ჩვენ არც ისე შორს ვდგავართ წამლისა და ვაქცინისგან, - ამის შესახებ „იმედის დილაში“ ჩართვისას მიუნხენის უნივერსიტეტის მედიცინის მეცნიერებათა დოქტორმა, მიუნხენის ერთ-ერთი კლინიკის უფროსმა ქირურგმა, პროფესორმა გიორგი გრიგოლიამ განაცხადა.

მისივე თქმით, ვაქცინის შესაქმენლად ტუბინგენის უნივერსიტეტში ერთ-ერთი მეცნიერი აქტიურად მუშაობს და სავარაუდოდ, ვაქცინა სექტემბრისთვის იქნება.

„ჩვენ არც ისე შორს ვდგავართ წამლისა და ვაქცინისგან, ალბათ არა უმეტეს რამდენიმე თვე გვაშორებს. შეიძლება კვირებიც. ვაქცინასთან დაკავშირებით შემდეგი მოსაზრებაა: კურავაქიე, ტუბინგენში ძალიან ინტენსიურად მოღვაწეობს ვაქცინის შესაქმნელად. რობერტ კოხის ინსტიტუტის მიერ მოწოდებული პირველადი ინფორმაციით, სავარაუდოდ, სექტემბრის თვეში იქნება. თუმცა, შეიძლება გაცილებით ადრე იყოს“, - დასძინა გიორგი გრიგოლიამ.

ამასთან, კორონავირუსის გამოწვევებზე საუბრისას მიუნხენში მოღვაწე ქართველი პროფესორი მედპერსონალის კარანტინის რეჟიმში ყოფნის აუცილებლობის საკითხსაც შეეხო.

„მედპერსონალი ნებსით თუ უნებლიეთ შეიძლება აღმოჩნდეს დაავადების გამავრცელებელი, ან თავად დაავადებული. მიმაჩნია, რომ მედპერსონალი კარანტინის სიტუაციაში უნდა გადავიდეს და ორი კვირის განმავლობაში ცხოვრობდეს ან საავადმყოფოს შენობაში ან საავადმყოფოს მიმდებარე ტერიტორიაზე. ბრიგადა, რომელიც ორი კვირის განმავლობაში იმუშავებს, ის ბრიგადაც უნდა დაიყოს დღის და საღამოს მონაკვეთებად და უნდა არსებობდეს ბრიგადა, რომელიც ორი კვირის შემდეგ შეცვლის ამ პირველ პრიგადას“, - განაცხადა გრიგოლიამ.

21 მარტს საქართველოში საგანგებო მდგომარეობა ამოქმედდა. კორონავირუსი ქვეყანაში უკვე 75 ადამიანს დაუდასტურდა. ამ დროისთვის კლინიკებიდან 10 პაციენტი გაეწერა . ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

imedinews.ge