Glamping Georgia ამბროლაურის რეგიონის სოფელ „კრიხში“ მდებარეობს და მომხმარებელს დასვენების განსხვავებულ ფორმატს სთავაზობს.„გლემფინგი“ გლამურული ტიპის კოტეჯს ან კარავს ნიშნავს, სადაც მაღალი სტანდარტების სასტუმროს მსგავსი კომფორტი და ველურ ბუნებაში „კემპინგი“ ერწყმის ერთმანეთს.„გლემფინგი“ საქართველოში პირველად რაჭაში, ამბროლაურის რაიონის სოფელ კრიხში 2018 წელს გამოჩნდა, ის პროფესიით ფინანსისტმა გიორგი ისაკაძემ საკუთარ მიწაზე დააფუძნა და თავდაპირველად მხოლოდ 2 კოტეჯით დაიწყო.
„ამ ეტაპზე 10 კარავი გვაქვს და ჯამში 24 ადამიანს ვმასპინძლობთ, ვამატებთ კიდევ ორ კარავს, რომლებიც მშენებლობის პროცესშია და დამატებით კიდევ 10 ადამიანის მიღება შეგვეძლება“-აცხადებს ისაკაძე.
შენობა ტენტის მსგავსი მასალით არის გადახურული, თუმცა შიგნით მომხმარებელს, სრული კომფორტი ხვდება, „გლემფინგ ჯორჯიას“ სტუმრის მიღება ოთხივე სეზონზე შეუძლია, თუმცა როგორც „კომერსანტთან“ გიორგი ისაკაძემ აღნიშნა, ზამთარში კარვის გათბობა ბიო საწვავზე მომუშავე ღუმელით ხდება, რაც ძლიერი ყინვის დროს ცოტა პრობლემურია, რადგან ბიო გამათბობელი ყინვაში სიმძლავრეს კარგავს. სოფელ კრიხში ჯერჯერობით გაზი შეყვანილი არ არის.
„ზამთარში ცოტა გვიჭირს კოტეჯების გათბობა, რადგან ჩვენთან გათბობა ბიო საწვავზე მომუშავე ღუმელით ხდება და როცა რეგიონში ძლიერი ყინვაა ღუმელი სიმძლავრეს კარგავს და მაგ მხრივ ცოტა პრობლემა ჩნდება, თუმცა, გაზის შემოყვანას ველოდებით, ჯერჯერობით კრიხის გაზიფიცირება არ მომხდარა, თუმცა ახლოს შემოიყვანეს და ჩვენთანაც ველოდებით“
გიორგი ისაკაძე, ნომერ პირველ გამოწვევად „გლემფინგის“ სივრცეში კვების ობიექტის არარსებობას ასახელებს და აცხადებს, რომ სამომავლოდ აპირებს კვების ობიექტის განთავსებას, თუმცა პანდემიამ ცოტა ხელი შეუშალა და დროებით გადადო“
„ნომერ პირველი გამოწვევა ჩვენთვის არის, კვების ობიექტი , პანდემიამ ცოტა შეგვაფერხა და იმედია წილის ბოლომდე დავასრულებთ, ჩვენი შეთავაზება საუზმესაც მოიცავს, სტანდარტული საუზმე კარავში მიგვაქვს მომხმარებლისთვის, დანარჩენს თვითონ უზრუნველყოფენ“
როგორც ისაკაძემ აღნიშნა დამსვენებელი, როგორც საქართველოდან ასევე უცხოეთიდანაც ჰყავს, თუმცა ამ ეტაპზე ჯავშანების 100 პროცენტი ქართველებისგან არის, აქტიურად დაიწყეს სიარული, რაც მისი ვარაუდით განსხვავებული გარემოში დასვენების სურვილს უკავშირდება, ასევე აღნიშნავს, რომ რაჭის რეგიონში სასტუმროების მხრივ დიდი კონკურენციაც არ არის.
„ერთერთი პირველები ვიყავით ვინც შემოწმება გაიარა და გავიხსენით, რადგან ჩვენთან განსხვავებული ფორმატია და ყველა რეკომენდაციის და წესის დაცვა ძალიან მარტივია, დახურული სივრცეები არ გვაქვს ჩვენთან ყველა კარავი ერთმანეთისგან იზოლირებულია“
ისაკაძე სამომავლოდ გაფართოებასაც აპირებს და საქართველოს სხვადასხვა რეგიონშიც სურს მსგავსი კომპლექსის განთავსება.
„გამოცხადებული გვაქვს თანამშრომლობა სხვადასხვა რეგიონთან და თუ დაინტერესებაც იქნება მზად ვართ რომ ბიზნეს ტიპის კომპლექსები გავაფართოვოთ და უფრო მაღალი დონის მომსახურეობა შევთავაზოთ დამსვენებელს“
თაკო კვაჭანტირაძე