„23 თებერვალს, როდესაც აქ შტურმით შემოვარდა ორი ათასი ადამიანი და დააპატიმრა ოპოზიციის ერთ-ერთი გამოკვეთილი ლიდერი, წერტილი დაესვა ყველანაირ ილუზიას, რომ ვინმე პარლამენტში უკანა კარიდან, თუ წინა სადღესასწაულო კარიდან შევა“,- ასე გამოეხმაურა “ევროპული საქართველოს” ერთ-ერთი ლიდერი, გიგი უგულავა არჩილ თალაკვაძის განცხადებას იმის შესახებ, რომ ოპოზიცია საბოლოო ჯამში, პარლამენტში დაბრუნდება.

გიგი უგულავას თქმით, პარლამენტში შესვლა-არშესვლის საკითხს წერტილი დაესვა.

„თალაკვაძისნაირი ბრიყვების განცხადებაზე მე კომენტარს არ გავაკეთებ. დღეს პარლამენტის თავმჯდომარე რომ გამოდის და იძახის, ოპოზიცია შემოვა პარლამენტშიო, საერთოდ ხვდებით ალბათ, რომ ეს საკითხი შეკითხვის დასმის დონეზეც არაადეკვატურია. ამ ვითარებაში რა პარლამენტზე ვლაპარაკობთ? ვინც არიან, ისინიც უნდა გამოვიდნენ პარლამენტიდან. ეს დისკუსი დამთავრდა ხალხო და თუთიყუშებივით რამდენიც გაიმეორებთ, თქვენ ჩავარდებით უხერხულ მდგომარეობაში, იმიტომ, რომ დაემსგავსებით კოლექტიურ თალაკვაძეს.

დღეს საკითხი სხვანაირად დგას. 23 თებერვალს, როდესაც აქ შტურმით შემოვარდა ორიათასი ადამიანი და დააპატიმრეს ოპოზიციის ერთ-ერთი გამოკვეთილი ლიდერი, წერტილი დაესვა ყველანაირ ილუზიას, რომ ვინმე პარლამენტში უკანა კარიდან თუ წინა სადღესასწაულო კარიდან შევა. პარლამენტში შესვლა-არშესვლის საკითხზე წერტილი დასმულია და ეს საკითხი აღარ იხილება. საკითხი დგას ძალიან მკაფიოდ: პოლიტპატიმრების გათავისუფლება, პოლიტიკური დევნის შეწყვეტა, რიგგარეშე არჩევნები. სხვა თემა არ არსებობს“, - განაცხადა უგულავამ.

ცნობისთვის, პარლამენტის თავმჯდომარემ, არჩილ თალაკვაძემ განაცხადა, რომ ოპოზიცია საბოლოო ჯამში, პარლამენტში დაბრუნდება. თალაკვაძის თქმით, „ქართულ ოცნებას“ მოლაპარაკებებისთვის სრული მზადყოფნა აქვს.

IPN.GE