ვირუსის გამოჩენიდან დაახლოებით 7-8 თვე გავიდა და ეს გამოწვევა იმდენად გლობალურია, რომ მსოფლიოში, ჯერ-ჯერობით, პირბადის, დისტანციისა და ჰიგიენის დაცვის ელემენტარული წესების გარდა, სხვა, უფრო ქმედითი, ეფექტური ინსტრუმენტი ვირუსთან გამკლავების, ვერავინ ვერ მოიგონა და ვერ შემოგვთავაზა, - ამის შესახებ საქართველოს პრემიერ-მინისტრმა გიორგი გახარიამ, უწყებათაშორისი საკოორდინაციო საბჭოს დასრულების შემდეგ, მთავრობის ადმინისტრაციაში გამართულ ბრიფინგზე განაცხადა. ინფორმაციას მთავრობის ადმინისტრაციის პრესსამსახური ავრცელებს.

გიორგი გახარიამ მთავრობის მიდგომაზე ისაუბრა და აღნიშნა, რომ მიდგომა თავიდანვე იყო დეკლარირებული და თანმიმდევრული.

„ჩვენ ყოველთვის ვამბობდით, რომ პირველი ეტაპის შემდეგ, რომელიც იყო შეკავების და რომელსაც თავისი მიზანი ჰქონდა, ამ მიზნებს მიაღწია წარმატებით და დაფასებული, შეფასებული იყო წარმატებულად მთელს მსოფლიოში, ჩვენ გადავედით ადაპტაციის და თანაცხოვრების ეტაპზე. რა არის ადაპტაციის და თანაცხოვრების ეტაპი - ეს მინდა დეტალურად ავხსნა, იმიტომ, რომ ათას სისულელეს საუბრობენ იმასთან მიმართებაში, რაც ქვეყანაში ხდება.

რა არის აქ მთავარი. პირველი გახლავთ სწრაფი გამოვლენა, რომელსაც აქვს თავისი ინსტრუმენტები და ამას, ახლა, უფრო დეტალურად მოგიყვებით, ეს არის ეფექტური და მიზნობრივი ტესტირებების ხარისხის ზრდა. მეორე ეტაპი არის სწრაფი მკურნალობა, რაც ჩვენ უკვე დავიწყეთ კლინიკური ჯგუფის საშუალებით, კლინიკურ პროცესებში ცვლილებების და კლინიკური პროცესების მართვაში ცვლილებების შეტანით. მესამე არის ადამიანი ნორმალური, სწრაფი დაბრუნება ეკონომიკურ ცხოვრებაში, რაც უფრო ეკონომიკური განზომილებაა“, - აღნიშნა პრემიერმა.