საქართველოს მთავრობამ მოიწონა და დაამტკიცა კანონპროექტი „საინვესტიციო ფონდების შესახებ“, რომელიც მათი თქმით, კაპიტალის ბაზრის რეფორმის ერთ-ერთი მნიშვნელოვანი ნაწილია.
ინვესტორთა საბჭოს ხელმძღვანელმა გიორგი ჩერქეზიშვილმა „კომერსანტთან“ „საინვესტიციო ფონდების შესახებ“ კანონპროექტის მნიშვნელობაზე ისაუბრა და აღნიშნა, რომ საკანონმდებლო ჩარჩოს შექმნა მნიშვნელოვანი ცვლილებაა, რომელმაც ალტერნატიული დანაზოგების ზრდას უნდა შეუწყოს ხელი.
„ინვესტორთა საბჭო და მისი წევრები აქტიურად მუშაობდნენ აღნიშნულ კანონპროექტზე. იგი ადგენს რეგულირებადი და ალტერნატიული ფონდების სახეებს, მათი ადმინისტრირების წესსა და მისი სახელმწიფო რეგულირების სისტემის საფუძვლებს. ინვესტორთა საბჭოს სამდივნოში შეიქმნა საგანგებო სამუშაო ჯგუფი, რომელშიც თითქმის მთელი ინდუსტრია იყო წარმოდგენილი. ჯგუფის წევრებმა ინტენსიურად იმუშავეს და ერთობლივად, დეტალურად განიხილეს კანონპროექტი. ჯგუფის შენიშვნები სამდივნომ მიაწოდა ეროვნულ ბანკს და ეკონომიკის სამინისტროს.
კანონპროექტი კაპიტალის ბაზრის რეფორმის ერთ-ერთ მნიშვნელოვან ნაწილს წარმოადგენს და კაპიტალის ბაზრის გრძელვადიანი განვითარების სტრატეგიის ერთ-ერთი კომპონენტია. საინვესტიციო ფონდების თანამედროვე, ევროპული სტანდარტების შესაბამისი საკანონმდებლო ჩარჩოს შექმნა მნიშვნელოვანი ცვლილებაა, რომელმაც ალტერნატიული დანაზოგების ზრდას უნდა შეუწყოს ხელი“, - განმარტა გიორგი ჩერქეზიშვილმა.
მისივე განმარტებით, საინვესტიციო ფონდები შეძლებენ მოახდინონ აკუმულირებული კაპიტალის ეფექტური გადანაწილება ეკონომიკის სხვადასხვა სექტორში და გრძელვადიან საინვესტიციო რესურსზე ხელმისაწვდომობის ზრდას.
„საინვესტიციო ფონდები, ალტერნატიული დანაზოგების ზრდის ხელშეწყობის გარდა, თავისი საქმიანობის არსით ასევე შეძლებენ მოახდინონ აკუმულირებული კაპიტალის ეფექტური გადანაწილება ეკონომიკის სხვადასხვა სექტორში. საინვესტიციო ფონდების განვითარება მნიშვნელოვანია ქვეყანაში დაზოგვის კოლექტიური და ეფექტიანი მექანიზმების განვითარების თვალსაზრისით, რაც ხელს შეუწყობს საფინანსო სისტემის დივერსიფიკაციასა და გრძელვადიან საინვესტიციო რესურსზე ხელმისაწვდომობის ზრდას.
ასევე აღსანიშნავია, რომ ევროკავშირის UCITS-ის (Undertakings for Collective Investment in Transferable Securities )დირექტივასთან აპროქსიმაციით ეს კანონი საქართველოს საინვესტიციო სამართლებრივ გარემოს უფრო გასაგებს და ნაცნობს გახდის უცხოელი ინვესტორებისათვის“, - განაცხადა გიორგი ჩერქეზიშვილმა.
პარლამენტი კანონპროექტს „საინვესტიციო ფონდების შესახებ“ საგაზაფხულო სესიაზე განიხილავს. ეკონომიკის სამინისტროს ინფორმაციით, კანონპროექტი მომზადდა საქართველოს ეკონომიკისა და მდგრადი განვითარების სამინისტროს, საქართველოს ეროვნული ბანკის, აშშ-ის საერთაშორისო განვითარების სააგენტოს (USAID), მსოფლიო ბანკის, ინვესტორთა საბჭოს და სხვა საჯარო და განვითარების დონორი ორგანიზაციების, აგრეთვე კერძო სექტორის აქტიური მონაწილეობითა და ჩართულობით.
ნინო თამაზაშვილი