედვით უნდა მომხდარიყო ზონირება. რა თქმა უნდა სწორად არ მოიქცნენ,  ჩვენ ზედამხედველობის  სამსახურთან ერთად ყველანაირი  ღონისძიება  ჩავატარეთ  მსგავსი საქციელების  წინააღმდეგ, მაგრამ მაინც  თვითნებურად  მოხდა ქაოტური მშენებლობები.  თვითნებურად არის  ბოძები  ჩარჭობილი იმისათვის,  რომ მონიშნოს  სააგარაკო  ადგილები,“ - ამის შესახებ „კომერსანტს“  ოზურგეთის მუნიციპალიტეტის მერმა კონსტანტინე შარაშენიძემ განუცხადა.

გომის მთას ცოტა ხნის წინ მაღალმთიანი დასახლების სტატუსი მიენიჭა. რაც იმას ნიშნავს, რომ ტურისტულად მიმზიველი ადგილის უკანონო მშენებლობებისგან გათავისუფლებისა და მისი განაშენიანების გეგმის დამტკიცებამდე ცოტა დრო დარჩა. გეგმის დამტკიცების გაჭიანურება იწვევს იმას, რომ ზონირება ვერ ხერხდება და ინვესტორები ამ ეტაპზე თავს იკავებენ კონკრეტული პროექტების განხორციელებისგან.

აღმოფხვრის თუ არა მაღალმთიანი ზონის სტატუსის მინიჭება გომის მთაზე უკანონო მშენებლობებს და რა ტურისტულ პოტენციალს შექმნის რაჭის მოსახლეობისთვის გომის მთის ინფრასტრუქტურული მოწყობა? ოზურგეთის მუნიციპალიტეტის მერმა კონტანტინე შარაშენიძემ „კომერსანტს“ განუმარტა, რომ წლების მანძილზე პრობლემური უკანონო მშენებლობები გომის მთაზე შეჩერებულია.

„განაშენიანების გენერალურ გეგმას, რომელსაც მუნიციპალიტეტი კარგი ხანია უკვე ფლობს, კორექტირება  სჭირდება, იმიტომ რომ რაღაცეები დაემატა.  რადგან უკვე  გომის მთას სტატუსი  მიენიჭა, შეიძლება  ყველაფერი  ისე გავაკეთოთ,  როგორც  წესი და  რიგია.

ახლა  მიმდინარეობს  საკუთრებების რეგისტრაციები, რაც ამდენ ხანს არ არსებობდა იმიტომ, რომ გომის მთას სტატუსი არ ჰქონდა და  შესაბამისად  არც  საკუთრების  მოწმობები იყო.   უკანონო მშენებლობები დღეის მდგომარეობით უკვე შეჩერებულია, ხოლო აშენებულ სახლებზე პასუხისმგებლობას აიღებს ეკონომიკის სამინისტრო და საჯარო  რეესტრის  ეროვნული ბიურო.

24 მილიონიანი დაფინანსებით 23 კილომეტრის სიგრძის გზა კეთდება, რაც  მნიშვნელოვნად  გააადვილებს და  კომფორტულს  გახდის გზაზე გადაადგილებას.   საავტომობილო გზების დეპარტამენტმა  დააფინანსა  24 მილიონით რამდენიმე დღეში გამოვლინდება გამარჯვებული,“ - განმარტავს კონსტანტინე შარაშენიძე.  

გომის მთა - საკურორტო ადგილი, ოზურგეთის მუნიციპალიტეტში, ზღვის დონიდან 2100-2700 მეტრზე მდებარეობს, რომელსაც გააჩნია მინერალური წყლები, ტყე და სხვა ბუნებრივი რესურსები. გომისმთაზე ტურისტების რაოდენობა ყოველწლიურად მატულობდა, პანდემიის გამო კი სურათი შეიცვალა და ადგილობრივი ფერმერებისთვის ცალკეული ხელშეწყობის პროგრამა შეიქმნა , ესაა მცირე მეწარმეების ბაზა საიდანაც  ადგილობრივ ვიზიტორებს საქართველოდან სთავაზობენ ადგილობრივ პროდუქტებს. ოზურგეთის მერიაში აღნიშნავენ, რომ  დაინტერესება ძალიან დიდია ტურისტული კომპანიების მხრიდან, თუმცა მიმზიდველი ინფრასტრუქტურისა და მშენებლობების კანონის ჩარჩოებში მოქცევას დრო სჭირდება.

„რა თქმა უნდა,  ძალიან დიდი  პერსპექტივა  არსებობს ამ მხარეში,  დაინტერესებულია  ძალიან ბევრი  ტურისტული კომპანია  თავიანთი  პროდუქტის  რეალიზაციით.  გზის  მშენებლობების  შემდეგ  უფრო  გამოიკვეთება პოტენციალი, დამტკიცდება განაშენიანების გეგმა და გამოჩნდება ადგილი, რომელიც მეტ ტურისტს მოიზიდავს.

ეს ყველაფერი ძალიან კარგია ადგილობრივებისთვის, რადგან ისინი თავიანთ პროდუქციას უკეთებენ რეალიზაციას და ორივე- ტურისტული და აგრობიზნესიც ორივე განვითარების მაღალ საფეხურებზე ავა,“  - აღნიშნა ოზურგეთის მერმა.  

გომის მთას დაბის სტატუსი მიმდინარე წლის მაისში მიენიჭა, შემდეგ კი მაღალმთიან დასახლებად გამოცხადდა. დაბის სტატუსის არქონა არ იძლეოდა გომის მთისთვის არც მაღალმთიანი დასახლების სტატუსის და არც უკვე შემუშავებული გენგეგმის დამტკიცების შესაძლებლობას.

ამჟამად მუნიციპალიტეტი ელოდება საკრებულოსგან გენერალური გეგმის დამტკიცებას, რის შემდეგაც არსებობს ინვესტიციებისა და ტურისტული ნაკადის მოზიდვის პერსპექტივა.

მარიამ მორგოშია