ქვეყანაში არსებულ მძიმე ეკონომიკურ მდგომარეობაზე, ბიზნესის სფეროში შექმნილ სერიოზულ პრობლემებზე ამახვილებს ყურადღებას “ახალი საქართველოს” თავმჯდომარე, გიორგი ვაშაძე. გაერთიანებული ოპოზიციის ერთ-ერთი ლიდერი კონკრეტული შეკითხვით მიმართავს პრემინისტრს, თუ რას აპირებს მთავრობა:

“ქართული ბიზნესი ძალიან მძიმე მდგომარეობაშია, ვართ საფრთხის წინაშე, რომ ათობით ათასი სამუშაო ადგილი დაიკარგოს, განსაკუთრებით ტურიზმთან დაკავშირებულ სექტორში.

ჯერ კიდევ იანვარში, სანამ კორონავირუსი გავრცელდებოდა საქართველოში იყო ძალიან სერიოზული კრიზისი განსაკუთრებით სასტუმროებში და ტურისტული მომსახურეობის სექტორში. Booking.com-მა მაგალითად, იანვარში ჩაატარა საქართველოში შეხვედრა და აღნიშნა, რომ 35%-ით დაეცა სასტუმროების შეკვეთა თბილისსა და მთლიანად ქვეყანაში მხოლოდ იანვრის თვეში, ამას უკვე დაემატა კორონავირუსი და მისგან გამოწვეული დიდი კრიზისი, რომელიც მთელს მსოფლიოშია, მაგრამ საქართველოს ეკონომიკას, რომელიც ფაქტობრივად მხოლოდ ტურიზმზე დგას აქვს ძალიან დიდი კრიზისი დღეს. ეს არის სასტუმროს სექტორი, მომსახურების სექტორი, სადისტრიბუციო ქსელები და სხვადასხვა ტიპის ბიზნესები, რომლებიც დაკავშირებულია ტურიზმთან.

შესაბამისად, მე მაქვს მხოლოდ ერთი კითხვა, ბატონ გახარიასთან, ქვეყნის პრემიერ-მინისტრთან, რას აპირებთ? აქ სირაქლემის პოზიციაში ყოფნა არასწორია და ქართული ბიზნესის მიტოვება, რომელიც ისედაც უმძიმეს ვითარებაშია, არის დანაშაული, რადგან ქვეყანაში მთავარი პრობლემა გვაქვს სამუშაო ადგილები, მაგრამ ჩვენ თუ იმ სამუშაო ადგილებსაც დავკარგავთ, კერძო სექტორში, რომელიც გვაქვს, საშინელ მდგომარეობაში ჩავარდება მთლიანად ქვეყანა“, – განაცხადა გიორგი ვაშაძემ.

წყარო: paraleli.ge