„მსოფლიო ბანკის საწარმოთა კვლევის მიხედვით,  საქართველო ქრთამის აღების შემთხვევების სიმცირითა და მოსყიდვის წნეხისგან  თავისუფლების მიხედვით მსოფლიოს საუკეთესო ათეულებში მოხვდა! ეს არის ყველაზე მნიშვნელოვანი გზავნილი ინვესტორებისათვის, რადგან პოსტპანდემიურ პერიოდში კიდევ უფრო იზრდება ინვესტიციების მნიშვნელობა,“ - ასე შეაფასა ეკონომიკის ექსპერტმა გიორგი ცუცქირიძემ მსოფლიო ბანკის ჯგუფის მიერ ჩატარებული საწარმოთა კვლევა თავის გვერდზე სოციალურ ქსელში Facebook - ი. მისი თქმით, ნიშანდობლივია, რომ ეს არის მსოფლიოში ერთ-ერთი ყველაზე დაბალი მაჩვენებელი, როგორც რეგიონალურ, ასევე გლობალურ დონეზე.

„შედარებისათვის აღნიშნული ინდიკატორი ევროპისა და ცენტრალური აზიის რეგიონის ქვეყნებში - 10%,  ხოლო  მაღალ განვითარებული ეკონომიკის  ქვეყნებში  კიდევ უფრო მეტი 12%-ია. კორუფციის თემა არაერთხელ ყოფილა ოპოზიციის წამყვანი თემა, რაზეც აპელირება და სხვადასხვა სახის სპეკულაციები, თუ ინსინუაციები ხდება დღესაც. ამ საკითხში „ნაციონალებს“ ბადალი არა ჰყავთ, მაგრამ რატომღაც ავიწყდებათ, რომ სწორედ მათი მმართველობისას ყვაოდა ელიტარული კორუფცია, ხოლო იმ წლებში იგივე მსოფლიო ბანკის კვლევით 2012 წლის არსებული მონაცემებით საქართველოს მაჩვენებლები ქრთამის აღების შემთხვევების გავრცელებისა (9.84%) და მოსყიდვის წნეხისგან თავისუფლების (8.72%) მიხედვით შესაბამისად 8-15-ჯერ უფრო მეტი იყო,  ვიდრე 2019 წელს არის დაფიქსირებული,“ - აცხადებს ექსპერტი.

გიორგი ცუცქირიძის განცხადებით, აღნიშნული მონაცემებითაც ჩანს, რომ ვითარებამ არსებითი გაუმჯობესება 2013 წლიდან დაიწყო, როცა ქრთამის აღების შემთხვევების სიმცირე და  მოსყიდვის წნეხისგან თავისუფლების ინდიკატორები მკვეთრად გაუმჯობესდა.

აღსანიშნავია, რომ კვლევის მიხედვით, საქართველოში 581 კერძო კომპანიის მფლობელებისა და მენეჯერების გამოკითხვამ აჩვენა, მათი რაოდენობა, რომლებიც ერთხელ მაინც, პრაქტიკაში გადააწყდნენ ქრთამის მოთხოვნის შემთხვევას, გამოკითხულ კომპანიათა მხოლოდ 1.3 % ს შეადგენს ).