მიეცით მიწის მესაკუთრეებს ნაკვეთებამდე მისვლის უფლება, - ასე მიმართა პოლიტიკური გაერთიანება ,,ლელო საქართველოსთვის’’ ერთ-ერთმა ლიდერმა გიგლა მიქაუტაძემ მთავრობას.

მისი თქმით, დაწესებულ შეზღუდვებზე პასუხისმგებლობა მთავრობას ეკისრება.

,,საგაზაფხულო სამუშაოების დრო იწურება, ქალაქებში მცხოვრები მოსახლეობა კი ისევ ვერ ახერხებს ახლო მდებარე სასოფლო-სამეურნეო მიწების დამუშავებას. მათ შეზღუდული აქვთ ქალაქგარეთ მდებარე მიწის ნაკვეთებამდე მისვლა. ადგილობრივმა თვითმმართველობებმა აქამდე ვერ დანერგეს საშვების გაცემის სწრაფი და მარტივი პროცესი, ამიტომ მთელი პასუხისმგებლობა მთავრობაზე გადადის, რომელმაც დააწესა აღნიშნული შეზღუდვები. გაუგებარია, რა სირთულეს წარმოადგენს საშვების ონლაინ რეჟიმში გაცემა. ერთ დღეშია შესაძლებელი მარტივი პორტალის შექმნა, რომელიც მთლიანად მოხსნიდა წარმოქმნილ პრობლემას. მოვუწოდებ სოფლის მეურნეობის სამინისტროს, გამოიჩინოს ოპერატიულობა და უზრუნველყოს მიწის მესაკუთრეებზე საშვების სწრაფად გაცემა. იმის მაგივრად, რომ მოსალოდნელ სასურსათო დეფიციტს მთავრობა სოფლის მეურნეობის სტიმულირებით პასუხობდეს, პირიქით, ხელს უშლის მიწის მესაკუთრეებს საკუთარი ნაკვეთების დამუშავებაში. ამან კი წელს შესაძლოა შეამციროს ნაკვეთების დამუშავების მაჩვენებელი. წლებია, სახნავ-სათესი სავარგულების 75% ისედაც არ მუშავდება. „ლელოს“ ანტიკრიზისულ მოდელში 1 მილიარდი ლარი სწორედ სოფლის მეურნეობის ხელშეწყობისთვისაა გათვალისწინებული, მათ შორის, იმ ოჯახებისთვის, რომლებიც კრიზისის გამო დაბრუნდნენ სოფლებში და მცირე მეურნეობების მოწყობას აპირებენ’’, - განაცხადა გიგლა მიქაუტაძემ.

წყარო: ipn.ge