ხელვაჩაურის უნიკალურობა მდგომარეობს იმაში, რომ აქ ერთ დონეზეა განვითარებული სოფლის მეურნეობა და ინდუსტრიული ეკონომიკა, ტურიზმიც და აქ ბევრი შესაძლებლობა აქვთ ადამიანებს, - ამის შესახებ საქართველოს პრემიერ-მინისტრმა გიორგი გახარიამ ხელვაჩაურში, ხულოს, შუახევის, ქედისა და ხელვაჩაურის მაჟორიტარი დეპუტატობის კანდიდატის ანზორ ბოლქვაძისა და შუახევის, ქედის და ხელვაჩაურის უმაღლესი საბჭოს მაჟორიტარი დეპუტატობის კანდიდატის ფრიდონ ფუტკარაძის წარდგენისას განაცხადა.
მთავრობის მეთაურის თქმით, სახელმწიფოს ძირითადი მოვალეობაა, რომ ადამიანებს, რომლებსაც არ ეზარებათ შრომა, შეუქმნას ყველა პირობა, რათა ღირსეულად იშრომონ და არჩინონ საკუთარი ოჯახები.
„სწორედ, ამიტომ შექმნა სახელმწიფომ სხვადასხვა მიმართულებით, რაც მე ახლა ჩამოვთვალე, სპეციალური პროგრამები, თითოეული მოქალაქისთვის - გლეხისთვის, რომ გახდეს ძლიერი ფერმერი, ის, ვინც ინდუსტრიაში მუშაობს, რომ დაიწყოს თავისი ბიზნესი და შექმნას საწარმო. ვინც ტურიზმის მიმართულებით არჩია შრომა, მას შევუქმნათ ყველანაირი პირობა, რომ შექმნას ტურისტული საწარმო“,- აღნიშნა პრემიერმა.
მისივე თქმით, შიდა ტურიზმის შედეგებს დღეს ბათუმში, ხელვაჩაურში, ქედაში და ყველგან ვხედავთ.