დღეს თითქმის ყველა მსხვილი საერთაშორისო კომპანია მრავალფეროვნების პრინციპის მიმდევარია - ეს არა მხოლოდ რასობრივ, რელიგიურ, კულტურულ, არამედ გენდერულ საკითხებსაც ეხება.
ქალების წილი დირექტორთა საბჭოს წევრებს შორის ყოველწლიურად იზრდება, მაგრამ ამავე დროს გენერალური დირექტორი-ქალი დღეს იშვიათი მოვლენაა - თუ დირექტორთა საბჭოების წევრთა შორის 12% ქალია, გენერალურ დირექტორთა შორის - მხოლოდ 4%.
ჟურნალ Fortune-ის სიაში შემავალ 500 უმსხვილეს ამერიკულ კომპანიას შორის, მხოლოდ 41 ხელმძღვანელობენ ქალები. მართალია, ეს ბევრი არაა, თუმცა, ზრდა სახეზეა, თუ გავითვალისწინებთ, რომ 2018 წელს ეს მაჩვენებელი 28-ს შეადგენდა.
ქალი-ბოსების რაოდენობის მხრივ ლიდერობენ ევროპული ქვეყნები - წლების მანძილზე მსოფლიოში ამ მხრივ პირველ ადგილზე შვედეთი იყო, თუმცა, 2021 წელს ის საფრანგეთმა და ნორვეგიამ ჩაანაცვლეს. შვედეთში ქალები კომპანიების 38%-ს ხელმძღვანელობენ, მაშინ, როდესაც საფრანგეთში 45%, ნორვეგიაში - 40%.
ლიდერის ცვლილება სახელმწიფი პოლიტიკის შედეგია - საფრანგეთში და ნორვეგიაში მოქმედებს კვოტების სისტემა, იგივე გზას გერმანიაც დაადგა - დირექტორთა საბჭოს წევრების შორის ყოველი 3 წევრიდან 1 ქალი უნდა იყოს.
იტალიაში დირექტორთა და სამეურვეო საბჭოების წევრთა 33%, ხოლო ავსტრიაში სახელმწიფო სტრუქტურებში ხელმძღვანელებს შორის 35% ქალი უნდა იყოს.
გენდერული სტერეოტიპების დამსხვრევას პრაქტიკული სარგებელიც მოაქვს - კონსალტინგური კომპანია McKinsey&Company-ს მონაცემებით, კომპანიებს, სადაც ხელმძღვანელთა შორის ქალების წილი 30%-ს აჭარბებს, მოგება საშუალოდ 10%-ით მეტი აქვთ.
ამას კოლუმბიის უნივერსიტეტის კვლევაც ადასტურებს - იმ ორგანიზაციებს, სადაც თუნდაც 1 ტოპ-მენეჯერი ქალია, სხვებზე 40 მლნ. დოლარით მეტი კაპიტალიზაცია აქვთ, ხოლო მათი შემოსავალი 6%-იღთ მეტია.
ანალიტიკური კომპანიის Boston Consulting Group-ის კვლების თანახმად, გენდერული მრავალფეროვნების პრინციპის გავრცელება მთელს მსოფლიოში გლობალურ მშპ-ს 12 ტრლნ. დოლარით გაზრდიდა.
თუმცა, გენდერული თანასწორობის გზაზე მიღწეულ წარმატებებს საფრთხე პანდემიამ შეუქმნა - მან ქალების კარიერული ზრდის შესაძლებლობებს დიდი დარტყმა მიაყენა. მთელს მსოფლიოში პანდემიის პირველი მსხვერპლები სწორედ ქალები არიან.
თუნდაც იმიტომ რომ ისინი მამაკაცებზე მეტად არიან დასაქმებულები ყველაზე დაზარალებულ სექტორებში - ტურიზმში, სარესტორნო და გასართობ ინდუსტრიაში. გარდა ამისა, ბაღების და სკოლების დახურვის პერიოდებში სამსახურის მიტოვება და შვილებთან სახლში ყოფნა მამაკაცებზე მეტად ქალებს უწევს.
ამ ფონზე კომპანიები ქალებს უმაღლეს პოზიციებზე სულ უფრო ნაკლებად ნიშნავენ - 2020 წელს მსხვილ კომპანიებში დირექტორი-ქალების რაოდენობამ 39% შეადგინა, ხოლო 2019 წელს - 44%.
HR-კომპანიის Heidrick & Struggles-ს მონაცემებით, მსოფლიოს უმსხვილეს 965 კომპანიაში პანდემიამდე ქალები მაღალ პოსტებს 4-ჯერ ხშირად ინიშნებოდნენ, ვიდრე 2020 წელს.
შექმნილი ვითარება შეფასდა როგორც „პირველი ქალური რეცესია“, და ის გენდერული თანასწორობის დარგში ათწლეულების მანძილზე მიღწეული პროგრესის უკან დაწევის საფრთხეს ქმნის.
ასე რომ ქალების შემდგომი კარიერა პირდაპირაა დამოკიდებული პანდემიის დროულ დამარცხებასთან.
Lenta.ru
თენგიზ აბლოთია
ბიზნესი
