„ყველაფერი შეიძლება მოხდეს“ – გიორგი პაპაშვლის წიგნია, რომელიც ამერიკაში ბესთსელერად იქცა. 1952 წელს ჰოლივუდში ამავე სახელწოდების ფილმი გადაიღეს, რომელიც „ოქროს გლობუსით“ დაჯილდოვდა.
გიორგი პაპაშვილი 1898 წელს სოფელ კობიაანთკარში დაიბადა. ამერიკაში ჩასვლამდე I მსოფლიო ომის დროს სნაიპერი იყო, შემდეგ მენშევიკებთან ერთად კონსტანტინოპოლში აღმოჩნდა, ვიზის შოვნა მოახერხა და ამერიკაში ჩავიდა. კალიფორნიაში მუშაობდა ჭურჭლის მრეცხავად, მზარეულად, ლითონჩამომსხმელ საამქროში მუშად და ერთხანს ჰოლივუდშიც მოღვაწეობდა.
თხუთმეტწლიანი ხეტიალის შემდეგ, გიორგი პაპაშვილმა ცოლად ამერიკელი მწერალი ქალი ჰელენ უაიტი შეირთო. წყვილმა ჰელენის მზითევით პენსილვანიის შტატში პატარა ფერმა იყიდა.
1938 წელს გიორგი პაპაშვილმა და ჰელენ უაიტმა დაწერეს რომანი, უფრო ზუსტად, ავტობიოგრაფიული ნოველების კრებული „ყველაფერი შეიძლება მოხდეს (Anything Can Happen). წიგნი 1945 წელს გამოიცა და ნამდვილ ლიტერატურულ სენსაციად იქცა – მთელ მსოფლიოში 1.5 მილიონი ეგზემპლარი გაიყიდა და დაახლოებით 20 ენაზე (მათ შორის იაპონურად, ჩინურად და ურდუს ენაზე) ითარგმნა. წიგნი თბილისში 1965 წელს გამოქვეყნდა სათაურით „ქვეყანა, სადაც ყველაფერი შეიძლება მოხდეს“.
1952 წელს გიორგი პაპაშვილის წიგნის მიხედვით ჰოლივუდში ამავე სახელწოდების ფილმი (რეჟისორი ჯორჯ სითონი) გადაიღეს, სადაც მთავარი როლები ჰოლივუდის ვარსკვლავებმა – ხოსე ფარერიმ და კიმ ჰანტერმა ითამაშეს. ფილმის ტექნიკური დირექტორი ლადო ბაბიშვილი იყო. ფილმის მუსიკა კომპოზიტორმა იუნგიმ და ალექსანდრე ფუტკარაძემ შექმნეს. ფილმში გამოყენებულია ქართული სიმღერები, მელოდიები და ცეკვები. თვითონ ავტორმა პატარა ეპიზოდური როლი შეასრულა. ფილმის პრემიერა 1952 წლის 3 აპრილს შედგა.
1953 წლის 26 თებერვალს კალიფორნიის შტატში, ლოს-ანჯელესის კინოფესტივალზე ფილმმა ოქროს გლობუსი“ აიღო ნომინაციაში „საუკეთესო ფილმი, რომელიც ხელს უწყობს საერთაშორისო თანხმობას“.
მოგვიანებით გიორგი პაპაშვილი ქანდაკებით დაინტერესდა, მუშაობდა ხეზე და ქვაზე, სულ 600-ზე მეტი ნამუშევარი შექმნა. 1979 წელს პენსილვანიაში გამოიცა მისი სკულპტურული ნამუშევრების ალბომი. საქართველოს ხელოვნების სახელმწიფო მუზეუმში დაცულია მისი ერთ-ერთი ნამუშევარი – „რაში.
გიორგი პაპაშვილის სახელი შეტანილია ისეთ სოლიდურ გამოცემებში როგორებიცაა „ვინ ვინ არის ამერიკულ ხელოვნებაში და „ვინ ვინ არის XX საუკუნის ამერიკულ ლიტერატურაში. მისი არქივი დაცულია პენსილვანიის შტატის ლიჰაის უნივერსიტეტის ბიბლიოთეკაში. 1961 წელს გიორგი პაპაშვილი მეუღლესთან ერთად საქართველოს ეწვია, მოინახულა ახლობლები და შეხვდა ქართველ მწერლებს.
გიორგი პაპაშვილი 1978 წელს 80 წლის ასაკში კემბრიაში (კალიფორნია) გარდაიცვალა, შთამომავლობა არ დარჩენია.