კორონავირუსის პანდემიის ფონზე ევროკავშირის ქვეყნების უმეტესობაში ცხოვრება გაჩერდა, შვედეთში კი მაღაზიები, სკოლები და რესტორნები კვლავ ღიაა და კორონავირუსის შემთხვევების რიცხვი ყოველდღიურად იზრდება. Deutsche Welle-ს ცნობით, ინფექცია ქვეყანაში უკვე 2800 ადამიანს დაუდგინდა და 70 მათგანი გარდაიცვალა. 

„ინფექცია ვრცელდება. ადამიანების სიცოცხლე და ჯანმრთელობა, მათი სამუშაო ადგილები საფრთხის ქვეშაა. ძალიან ბევრი ადამიანი დაავადდება და ბევრი ადამიანი თავის ახლობლებს დაკარგავს“, - განაცხადა სტეფან ლიოვენმა.

მაღაზიები და რესტორნები ღიაა, ევროკავშირის წევრი ქვეყნების მოქალაქეები შვედეთში თავისუფლად შედიან. 29 მარტიდან ამოქმედდება 50-ზე მეტი ადამიანის შეკრების აკრძალვა. სკოლები და ბაგა-ბაღები ჩვეულ რეჟიმში მუშაობენ, დისტანციურ სწავლაზე მხოლოდ სტუდენტები და უფროსი კლასების მოსწავლეები გადავიდნენ. უცხოეთში მოგზაურობის შემდეგ შვედეთის მოქალაქეებს, მათ შორის არც ექიმებსა და მედდებს კარანტინში არავის უშვებს. იმ შემთხვევაშიც კი, თუ ადამიანს კორონავირუსის სიმპტომები აქვს, თვითიზოლაციაში მხოლოდ ის უნდა დარჩეს, მისი ოჯახის სხვა წევრებს კი თავისუფლად გადაადგილება შეუძლიათ.

რით არის გამოწვეული ასეთი მიდგომა? ქვეყნის მთავარი ეპიდემიოლოგი ანდერს ტეგნელი აცხადებს, რომ შვედების უმეტესობა კორონავირუსით უნდა დაინფიცირდეს, რათა მათ კოლექტიური იმუნიტეტი ჩამოუყალიბდეთ.

რაც შეეხება კორონავირუსზე ტესტირებას, შვედეთი ჯანმოს რეკომენდაციებს არც ამ საკითხში ითვალისწინებს. პანდემიის პირველ დღეებში კორონავირუსზე ანალიზის ჩაბარება ყველა მსურველს შეეძლო, ახლა კი ტესტირებას მხოლოდ ისინი გადიან, ვინც რისკის ჯგუფში შედის. ყველა სხვა პაციენტი, ვისაც კორონავირუსის სიმპტომები აქვს, სახლში უნდა დარჩნენ და მათ ტესტირებას არავინ ჩაუტარებს.

მიუხედავად ამისა, ჯერჯერობით არაა დამტკიცებული, რომ ადამიანს კორონავირუსის მიმართ იმუნიტეტის გამომუშავება შეუძლია და თუ ეს სიმართლეა, რამდენი ხანი ძლებს ეს იმუნიტეტი. ტეგნელის მიდგომას ქვეყანაში სულ უფრო მეტი ადამიანი აკრიტიკებს, თუმცა ხელისუფლება არჩეული სტრატეგიის შეცვლას არ აპირებს.

Imedinews