7 მაისს ამერიკის ერთ-ერთი უმსხვილესი მილსადენის Colonial Pipeline -ის მმართველი კომპანია მძლავრი კიბერშეტევის მსხვერპლი გახდა, რის გამოც მისი მუშაობა დღესაც ბლოკირებულია.
ინციდენტმა საწვავით აშშ-ს აღმოსავლეთ სანაპიროს 18 შტატის მომარაგებაში შეფერხებები შეიტანა, რის გამოც ფასები ბენზინზე და დიზელზე ამერიკაში გაიზარდა.
სავარაუდოდ, შეტევის შედეგები მალე აღმოიფხვრება და ის წარსულს ჩაბარდება, თუმცა, საინვესტიციო ბანკ Goldman Sachs-ის ექსპერტთა აზრით, ეს შემთხვევა კიბერუსაფრთხოების დარგში მომუშავე კომპანიების აქციების ღირებულებაზე დადებითად აისახება.
პირველი კომპანია, რომელსაც ისინი კიბერშეტევის ბენეფიციარებს შორის ასახელებს, კალიფორნიული FireEye არის, რომელიც კიბერშეტევებისგან დამცავ პროგრამებს და აღჭურვილობას აწარმოებს. მას დღესაც ძალიან ბევრი კლიენტი ენერგეტიკის, კომუნიკაციის, ჯანდაცვის, ფინანსურ სექტორში და ასევე სახელმწიფო სტრუქტურებში ჰყავს.
FireEye-ს სპეციალისტები მილსადენზე მიტანილი იერიშის მოგერიებაშიც მონაწილეობდნენ, რის შემდეგაც, 10 მაისს, კომპანიის აქციები 4,6%-ით გაძვირდა.
დეკემბერში თავად კომპანიაც კიბერშეტევის მსხვერპლი გახდა, რომლის უკანაც, სავარაუდოდ გარკვეული სახელმწიფო იდგა - Bloomberg-ის მონაცემებით, ჰაკერების სპონსორი რუსეთი იყო.
Goldman Sachs-ის ექსპერტის კეტრინ ტრებნიკის თქმით, FireEye-ს წარმატების საწინდარია თანამედროვე მსოფლიოში კიბერშეტევის პრობლემის მუდმივი აქტუალურობა - ბოლო თვეების მანძილზე კომპანიამ რამდენიმე გახმაურებულ საქმეში მონაწილეობა მიიღო. მათ შორის რუსი ჰაკერების მიერ Solarwinds-ზე შეტევის და აშშ-ს სახელმწიფო სტრუქტურების ქსელებში შეღწევის მოგერიების ოპერაცია იყო.
უოლ-სტრიტი FireEye-ს შანსებს შედარებით მოკრძალებულად აფასებს - გამოკითხულ ანალიტიკოსთა შორის 6 მისი აქციების ყიდვის მომხრეა, 9 კლიენტებს მხოლოდ უკვე არსებული აქციათა პაკეტის შენარჩუნებას ურჩევს, ხოლო ერთი თვლის რომ FireEye-ს ფასიანი ქაღალდები უნდა გაიყიდოს.
Goldman Sachs-ში ასევე 3 კომპანია დაასახელეს, რომელთაც კიბერშეტევიდან ირიბი სარგებლის მიღება შეუძლიათ - CrowdStrike, Palo Alto Networks და Tenable Holdings.
„ამ კომპანიებს კიბერშეტევებთან დაკავშირებული გარკვეული პრობლემების გადაწყვეტისთვის აუცილებელი პროდუქტები აქვთ, და კიბერშეტევა მათზე მოთხოვნას გაზრდის“ - მიიჩნევენ ბანკის ანალიტიკოსები.
Crowdstrike-ის სპეციალიზაციაა კიბერშეტევების მოგერიება და ქსელების უსაფრთხოება. ბოლო წლებში კომპანია რამდენიმე ხმაურიანი კიბერშეტევის გამოძიებაში მონაწილეობდა - კერძოდ 2014 წელს Sony -ს ქსელის გატეხვა, და 2016 წელს შეტევა დემოკრატიული პარტიის ეროვნულ კომიტეტზე.
ექსპერტების აზრით, კომპანიის აქციები უახლოესი 2-3 წლის მანძილზე 50%-ით გაძვირდება, რადგანაც მისი ტექნოლოგიები ამ დროისთვის საუკეთესოა თავის დარგში.
შემდეგი კომპანია Goldman Sachs-ის სიაში Palo Alto Networks-ია - მისი სპეციალიზაციაა ქსელური უსაფრთხოება, ჰაკერების იდენტიფიცირება, და გატეხილი სისტემიდან მონაცემთა გაჟონვის თავიდან აცილება.
ეს ასევე ხელოვნური ინტელექტის დარგშიც წარმატებით მუშაობს. 2020 წელს Palo Alto კიბერუსაფრთხოების ბაზარზე ლიდერი გახდა, და დაყიდვების კუთხით ცნობილი ტექნოლოგიურ გიგანტს Cisco-ს გაუსწრო.
და კიდევ ერთი ბენეფიციარი - Tenable Holdings, რომელიც აპლიკაციების, ფინანსების, ჯანდაცვის, საცალო ვაჭრობის, ენერგეტიკის, და განათლების სექტორებში პროგრამული უზრუნველყოფის უსაფრთხოების დარგში მუშაობს. კომპანიას 30 000-ზე მეტი კლიენტი ჰყავს.
2021 წლის თებერვალში კომპანიის მენეჯმენტმა განაცხადა, რომ კიბერუსაფრთხოების დარგში ერთ-ერთი წარმატებული სტარტაპის Alsid-ის ყიდვას გეგმავს.
უოლ-სტრიტის ანალიტიკოსების უმრავლესობა Goldman Sachs-ის შეფასებებს იზიარებს, და მიიჩნევს, რომ კომპანიის აქციებს გაძვირების დიდი შანსი აქვს - ზრდის პოტენციალი 50%-ს შეადგენს.
თენგიზ აბლოთია
goldman sachs
