ეკონომიკის ექსპერტი გიორგი ცუცქირიძე, სოციალურ ქსელ Facebookში სტატუსს აქვეყნებს, რომელსაც „კომერსანტი“ უცვლელად გთავაზობთ: „ევროპის ქვეყნებში და აშშ ში კორონა ვირუსის ზეგავლენა ეკონომიკაზე გაცილებით მაღალი იქნება ვიდრე ეს თავიდან ჩანდა. ზოგიერთი შეფასებით კი ეს არის ყველაზე დიდი კრიზისი, არა თუ 2008 ან 1987 წლებთან შედარებით, არამედ დიდი დეპრესიის შემდეგაც კი. უკვე სახეზეა არა მხოლოდ წამყვანი საფონდო ინდექსების ვარდნა, არამედ უმუშევრობის ზრდის მკვეთრი ტენდენციაც, რაც ყველაზე მოწყვლად ჯგუფებს და პირველ რიგში მცირე და საშუალო ბიზნეს შეეხება.

უმუშევრობის ზრდა თავის მხრივ სოციურ აპათიასთან ერთად გამოიწვევს კრიმინალის ზრდასაც, რაც არანაკლები პრობლემად შეიძლება გადაიქცეს, როგორც სამოქალაქო წესრიგის, ისე მთლიანად ეკონომიკისთვისაც. კოვირ 19 ის როგორც გლობალური მეზო ფაქტორის ზეგავლენამ ეკონომიკაზე და კრიზისის შემდგომ პერიოდში ბევრი რამის გადაფასებაც მოხდება, პირველ რიგში თავისუფალი ბაზრის ყოვლისშემძლეობის,იგივე ნეო ლიბერალური პარადიგმების გადაფასების თვალსაზრისით. კიდევ ერთხელ დამტკიცდა, რომ ჯანდაცვა როგორც სტანდარტული საბაზრო პროდუქტი უბრალოდ ჩავარდა.

არ მუშაობს სწორედ თავისუფალი ბაზრის მოთხოვნა - მიწოდების უნივერსუმიდან გამომდინარე. იტალიის მაგალითმაც ცხადად აჩვენა, რომ კერძო სავადმყოფოებს და კლინიკებს აქვთ იმდენი საწოლი, რამდენიც არის ბაზარზე მოთხოვნა შედარებით სტაბილურ პირობებში, მაგრამ ეს პარადიგმა მთლიანად იმსხვრევა კრიზისების დროს, როდესაც მოთხოვნა მკვეთრად იზრდება, ხოლო მისი დაკმაყოფილება ვერ ხერხდება.დიდწილად ამის შედეგი იყო,რომ იტალიის კლინიკებს არც საკმარისი ადგილები აღმოაჩნდათ და არც საჭირო მედიკამენტები, რასაც ემატება სასუნთქი აპარატურის მკვეთრი დეფიციტი, რაზეა საუბარი როდესაც ელემენტარულად პირბადეები თვით სამედიცინო პერსონალსაც კი არ ჰქონდა. ცალკე თემაა ფასები, როგორც მედიკამენტებზე, ისე სასურსათო პროდუქციაზე. ჩვენ აქაც ვნახეთ, რომ არა სახელმწიფოს მხრიდან ადექვატური ჩარევა, ცალკეულ "ბიზნესმენთა" მხრიდან ამ გაზრდილი მოთხოვნის შედეგი რა შეიძლება გამხდარიყო!

ჩავარდა კერძო სამედიცინო დაზღვევის არსებული მოდელიც, რადგან კერძო კომპანიები რეალურად აზღვევენ ვისაც ამის საჭიროება აქვს და არა ყველას. ხოლო ვირუსული პანდემიისას მისი ეფექტურობა სულაც ნულზე დადის, რადგან კერძო დაზღვევისას ამ პრობლემას ისიც აუარესებს, რომ თქვენი ჯანმრთელობისთვის გადახდილი ფული სადაზღვევო კომპანიის გადმოსახედიდან დანაკარგია, რაც უბრალოდ ე.წ „სამედიცინო ხარჯებში" გადის. ამ ვირუსთან ბრძოლის წინა ხაზზე მდგომი ინფექციური საავადმყოფოს პრივატიზაციის შედეგიც ხომ გამოჩნდა, რომ არა სახელმწიფო პროგრამები უბრალოდ აღარც იფუნქციონირებდა საერთოდ!

როდესაც ჩვენ ქართული ჯანდაცვის მაღალ პროფესიონალიზმზე ვსაუბრობთ, გარდა ვირუსოლოგთა და ინფექციონერთა მაღალი კვალიფიკაციისა, არ უნდა დაგვავიწყდეს, საყოველთაო ჯანდაცვის სახელმწიფო პროგრამებიც, რაც დღეს განსაკუთრებით დაბალშემოსავლიანი ოჯახებისათვის თავისებური ფინანსური ბალიშის როლს ასრულებს.

სწორედ ამ პროგრამებმა, რომელსაც ქართული ოპოზიცია მუდმივად აკრიტიკებდა და მის ეფექტიანობას ეჭქვეშ აყენებდა გაზრდილი საბიუჯეტო ხარჯების მიმიზეზებით, ბოლო წლებში უზრუნველყო მრავალი ადამიანის ჯანმრთელობა და ბევრი მათგანის სიცოცხლე გადაარჩინა. განსხავავებით ნაციონალური მოძრაობის ნულოვანი სოციალური პასუხისმგებლობის პერიოდისაგან, როდესაც მკურნალობის დასაფინანსებლად საკუთარი საცხოვრისის ბანკებში ჩადება ან სულაც გაყიდვა რომ უწევდათ.

საქართველოს მთავრობის მიერ წარმოდგენილ ოთხ პუნქტიანი სტრატეგიაც სავსებით სწორეა, როდესაც პრიორიტეტად ადამიანების ჯანმრთელობას და მათ სოციალურ დაცულობას აყენებს და ამ კუთხით განიხილავს ეკონომიკის სტიმულირების პაკეტსაც და უსაფრთხოების გაზრდილ ღონისძიებებსაც.

უბრალოდ, სრული ცინიზმია ახლა ნაციონალურ ოპოფლანგზე მოდრეიფე პარტიების თუ ცალკეული ექსპერტების მხრიდან მთავრობის ანტიკრიზისული მენეჯმენტის კრიტიკა, მით უმეტეს უცხოეთში ჩვენი თანამოქალაქეების მიტოვების გადაბრალება, მაშინ როდესაც ჩვენზე ბევრად განვითარებული ეკონომიკის ქვეყნებისათვის და თვით ამერიკის შეერთებული შტატებისთვისაც კი არის ერთ ერთი მთავარი პრობლემა დღევანდელ ფორს მაჟორულ სიტუაციაში.
Covid 19 - დარჩი სახლში“-წერს ცუცქირიძე.