Georgian industrial Asset Management Group-ის (GIAM Group) კუთვნილი ქობულეთის საკონსერვო ქარხნის მიერ წარმოებული მანდარინის კონცენტრატი 100%-ით ექსპორტზე ევროპაში და იაპონიაში გადის.
გარდა ამისა, ბოლო 2 წლის მანძილზე პროდუქტს „კოკა-კოლას“ რუსული ფილიალი ყიდულობს.
საწარმოს დირექტორის რევაზ გოგიტიძეს თქმით, პანდემიამ სერიოზული გავლენა გაყიდვებზე ვერ მოახდინა და მოთხოვნა სტაბილური რჩება.
„მოთხოვნა სტაბილურია და ჩვენი პროდუქტი დღეს ყველა ბაზარზე ჩვეულ რეჟიმში შედის. ამ მხრივ არავითარი შეზღუდვები არ არსებობს. ჩვენი პროდუქციის საბოლოო მომხმარებლები როგორ წესი, ნატურალური წვენების მწარმოებლები არიან. ჩვენ მრავალწლიანი პარტნიორები გვყავს, რომლებიც ჩვენი პროდუქციის ხარისხში დარწმუნებულები არიან“ - განაცხადა მან.
GIAM Group-ის ქარხანა ქობულეთში 2012 წლიდან მუშაობს. საწარმო 3 ტიპის დანადგარითაა აღჭურვილი - კონცენტრატების, ხილის პიურეს და სტანდარტული მანდარინის დაფასოებისთვის. ამ დროისთვის კომპანიის ძირითადი საქმიანობა სწორედ კონცენტრატის წარმოებაა.
საწარმოო ხაზის სიმძლავრე საათში 15 ტონა მანდარინის გადამუშავებაა. მზა პროდუქტი 200-ლიტრიანი ავზებით იყიდება.
საწარმოს ISO 22000 და ქაშერულობის სერტიფიკატები გააჩნია.
ამ წელს GIAM Group აჭარის მთავრობის მიერ რეალიზებული არასტანდარტული მანდარინი შესყიდვის სუბსიდირების პროგრამის ერთადერთი მონაწილეა. დღეისთვის ამ პროგრამის ფარგლებში საწარმომ 2000 ტონაზე მეტი არასტანდარტული მანდარინი შეიძინა.
სეზონის დასრულებამდე კომპანია კიდევ 6000 ტონა ნედლეულის შესყიდვას გეგმავს.
რევაზ გოგიტიძეს თქმით, ამ დროისთვის კომპანიის ძირითადი ამოცანაა საცალო გაყიდვებისთვის შეფუთული ნატურალური წვენების საწარმოო ხაზის შესყიდვაა, რაც ქარხნის მოგებას გაზრდის.
„გარკვეული დროის მანძილზე ჩვენ ხილის პიურეს ვაწარმოებდით, ასევე საექსპორტოდ, რადგანაც საქართველოში ამ პროდუქტებზე მოთხოვნა დაბალია. ძირითადად ჩვენს პროდუქტს დსთ-ს ქვეყნებში ვყიდდით, მარგამ ფასების მხრივ უკრაინულ და პოლონურ პროდუქციასთან კონკურირება ვერ შევძელით. ეს იმიტომ, რომ ჩვენი პროდუქტი ექსპორტზე არა საბოლოო სახით, შეფუთული, არამედ 20-25 კგ.-ს კასრებში გადიოდა, შემდეგ კი ადგილზე მისი შეფუთვა ხდებოდა. ამიტომაც წარმოების შეჩერება მოგვიწია“ - ამბობს ქარხნის დირექტორი.
მისი თქმით, ამჯერად აქცენტი ნატურალური მანდარინის წვენის წარმოებაზე კეთდება, თუმცა, ეს ადვილი და იაფი საქმე არაა.
„ჩვენ შესაბამისი იტალიური მანქანა-დანადგარები უკვე შევარჩიეთ, თუმცა, ის 1,5 მლნ. ევრო ღირს, ასეთი თანხები კი ჩვენ არ გაგვაჩნია, ამ ეტაპზე მხოლოდ ნახევარი გვაქვს. ჩვენ საქართველოს მთავრობას და საერთაშორისო დონორებს უკვე მივმართეთ, თუმცა, უშედეგოდ. ამის მიუხედავად, წარმოების გაზრდაზე ჩვენ კვლავაც ვმუშაობთ“ - ამბობს რევაზ გოგიტიძე. მას კვლავაც სახელმწიფოს იმედი აქვს.
„ჩვენ მზად ვართ დაფინანსების სანაცვლოდ რეგიონალური ბიუჯეტი არასტანდარტული მანდარინის შესყიდვაზე სუბსიდირებისგან გავათავისუფლოთ. თუ ჩვენ ნატურალური წვენების წარმოების ხაზი გვექნება, მთელ არასტანდარტულ მანდარინს ჩვენით, სახელმწიფოს ჩარევის გარეშე შევისყიდით. აჭარის მთავრობას შესაბამისი წინადადებით უკვე მივმართეთ, და საკითხის წარმატებული გადაწყვეტის იმედი გვაქვს“ - მიიჩნევს გოგიტიძე.
Eastfruit.com
მოამზადა თენგიზ აბლოთიამ
GIAM Group
