„ხელისუფლებამ ხელები დაიბანა და გაექცა პასუხისმებლობას. მათ ხალხი და ეკლესია ერთმანეთს შეატოვეს. ორმაგი სტანდარტებით მოქმედებს ხელისუფლება, რომელიც ტელევიზიით გამოდის და მოუწოდებს ხალხს დარჩეს სახლში, მან კი არ უნდა მოუწოდოს როცა ხელისფუფლებაშია, უნდა უზრუნველყოს.   კანონის შინაარსი ეს არის და არა უბრალოდ ტელევიზიით პოზირება დღე და ღამე.“ – ამის შესახებ „ახალი საქართველოს“ ლიდერმა გიორგი ვაშაძემ განაცხადა.

ქრონიკის ეთერში დედაქალაქის მერის კახა კალაძის მოწოდებამ საზოგადოებისადმი, რომ თავი შეიკავონ ეკლესიაში თავშეყრისგან, საზოგადოების ნაწილისა და ოპოზიციური წრეების აღშფოთება გამოიწვია.  გიორგი ვაშაძე მთავრობას მოსახლეობის უსაფრთხოების დაცვისთვის არა მოწოდებების, არამედ კანონით და საგანგებო მდგომარეობის ვალდებულებებით გათვალისწინებული ზომების გამოყენებას სთხოვს და მიიჩნევს, რომ მთავრობამ იძულებით უნდა უზრუნველყოს მოსახლეობის ჯანმრთელობის დაცვა აღდგომის პერიოდში,  როდესაც ეკლესიაში თავშეყრისა და კორონავირუსის გავრცელების ყველაზე დიდი საფრთხე არსებობს.

„ ის რასაც მთავრობა პოლიტიკურად თამაშობს ეკლესიასთან კატეგორიულად მიუღებელია. მოსახლეობის თვითშეგნების იმედზე რომ იყოს სამყარო, კანონები, სამართალდამცავი ორგანოები და უზრუნველყოფის მექანიზმები კი არ იარსებებდა. როგორც ჩანს, მთავრობას  ვერ წარმოუდგენია, რომ ომის პირობებში ვიმყოფებით. როცა საგანგებო რეჟიმს აცხადებს ხელისუფლება, მას აქვს შესაბამისი ვალდებულებები და არა მარტო უფლებები - ის ვალდებულია დაიცვას თითოეული ადამიანის ჯანმრთელობა და იძულებით უზრუნველყოს ყველასთვის ერთნაირად კანონის დაცვა. ეკლესიაში თავშეყრა თურმე არ არის კანონის დარღვევა და და სკვერში მისვლა კანონდარღვევაა. ჩვენ ხომ ამხელა ვირუსს ვებრძვით. ყველაზე ცუდი ისაა, რომ ამას მე მგონი მიზანმიმართულად აკეთებენ იმიტომ, რომ მერე ეკლესიისკენ გაიშვერენ საბოლოო ჯამში ხელს.“- ამბობს ვაშაძე.